Tesla : భారత్‌లో రెండవ షోరూమ్ ప్రారంభం.. ఇక ఢిల్లీలోనూ టెస్లా కార్లు!

Tesla : ప్రపంచ ప్రఖ్యాత ఎలక్ట్రిక్ కార్ల తయారీ సంస్థ టెస్లా భారత్‌లో తన వ్యాపారాన్ని వేగవంతం చేస్తోంది. ఇటీవలే ముంబైలో తన మొదటి డీలర్‌షిప్‌ను ప్రారంభించిన టెస్లా, ఇప్పుడు దేశంలో తన రెండవ షోరూమ్‌ను కూడా ప్రారంభించడానికి సిద్ధంగా ఉంది. ముంబైలో టెస్లా మోడల్ వైని లాంచ్ చేసి, ఆ వెంటనే ఛార్జింగ్ నెట్‌వర్క్‌ను కూడా ఏర్పాటు చేసిన ఈ అమెరికన్ కంపెనీ, ఇప్పుడు ఢిల్లీలోని కస్టమర్లను కూడా ఆకట్టుకోవడానికి వస్తోంది.

ఢిల్లీలో కొత్త టెస్లా డీలర్‌షిప్ ఏరోసిటీలోని వరల్డ్‌మార్క్ 3 కాంప్లెక్స్‌లో ఓపెన్ చేయనున్నారు. ఈ షోరూమ్ ఢిల్లీ-ఎన్‌సిఆర్ ప్రాంతంలోని కస్టమర్ల కోసం ప్రత్యేకంగా ఏర్పాటు చేశారు. ఢిల్లీలో ప్రారంభోత్సవం తర్వాత, భారత్‌లో టెస్లాకు రెండు డీలర్‌షిప్‌లు ఉంటాయి. ప్రస్తుతం, దేశవ్యాప్తంగా కస్టమర్లు టెస్లా అధికారిక వెబ్‌సైట్ ద్వారా మోడల్ వైని బుక్ చేసుకోవచ్చు.

టెస్లా ప్రస్తుతం భారత్‌లో ఒకే ఒక్క మోడల్ వైని అమ్ముతోంది. ఈ ఎలక్ట్రిక్ క్రాస్ఓవర్ ప్రారంభ ధర రూ. 60 లక్షలు. ఇది కేవలం రియర్-వీల్ డ్రైవ్‌తో లభిస్తుంది, కానీ రెండు వేరియంట్లలో అందుబాటులో ఉంది. అవి స్టాండర్డ్, లాంగ్ రేంజ్. టెస్లా మోడల్ వై స్టాండర్డ్ వేరియంట్ ఒకసారి పూర్తిగా ఛార్జ్ చేస్తే 500 కి.మీ వరకు వెళ్తుంది. ఇది 235 బీహెచ్‌పి పవర్ ఉత్పత్తి చేస్తుంది. 5.9 సెకన్లలో 0 నుండి 100 కి.మీ వేగాన్ని అందుకుంటుంది.

టెస్లా మోడల్ వై లాంగ్ రేంజ్ వేరియంట్ పూర్తిగా ఛార్జ్ చేస్తే 622 కి.మీ వరకు రేంజ్ ఇస్తుంది. ఇది 335 బీహెచ్‌పి పవర్ ఉత్పత్తి చేస్తుంది. 5.6 సెకన్లలో 0 నుండి 100 కి.మీ వేగాన్ని అందుకోగలదు. భారత మార్కెట్‌లో టెస్లాకు గట్టి పోటీ ఎదురయ్యే అవకాశం ఉంది. దేశీయ కార్ల తయారీదారులైన టాటా మోటార్స్, మహీంద్రా (బీఈ 6, ఎక్స్‌ఈవీ 9ఈ) వంటివి టెస్లాతో పోటీ పడనున్నాయి. అయితే, టెస్లాకు అసలైన పోటీ బీవైడీ, విన్‌ఫాస్ట్ వంటి కొత్త కంపెనీల నుండి ఉండనుంది. ప్రస్తుతం, బీవైడీ భారత్‌లో సీలియన్ 7ని అమ్ముతోంది. దీని రేంజ్ 567 కి.మీ. అలాగే, విన్‌ఫాస్ట్ కూడా వీఎఫ్ 6, వీఎఫ్ 7 అనే రెండు మోడళ్లను లాంచ్ చేయడానికి సిద్ధమవుతోంది.