TVS Apache : టీవీఎస్ అపాచీ బైక్ సరికొత్త రికార్డు.. ఏకంగా 70 లక్షల కస్టమర్ల మనసు గెలుచుకున్న దేశీ బైక్

TVS Apache : భారతీయ ప్రముఖ ద్విచక్ర వాహన తయారీ సంస్థ టీవీఎస్ మోటార్ కంపెనీ మార్కెట్లో సరికొత్త రికార్డు సృష్టించింది. బైక్ లవర్స్ ఎంతగానో ఇష్టపడే తన పాపులర్ స్పోర్ట్స్ బైక్ సిరీస్ టీవీఎస్ అపాచీ విక్రయాల్లో 70 లక్షల యూనిట్ల మైలురాయిని అందుకుంది. ఈ అద్భుతమైన మైలురాయిని సెలబ్రేట్ చేసుకుంటూ, కంపెనీ తన 70 లక్షలవ బైక్‌గా ఒక స్పెషల్ బ్లాక్ కలర్ టీవీఎస్ అపాచీ RR 310 మోడల్‌ను ఒక లక్కీ కస్టమర్‌కు డెలివరీ చేసింది. విశేషం ఏంటంటే.. అపాచీ బ్రాండ్ మార్కెట్లోకి ప్రవేశించి విజయవంతంగా 20 సంవత్సరాలు పూర్తి చేసుకున్న తరుణంలోనే ఈ భారీ రికార్డు నమోదు కావడం విశేషం.

కేవలం రెండేళ్లలోనే 20 లక్షల బైకుల విక్రయం

గత కొన్ని సంవత్సరాలుగా అపాచీ బైకులకు మార్కెట్లో డిమాండ్ విపరీతంగా పెరిగిపోయింది. ఈ బైక్ అమ్మకాల వేగం చూస్తే ఎవరైనా సరే ఆశ్చర్యపోవాల్సిందే. గత 2023 సంవత్సరంలో అపాచీ బైకుల మొత్తం అమ్మకాలు 50 లక్షల యూనిట్లుగా ఉండేవి. ఆ తర్వాత 2025 నాటికి ఈ సంఖ్య 60 లక్షలకు చేరుకుంది. ఇప్పుడు 2026 జూలై నాటికి ఏకంగా 70 లక్షల మార్కును దాటేసింది. అంటే కేవలం గత రెండు సంవత్సరాల కాలంలోనే కంపెనీ ఏకంగా 20 లక్షల అపాచీ బైకులను విక్రయించిందన్నమాట. దీన్ని బట్టి చూస్తే యువతలో ఈ బైక్‌కు ఉన్న క్రేజ్ ఏంటో అర్థం చేసుకోవచ్చు.

ప్రపంచవ్యాప్తంగా 90 దేశాల్లో అపాచీ హవా

ప్రస్తుతం టీవీఎస్ అపాచీ సిరీస్‌లో కస్టమర్ల బడ్జెట్, ఛాయిస్‌కు తగ్గట్టుగా కంపెనీ ఎన్నో రకాల మోడళ్లను అందుబాటులో ఉంచింది. ఈ సిరీస్ ప్రారంభ మోడల్ అయిన అపాచీ RTR 160 నుంచి మొదలుకొని అత్యంత లగ్జరీ, ప్రీమియం మోడల్ అయిన అపాచీ RR 310 వరకు పలు వేరియంట్లు ఉన్నాయి. ఈ బైకులు కేవలం భారతదేశానికే పరిమితం కాలేదు. టీవీఎస్ కంపెనీ తన అపాచీ బైకులను ప్రపంచవ్యాప్తంగా 90 కంటే ఎక్కువ దేశాలకు ఎగుమతి చేస్తోంది. అందుకే అంతర్జాతీయ మార్కెట్లోనూ ఈ దేశీ బైక్‌కు విపరీతమైన ఫ్యాన్ బేస్ ఏర్పడింది.

పవర్‌ఫుల్ ఫీచర్లు.. రేసింగ్ టెక్నాలజీ

ఈ సిరీస్‌లో టాప్ ఎండ్ మోడల్ అయిన టీవీఎస్ అపాచీ RR 310 బైక్ ప్రారంభ ఎక్స్-షోరూమ్ ధర రూ.2.78 లక్షలుగా ఉంది. ఫీచర్ల విషయానికి వస్తే, ఇందులో 312.2 సీసీ సింగిల్-సిలిండర్, లిక్విడ్-కూల్డ్ ఇంజిన్‌ను అమర్చారు. ఇది 38 bhp పవర్, 29 Nm టార్క్‌ను జనరేట్ చేస్తుంది. రైడర్ల భద్రత, కంఫర్ట్ కోసం ఇందులో 6-స్పీడ్ గేర్‌బాక్స్, బై-డైరెక్షనల్ క్విక్‌షిఫ్టర్, క్రూజ్ కంట్రోల్, మల్టిపుల్ రైడింగ్ మోడ్స్, 5-ఇంచుల టీఎఫ్‌టీ డిజిటల్ డిస్‌ప్లే, అడ్జస్టబుల్ సస్పెన్షన్ వంటి ఎన్నో అధునాతన మోడ్రన్ ఫీచర్లను అందించారు.

ప్రపంచంలోనే మూడో అతిపెద్ద కంపెనీగా టీవీఎస్

టీవీఎస్ కంపెనీకి చెందిన అపాచీ ఓనర్స్ గ్రూప్ లో ప్రపంచవ్యాప్తంగా ఇప్పటివరకు 5 లక్షల కంటే ఎక్కువ మంది బైకర్లు సభ్యులుగా చేరారు. అలాగే టీవీఎస్ కంపెనీకి ఉన్న మొత్తం కస్టమర్ల సంఖ్య ఇప్పుడు 6.5 కోట్లు దాటిపోయింది. గత 44 ఏళ్లుగా మోటార్ స్పోర్ట్స్ రంగంలో ఉన్న టీవీఎస్ రేసింగ్ అనుభవం, వారి రేసింగ్ టెక్నాలజీ ఆధారంగానే ఈ అపాచీ బైకులను డిజైన్ చేశారు. ప్రస్తుతం ప్రపంచంలోనే మూడో అతిపెద్ద టూ-వీలర్ తయారీ సంస్థగా ఉన్న టీవీఎస్‌కు ఈ 70 లక్షల అపాచీ బైకుల అమ్మకాల రికార్డు మరొక అద్భుతమైన మైలురాయిగా నిలిచిపోతుంది.