Sin Goods : బీడీ, గుట్కా అలవాటు ఉందా?.. కొత్త జీఎస్టీతో 40% పన్ను

Sin Goods : ఇటీవల జీఎస్టీ కౌన్సిల్ 56వ సమావేశంలో అనేక ముఖ్యమైన నిర్ణయాలు తీసుకుంది. ఇందులో భాగంగా, 12%, 18% జీఎస్టీ స్లాబ్‌లను రద్దు చేసి, కేవలం 5% , 18% స్లాబ్‌లను కొనసాగించింది. దీంతో నిత్యావసర వస్తువుల ధరలు తగ్గుతాయి. అయితే, కొన్ని ప్రత్యేక వస్తువులపై మాత్రం పన్నును భారీగా పెంచారు. ఈ వస్తువులను సిన్ గూడ్స్ అని పిలుస్తారు. సిన్ గూడ్స్ అంటే మనుషుల ఆరోగ్యానికి, సమాజానికి హానికరమైనవిగా పరిగణించబడే వస్తువులు. ఉదాహరణకు, పొగాకు ఉత్పత్తులు, గుట్కా, మద్యం, పాన్ మసాలా వంటివి. ప్రభుత్వం వీటి వాడకాన్ని తగ్గించడానికి, వాటిపై వచ్చే ఆదాయాన్ని ప్రజల ఆరోగ్యం, సామాజిక సంక్షేమం కోసం ఉపయోగించడానికి ఈ వస్తువులపై అధిక పన్నులు విధిస్తుంది.

గతంలో ఈ సిన్ గూడ్స్ పై 28% జీఎస్టీతో పాటు ఒక ప్రత్యేక సెస్ విధించేవారు. ఈ సెస్ వల్ల మొత్తం పన్ను దాదాపు 40% వరకు చేరుకునేది. అయితే, ఇప్పుడు కొత్త విధానంలో సెస్ ను తొలగించి, నేరుగా 40% జీఎస్టీ స్లాబ్‌ను ప్రవేశపెట్టారు. ఈ నిర్ణయంతో పన్ను రేట్లు మరింత స్పష్టంగా, సులభంగా మారతాయి. ఇది కేవలం పన్నుల పెంపు మాత్రమే కాదు, ఒక సామాజిక బాధ్యతగా కూడా ప్రభుత్వం ఈ నిర్ణయం తీసుకుంది.

40% జీఎస్టీ పరిధిలోకి వచ్చే వస్తువులు

జీఎస్టీ కౌన్సిల్ ప్రకారం, 40% పన్ను పరిధిలోకి వచ్చే సిన్ గూడ్స్ ప్రధానంగా రెండు వర్గాలుగా విభజించారు:

1. లగ్జరీ వాహనాలు, రవాణా:

* 1200 సీసీ కంటే ఎక్కువ సామర్థ్యం గల పెట్రోల్ ఇంజిన్ కార్లు.

* 1500 సీసీ కంటే ఎక్కువ సామర్థ్యం గల డీజిల్ ఇంజిన్ కార్లు.

* 350 సీసీ కంటే ఎక్కువ సామర్థ్యం గల మోటార్ సైకిల్స్.

* స్టేషన్ వ్యాగన్, రేసింగ్ కార్లు వంటి అత్యంత ఖరీదైన కార్లు.

* వ్యక్తిగత హెలికాప్టర్లు, విమానాలు.

* యాచ్‌లు, ఇతర లగ్జరీ నౌకలు.

2. పొగాకు, సంబంధిత ఉత్పత్తులు:

* పాన్ మసాలా, గుట్కా, బీడీ, సిగరెట్లు, ఇతర పొగాకు ఉత్పత్తులు.

* ప్రాసెస్ చేయని పొగాకు, పొగాకు పొడి (ఆకులు మినహా).

* సిగార్లు, సిగరెట్ హోల్డర్లు, స్మోకింగ్ పైపులు.

* కేఫైన్ కలిగిన పానీయాలు, కార్బోనేటెడ్ ఫ్రూట్ డ్రింక్స్.

* పంచదార లేదా స్వీటెనర్ కలిపిన ఏరేటెడ్ డ్రింక్స్.

సామాన్య ప్రజలపై ప్రభావం

ఈ మార్పుల వల్ల సామాన్య ప్రజలపై పెద్దగా ప్రభావం ఉండదు. నిజానికి, కొత్త జీఎస్టీ స్లాబ్‌ల వల్ల నిత్యావసరాలు, చిన్న కార్లు వంటివి చౌకగా లభిస్తాయి. అయితే, జీఎస్టీ కౌన్సిల్ నిర్ణయించిన సిన్ గూడ్స్ మాత్రం ఖరీదైనవిగా మారతాయి. ప్రభుత్వం వీటిపై పన్ను పెంచడం వెనుక ప్రధాన ఉద్దేశం వీటి వినియోగాన్ని తగ్గించడమే. సెప్టెంబర్ 22 నుంచి ఈ కొత్త పన్ను రేట్లు అమల్లోకి వస్తాయి. దీంతో ప్రజలు ఆరోగ్యానికి హానికరమైన వస్తువులను కొనేటప్పుడు ఒకటికి రెండుసార్లు ఆలోచించుకునే అవకాశం ఉంది. ఈ నిర్ణయాలు దేశ ప్రజల ఆరోగ్య సంరక్షణకు, ఆర్థిక వ్యవస్థకు కూడా ప్రయోజనకరంగా ఉంటాయని ప్రభుత్వం భావిస్తోంది.