KCC : రైతులు వ్యవసాయాన్ని వదిలేస్తున్నారా? KCC ఖాతాల గణాంకాలు ఏం చెబుతున్నాయంటే ?

KCC : రైతుల ఆదాయాన్ని పెంచడానికి, వారికి తక్కువ వడ్డీకి రుణాలు అందించడానికి కేంద్ర ప్రభుత్వం కిసాన్ క్రెడిట్ కార్డ్ (KCC) పథకాన్ని ప్రారంభించింది. అయితే, ఈ పథకం గురించి ఇటీవల ఒక ఆందోళన కలిగించే నివేదిక బయటకు వచ్చింది. మీడియా నివేదికల ప్రకారం.. 2025 ఆర్థిక సంవత్సరంలో ప్రభుత్వ బ్యాంకులలో కేసీసీ ఖాతాల సంఖ్య 1.8% తగ్గి 2.25 కోట్లకు చేరింది. అయితే ఇదే సమయంలో ఈ ఖాతాలపై పెండింగ్‌లో ఉన్న రుణం మాత్రం 2.2% పెరిగి రూ.413 బిలియన్లకు చేరింది.

కేసీసీ ఖాతాలు తగ్గడానికి కారణాలు

కేసీసీ ఖాతాలు తగ్గడానికి అనేక కారణాలు ఉన్నాయి.

రుణాల విధానంలో మార్పు: గ్రామీణ ప్రాంతాల్లో రుణాలు తీసుకునే విధానంలో మార్పులు వచ్చాయి. కొంతమంది రైతులు ప్రభుత్వ బ్యాంకులకు బదులుగా సహకార బ్యాంకులు, NBFCలు లేదా ఇతర సంస్థల నుంచి రుణాలు తీసుకుంటున్నారు.

వ్యవసాయం వదిలేస్తున్న రైతులు: కొంతమంది రైతులు వ్యవసాయం నుంచి తప్పుకుని ఇతర వృత్తులను ఎంచుకుంటున్నారు.

అర్హులైన రైతులు లేకపోవడం: కొత్త కేసీసీ ఖాతాలు తగ్గడానికి ఒక ప్రధాన కారణం... చాలా మంది అర్హులైన రైతులకు ఇప్పటికే కేసీసీ లభించడం. గతంలో ప్రభుత్వం విస్తృతంగా ప్రచారం చేసి, చాలా మంది రైతులకు ఈ కార్డులు అందజేసింది. అందుకే ఇప్పుడు కొత్తగా ఖాతాలు తెరిచేవారి సంఖ్య తగ్గింది. అయినా, కేసీసీ ఇప్పటికీ రైతులకు వ్యవసాయం కోసం రుణాలు తీసుకునేందుకు ఒక ముఖ్యమైన సాధనంగా ఉందని పంజాబ్ నేషనల్ బ్యాంక్ ఎండీ అశోక్ చంద్ర తెలిపారు.

తక్కువ వడ్డీకి రుణాలు

కిసాన్ క్రెడిట్ కార్డ్ (KCC) పథకం కింద రైతులకు చాలా తక్కువ వడ్డీకే రుణాలు లభిస్తాయి. ఈ పథకంలో రైతులకు రూ.5 లక్షల వరకు రుణం లభిస్తుంది. ఇందులో రూ.3 లక్షలు పంటల కోసం, మిగిలిన రూ.2 లక్షలు వ్యవసాయానికి సంబంధించిన ఇతర పనుల కోసం ఇస్తారు. ఈ రుణాలపై సాధారణంగా 7% వడ్డీ ఉంటుంది. అయితే, ప్రభుత్వం 2% వడ్డీ రాయితీ ఇస్తుంది. ఒకవేళ రైతులు సకాలంలో రుణం తిరిగి చెల్లిస్తే, మరో 3% బోనస్ కూడా లభిస్తుంది. అంటే, మొత్తంగా రైతులకు కేవలం 4% వడ్డీకే రుణం లభిస్తుంది. ఇది దేశంలోనే అత్యంత తక్కువ వడ్డీతో కూడిన వ్యవసాయ రుణాలలో ఒకటి.