Aviation Crisis: ఆకాశంలో యుద్ధ సెగలు.. విమానయాన రంగానికి చమురు సెగ, 278 ఫ్లైట్స్ క్యాన్సిల్

Aviation Crisis: మిడిల్ ఈస్ట్‎లో ముదురుతున్న యుద్ధ జ్వాలలు ఇప్పుడు విమానయాన రంగాన్ని కుదిపేస్తున్నాయి. ఇరాన్-ఇజ్రాయెల్ మధ్య ఉద్రిక్తతల కారణంగా ముడి చమురు ధరలు పెరగడమే కాకుండా, విమాన మార్గాల్లో పెను మార్పులు వచ్చాయి. దీనివల్ల విమానయాన సంస్థల నిర్వహణ ఖర్చులు తడిసి మోపెడవుతున్నాయి. ఈ విపత్కర పరిస్థితులపై చర్చించేందుకు కేంద్ర పౌర విమానయాన శాఖ మంత్రి రామ్ మోహన్ నాయుడు శుక్రవారం ఎయిర్‌లైన్ ఎగ్జిక్యూటివ్‌లతో అత్యవసర సమావేశం నిర్వహించారు. ఈ యుద్ధం ఇలాగే కొనసాగితే విమాన ప్రయాణాలు సామాన్యులకు భారంగా మారడమే కాకుండా, ఎయిర్‌లైన్స్ మనుగడ కూడా కష్టతరమవుతుందని నిపుణులు హెచ్చరిస్తున్నారు.

ఆకాశాన్ని తాకుతున్న జెట్ ఫ్యూయల్ ధరలు

విమానయాన సంస్థల మొత్తం ఖర్చులో ఇంధనం వాటా దాదాపు 15 నుంచి 25 శాతం ఉంటుంది. అయితే, యుద్ధ భయాల నేపథ్యంలో సింగపూర్‌లో జెట్ ఫ్యూయల్ ధరలు ఒక్కసారిగా 72 శాతం పెరిగి బ్యారెల్‌కు 225.44 డాలర్ల రికార్డు స్థాయికి చేరుకున్నాయి. దీంతో విమాన టికెట్ల ధరలు పెంచక తప్పని పరిస్థితి నెలకొంది. అందుకే ప్రభుత్వం వెంటనే స్పందించి జెట్ ఫ్యూయల్ ధరలను నియంత్రించాలని, అలాగే ఎయిర్‌పోర్ట్ ఫీజులు మరియు నావిగేషన్ ఛార్జీలను తగ్గించాలని ఎయిర్‌లైన్ ప్రతినిధులు మంత్రిని కోరారు. అయితే ప్రస్తుతానికి ఎలాంటి ఆర్థిక ప్యాకేజీని ప్రభుత్వం ప్రకటించలేదు కానీ, రెగ్యులేటరీ సమస్యలను పరిష్కరిస్తామని హామీ ఇచ్చింది.

భారీగా పెరుగుతున్న ఖర్చులు

యుద్ధం జరుగుతున్న ప్రాంతాల మీదుగా విమానాలు వెళ్లడం ప్రమాదకరం కావడంతో, ఎయిర్ ఇండియా వంటి సంస్థలు యూరప్, అమెరికా వెళ్లేందుకు సుదీర్ఘ మార్గాలను ఎంచుకుంటున్నాయి. పాకిస్థాన్ గగనతలం అలియెడ్ రూట్ ఇప్పటికే మూతపడటంతో, ఇప్పుడు యుద్ధం కారణంగా మిడిల్ ఈస్ట్ రూట్ కూడా ఇబ్బందికరంగా మారింది. దీనివల్ల ఫ్యూయల్ ఖర్చు పెరగడమే కాకుండా, విమాన సిబ్బంది పని వేళలు కూడా పెరుగుతున్నాయి. ఈ నేపథ్యంలో చైనా మీదుగా ప్రత్యామ్నాయ మార్గాన్ని అనుమతించాలని ఎయిర్ ఇండియా కోరుతోంది. దీనిపై రక్షణ మరియు విదేశీ వ్యవహారాల శాఖలతో చర్చించాల్సి ఉంది.

ఇన్సూరెన్స్ బాదుడు.. నిలిచిపోయిన విమానాలు

యుద్ధ భయంతో ఇన్సూరెన్స్ కంపెనీలు వార్ రిస్క్ ఇన్సూరెన్స్ ప్రీమియంలను భారీగా పెంచేశాయి. ఢిల్లీ-దుబాయ్ వంటి చిన్న మార్గాల్లోనే విమానానికి రూ. 30-40 లక్షలు, పెద్ద విమానాలకు ఏకంగా రూ.కోటి వరకు అదనపు భారం పడుతోంది. మరోవైపు ఇండిగో వంటి సంస్థలు లీజుకు తీసుకున్న విమానాలను కూడా వాడలేకపోతున్నాయి. అంతర్జాతీయ భద్రతా నియమాల ప్రకారం యుద్ధ ప్రాంతాల మీదుగా ఆ విమానాలు వెళ్లడానికి అనుమతి లేదు. దీంతో ఎయిర్‌లైన్స్ ఆదాయం భారీగా పడిపోతోంది.

వందలాది ఫ్లైట్స్ క్యాన్సిల్.. ప్రయాణికుల ఇక్కట్లు

శుక్రవారం ఒక్కరోజే భారతీయ ఎయిర్‌లైన్స్ దాదాపు 278 అంతర్జాతీయ విమానాలను రద్దు చేశాయి. కేవలం మిడిల్ ఈస్ట్‌లో చిక్కుకున్న భారతీయులను తరలించేందుకు మాత్రమే పరిమిత సంఖ్యలో విమానాలను నడుపుతున్నాయి. విమానాశ్రయాల్లో కఠినమైన భద్రతా తనిఖీలు, రూట్ మార్పుల వల్ల విమానాలు రాకపోకలు సాగించడంలో తీవ్ర జాప్యం జరుగుతోంది. ఇంటర్నేషనల్ రూట్లు ఎక్కువగా ఉన్న సంస్థలపై ఈ ప్రభావం మరీ ఎక్కువగా ఉంది. పరిస్థితులు త్వరగా చక్కబడకపోతే విమానయాన రంగం కోలుకోలేని దెబ్బతింటుందని ఎస్ అండ్ పీ వంటి విశ్లేషణ సంస్థలు అభిప్రాయపడుతున్నాయి.