BSNL : పెరిగిన ఖర్చులు, మారిన లెక్కలు.. బీఎస్ఎన్ఎల్ రూ.1,357 కోట్ల నష్టం వెనుక అసలు కథ

BSNL : దేశంలో అతిపెద్ద ప్రభుత్వ టెలికాం సంస్థ బీఎస్ఎన్ఎల్ మరోసారి భారీ నష్టాన్ని చవిచూసింది. తాజా నివేదిక ప్రకారం.. సెప్టెంబర్‌తో ముగిసిన త్రైమాసికంలో కంపెనీకి ఏకంగా రూ.1,357 కోట్ల నష్టం వచ్చింది. అంతకు ముందు జూన్ త్రైమాసికంలో వచ్చిన నష్టం (రూ.1,049 కోట్లు) కంటే ఇది చాలా ఎక్కువ కావడం ఆందోళన కలిగిస్తోంది. ఒక సాధారణ యూజర్ ఆలోచన ఏంటంటే.. కంపెనీ 4G సేవలను మొదలుపెట్టి, నెట్‌వర్క్‌ను మెరుగుపరుస్తున్నప్పుడు నష్టాలు తగ్గాలి కదా, కానీ ఎందుకు పెరుగుతున్నాయి? దీని వెనుక ఉన్న కారణాలను తెలుసుకుందాం.

బీఎస్ఎన్ఎల్‌కు ఇంత పెద్ద నష్టం రావడానికి ఒక కారణం కాదు, చాలా కారణాలు ఉన్నాయి. ప్రధానంగా దీని వెనుక ఉన్నది డిప్రిసియేషన్, నెట్‌వర్క్‌ను నడపడానికి అయ్యే భారీ ఖర్చు. సింపుల్ గా చెప్పాలంటే బీఎస్ఎన్ఎల్ తన నెట్‌వర్క్‌ను 4Gకి అప్‌గ్రేడ్ చేయడానికి భారీగా డబ్బును పెట్టుబడి పెట్టింది. ఒక కంపెనీ ఇలా పెద్ద ఖర్చు చేసినప్పుడు, అకౌంటింగ్ లెక్కల ప్రకారం.. ఆ కొత్త ఆస్తుల విలువ తగ్గిపోతుంది. దీని వల్ల వడ్డీ ఖర్చులు కూడా పెరుగుతాయి.

కంపెనీ పెట్టిన పెట్టుబడి ఖర్చు (డిప్రిసియేషన్, అమారైజేషన్) ఏకంగా రూ.2,477 కోట్లుగా ఉంది. ఇది గత ఏడాదితో పోలిస్తే 57% ఎక్కువ. కేంద్ర మంత్రి జ్యోతిరాదిత్య సింధియా ముందే చెప్పారు. ఈ ఏడాది బీఎస్ఎన్ఎల్ దాదాపు రూ.25,000 కోట్ల భారీ పెట్టుబడి పెట్టింది. ఈ ఖర్చు బ్యాలెన్స్ షీట్‌పై ప్రభావం చూపుతుంది. అందుకే లాభాలు రావడం ఇప్పట్లో కష్టమే అని ఆయన అన్నారు.

నష్టాల మధ్య కూడా బీఎస్ఎన్ఎల్‌కి కొన్ని సానుకూల విషయాలు ఉన్నాయి. 4G సేవలు మొదలవ్వడం వల్ల దీని ఫలితం ఇప్పుడు కనిపిస్తోంది. కంపెనీ ఆపరేషన్స్ ద్వారా వచ్చే ఆదాయం గత ఏడాదితో పోలిస్తే 6.6% పెరిగి రూ.5,166.7 కోట్లకు చేరుకుంది. ప్రతి యూజర్ నుంచి వచ్చే సగటు ఆదాయం (ARPU) రూ.81 నుంచి రూ.91కి పెరిగింది. అంటే, బీఎస్ఎన్ఎల్ సేవలను వినియోగదారులు బాగా వాడుతున్నారు అని అర్థం. కంపెనీ తన వార్షిక ఆదాయాన్ని 2026 ఆర్థిక సంవత్సరం నాటికి 20% పెంచి రూ.27,500 కోట్లకు చేర్చాలని లక్ష్యంగా పెట్టుకుంది. ప్రస్తుతం బీఎస్ఎన్ఎల్‌కి 9.23 కోట్ల మొబైల్ కస్టమర్‌లు ఉన్నారు.

నెట్‌వర్క్‌ను ఏర్పాటు చేస్తే సరిపోదు అని మార్కెట్ నిపుణులు అంటున్నారు. ప్రముఖ విశ్లేషకుడు ఫైసల్ కావూసా ప్రకారం.. బీఎస్ఎన్ఎల్‌కు రెండు పెద్ద సవాళ్లు ఉన్నాయి.. ప్రైవేట్ కంపెనీల మాదిరిగా బీఎస్ఎన్ఎల్ బ్రాండ్ మార్కెట్‌లో అంతగా కనిపించడం లేదు. సేవలు అందించడంలో ప్రభుత్వ సంస్థ ఇంకా వెనుకబడే ఉంది.

ప్రైవేట్ కంపెనీల ఉద్యోగులు, మేనేజ్‌మెంట్ లాగా బీఎస్ఎన్ఎల్ ఉద్యోగులకు నష్టం వస్తే ఉద్యోగం పోతుంది అనే భయం ఉండదు. అందుకే, ప్రభుత్వ సహాయం మీద ఎక్కువగా ఆధారపడుతున్నంత కాలం బీఎస్ఎన్ఎల్ పుంజుకోవడం కష్టమేనని ఆయన అభిప్రాయపడ్డారు. ఇక బీఎస్ఎన్ఎల్ తన ఖర్చులను చూపించే విధానంలో ఒక చిన్న మార్పు చేసింది. గతంలో ఉద్యోగుల జీతాల ఖర్చు మొత్తం ఆదాయంలో 43% ఉండేది, ఇప్పుడు అది 37%కి తగ్గింది. జీతాలు తగ్గలేదు, కానీ కంపెనీ నెట్‌వర్క్ విస్తరణకు అయ్యే ఖర్చులో ఉద్యోగుల జీతాలను కూడా పెట్టుబడి పనిలో ఉంది అనే దానిలో చూపించడం మొదలుపెట్టింది.

ప్రాజెక్ట్ పూర్తయి, ఆదాయం రావడం మొదలయ్యాకే ఈ ఖర్చు లాభనష్టాల అకౌంట్‌లో కనిపిస్తుందని బీఎస్ఎన్ఎల్ వివరణ ఇచ్చింది. టెలికాం పరిశ్రమలో ఇలా భారీ విస్తరణ సమయంలో ఖర్చులను పెట్టుబడిగా చూపించడం మామూలేనని కంపెనీ అంటోంది.