Bullet Train Project : బుల్లెట్ రైలు ప్రాజెక్టుపై భారీ భారం.. రూ.1.98 లక్షల కోట్లకు చేరిన ఖర్చు

Bullet Train Project : భారతదేశ కలల ప్రాజెక్టు అయిన బుల్లెట్ రైలు నిర్మాణంలో ఒక కీలక మలుపు చోటుచేసుకుంది. ముంబై - అహ్మదాబాద్ హై స్పీడ్ రైల్ ప్రాజెక్టు అంచనా వ్యయం ఊహించని రీతిలో పెరిగిపోయింది. మొదట ఈ ప్రాజెక్టును రూ.1.08 లక్షల కోట్లతో పూర్తి చేయాలని భావించినప్పటికీ, ఇప్పుడు ఆ ఖర్చు ఏకంగా రూ.1.98 లక్షల కోట్లకు ($21.5 బిలియన్లు) చేరుకుంది. అంటే దాదాపు 83 శాతం వ్యయం పెరిగింది. ప్రధానంగా భూసేకరణలో జరిగిన జాప్యం వల్ల పనులు ఆలస్యం కావడం, వస్తువుల ధరలు పెరగడం ఈ భారీ పెరుగుదలకు కారణమని అధికారులు చెబుతున్నారు.

పెరిగిన ఈ అదనపు భారాన్ని మోయడానికి భారత రైల్వే ఒక సరికొత్త వ్యూహాన్ని సిద్ధం చేసింది. సాధారణంగా ఇలాంటి భారీ ప్రాజెక్టుల కోసం విదేశీ సంస్థల నుంచి రుణాలు తీసుకుంటారు. ఇప్పటికే జపాన్ ఇంటర్నేషనల్ కోఆపరేషన్ ఏజెన్సీ సుమారు రూ.59,396 కోట్ల సాఫ్ట్ లోన్ ఇచ్చింది. అయితే, ఇప్పుడు పెరిగిన ఖర్చు కోసం జపాన్ వైపు చూడకూడదని రైల్వే శాఖ నిర్ణయించుకుంది. మరిన్ని రుణాలు తీసుకుంటే వడ్డీ భారం పెరుగుతుందని భావించిన ప్రభుత్వం.. కేంద్ర బడ్జెట్ నుంచి ఇచ్చే గ్రాస్ బడ్జెటరీ సపోర్ట్ ద్వారానే ఈ నిధులను సమకూర్చుకోవాలని ప్లాన్ చేస్తోంది.

ఈ ప్రాజెక్టును అమలు చేస్తున్న నేషనల్ హై స్పీడ్ రైల్ కార్పొరేషన్ కోసం 2027 ఆర్థిక సంవత్సర బడ్జెట్‌లో ప్రభుత్వం 15,000 కోట్ల రూపాయలను కేటాయించింది. వచ్చే ఏడాదిల్లో కూడా ఇదే స్థాయిలో నిధులు ఇచ్చే అవకాశం ఉంది. ఈ నిధులతోనే పనులను వేగవంతం చేసి, అదనపు అప్పుల జోలికి వెళ్లకుండా ప్రాజెక్టును పూర్తి చేయాలన్నది కేంద్ర ఆర్థిక మరియు రైల్వే మంత్రిత్వ శాఖల ఆలోచన. ప్రాజెక్టు పనులు ప్రస్తుతం శరవేగంగా జరుగుతున్నాయి. 508 కిలోమీటర్ల పొడవైన ఈ కారిడార్‌లో ఉన్న 12 స్టేషన్లలో ఇప్పటికే 8 స్టేషన్ల పునాది పనులు పూర్తయ్యాయి. వచ్చే ఏడాది (2027) నాటికి కనీసం 100 కిలోమీటర్ల మేర బుల్లెట్ రైలును నడపాలని ప్రభుత్వం లక్ష్యంగా పెట్టుకుంది.

కేవలం ముంబై - అహ్మదాబాద్ కారిడార్‌కే పరిమితం కాకుండా, ప్రభుత్వం మరో 7 కొత్త బుల్లెట్ రైల్ కారిడార్లను కూడా ప్రకటించింది. సుమారు 16 లక్షల కోట్ల రూపాయల పెట్టుబడితో సుమారు 4,000 కిలోమీటర్ల మేర ఈ రైలు మార్గాలను నిర్మించనున్నారు. ఇందులో తెలుగు రాష్ట్రాలకు శుభవార్త ఏమిటంటే.. పుణె-హైదరాబాద్, హైదరాబాద్-బెంగళూరు, హైదరాబాద్-చెన్నై మార్గాలు కూడా ఈ జాబితాలో ఉన్నాయి. ఇవే కాకుండా ముంబై-పుణె, ఢిల్లీ-వారణాసి వంటి కీలక మార్గాల్లో కూడా బుల్లెట్ రైలు పరుగులు తీయనుంది. ఈ మెగా ప్రాజెక్టులు పూర్తయితే దేశ రవాణా రంగం రూపురేఖలే మారిపోవడం ఖాయం.