Corporate FD : సీనియర్ సిటిజన్లకు అలర్ట్..ఎక్కువ వడ్డీ కోసం బ్యాంకులకు బైబై చెప్పి ఇక్కడ డిపాజిట్ చేయండి

Corporate FD : రిజర్వ్ బ్యాంక్ ఆఫ్ ఇండియా 2025లో మొత్తం 125 బేసిస్ పాయింట్ల వడ్డీ రేట్లను తగ్గించడంతో ఇది ఫిక్స్‌డ్ డిపాజిట్ల పై ప్రత్యక్ష ప్రభావాన్ని చూపింది. డిసెంబర్ 5న జరిగిన ఎంపీసీ సమావేశంలో ఆర్‌బీఐ మరోసారి రెపో రేటును తగ్గించడంతో ప్రభుత్వ, ప్రైవేట్ బ్యాంకులు తమ ఎఫ్‌డీ రేట్లను మరింత తగ్గించాయి. ప్రస్తుతం చాలా బ్యాంకులు 6.5% నుంచి 7.5% మధ్య వడ్డీని మాత్రమే అందిస్తున్నాయి. దీంతో తమ పొదుపుపై మెరుగైన రాబడిని ఆశించే సాధారణ పొదుపుదారులు, ముఖ్యంగా సీనియర్ సిటిజన్లకు లభించే మొత్తం రాబడి తగ్గి, వారిపై ఆర్థిక ఒత్తిడి పెరిగింది.

బ్యాంకుల్లో వడ్డీ రేట్లు తగ్గడంతో, పెట్టుబడిదారులు ఇప్పుడు నాన్-బ్యాంకింగ్ ఫైనాన్స్ కంపెనీలు లేదా కార్పొరేట్ ఎఫ్‌డీల వైపు చూస్తున్నారు. ఈ కంపెనీలు బ్యాంకులతో పోటీ పడుతూ అధిక వడ్డీని అందిస్తున్నాయి. ఉదాహరణకు.. బజాజ్ ఫైనాన్స్ 7.30% ఇవ్వగా, శ్రీరామ్ ఫైనాన్స్ 8.65%, ముత్తూట్ క్యాపిటల్ 8.85% వరకు వార్షిక వడ్డీని అందిస్తున్నాయి. సీనియర్ సిటిజన్లకు అయితే, ఈ ఎన్‌బిఎఫ్‌సిలు సాధారణంగా 0.25% నుంచి 0.50% వరకు అదనపు వడ్డీని అందిస్తున్నాయి. అందుకే ఎక్కువ రాబడి కోరుకునే వారికి కార్పొరేట్ ఎఫ్‌డీలు ఆకర్షణీయమైన ఎంపికగా మారాయి.

అయితే, అధిక వడ్డీతో పాటు అధిక రిస్క్ ఉంటుందని నిపుణులు హెచ్చరిస్తున్నారు. బ్యాంక్ ఎఫ్‌డీలకు డీఐసీజీసీ కింద ప్రతి బ్యాంకులో రూ.5 లక్షల వరకు బీమా రక్షణ ఉంటుంది. అంటే ఒకవేళ బ్యాంకు దివాలా తీసినా, ఆ మొత్తాన్ని ప్రభుత్వం నుంచి తిరిగి పొందవచ్చు. కానీ కార్పొరేట్ ఎఫ్‌డీలపై ఇలాంటి బీమా రక్షణ ఏదీ ఉండదు. కంపెనీ ఆర్థిక సంక్షోభంలో చిక్కుకుంటే, మీ పెట్టుబడి పూర్తిగా కోల్పోయే ప్రమాదం ఉంది. అందుకే పెట్టుబడి పెట్టే ముందు క్రిసిల్ వంటి రేటింగ్ ఏజెన్సీల నుంచి AAA లేదా AA రేటింగ్ ఉన్న కంపెనీలను మాత్రమే ఎంచుకోవాలని ఆర్థిక నిపుణులు సలహా ఇస్తున్నారు.

పెట్టుబడిదారులు తమ నిర్ణయం తీసుకునేటప్పుడు రిస్క్, రాబడిని బ్యాలెన్స్ చేసుకోవాలి. తమ మూలధనం పూర్తి భద్రత, రిస్క్ లేకుండా ఉండేందుకు ప్రాధాన్యత ఇచ్చేవారు బ్యాంక్ ఎఫ్‌డీలు లేదా ప్రభుత్వ పథకాలలో పెట్టుబడి పెట్టడం ఉత్తమం. ఎవరైతే బ్యాంకుల కంటే ఎక్కువ రాబడిని కోరుకుంటూ, కంపెనీ ఆర్థిక స్థితి, క్రెడిట్ రేటింగ్ పరిశీలించి, కొద్దిగా రిస్క్ తీసుకోగలరో, వారికి మాత్రమే కార్పొరేట్ ఎఫ్‌డీలు సరైన ఎంపిక.