Trump Tariff : ట్రంప్ మూడ్ మారిందా ఏంటి.. 100% ఫార్మా టారిఫ్ ఎందుకు అమలు కాలేదు?

Trump Tariff : అమెరికా అధ్యక్షుడు డొనాల్డ్ ట్రంప్ గత వారం ప్రకటించిన బ్రాండెడ్, పేటెంట్ మందుల దిగుమతులపై 100 శాతం టారిఫ్‌ విధింపు అక్టోబర్ 1, 2025 నుండి అమలులోకి వస్తుందని భావించారు. అయితే, అక్టోబర్ 1 గడిచిపోయినప్పటికీ ఈ టారిఫ్ అమలు కాలేదు. ఇది ట్రంప్ ప్రభుత్వ నిర్ణయంలో మార్పు వచ్చిందా లేదా ఇది ఒక వ్యూహాత్మక అడుగా అనే చర్చ జరుగుతోంది.

టారిఫ్ అమలులో ఆలస్యం ఎందుకు?

ఈ ఆలస్యం వెనుక ప్రధాన కారణం, ట్రంప్ ప్రభుత్వం టారిఫ్‌లను విధించే ముందు ఫార్మా కంపెనీలతో చర్చలు జరపాలని, వాటి తయారీని అమెరికాలోకి తీసుకురావాలని కోరుతోంది. అంతేకాకుండా, అనేక కంపెనీలు మందుల ధరలను తగ్గించడానికి చేసిన ప్రతిపాదనలను కూడా పరిశీలిస్తోంది. ఈ విషయంపై ప్రస్తుతం చర్చలు జరుగుతున్నందున టారిఫ్‌ల అమలులో ఆలస్యం జరుగుతోందని వైట్ హౌస్ స్పష్టం చేసింది. అయితే, భవిష్యత్తులో ఈ టారిఫ్‌లు అమలు కావచ్చని కూడా తెలిపింది.

అంటే, ఈ ముప్పు ఇంకా పూర్తిగా తొలగిపోలేదు. ఒకవేళ ట్రంప్ 100 శాతం ఫార్మా టారిఫ్ అమలు చేస్తే, విదేశాల నుంచి దిగుమతి అయ్యే మందుల ధరలు రోగులకు మరింత ప్రియం అవుతాయి. నిపుణుల అభిప్రాయం ప్రకారం, ఇది వాణిజ్య భాగస్వాముల మధ్య సంబంధాలను దెబ్బతీస్తుంది. గ్లోబల్ సప్లై చైన్‌లో అంతరాయాలకు దారితీయవచ్చు.

ఈ పరిణామాల మధ్య, ప్రముఖ ఫార్మాస్యూటికల్ కంపెనీ ఫైజర్ అమెరికా ప్రభుత్వంతో చేసుకున్న ఒప్పందం ప్రకారం, అమెరికాలో 70 బిలియన్ డాలర్ల పెట్టుబడి పెట్టనున్నట్లు ప్రకటించింది. అంతేకాకుండా, మందుల ధరలను కూడా తగ్గించడానికి హామీ ఇచ్చింది. ఇది కంపెనీ అమెరికాలో తన కార్యకలాపాలను విస్తరించడానికి సిద్ధంగా ఉందని సూచిస్తుంది.

ఒక నివేదిక ప్రకారం, ట్రంప్ ప్రభుత్వం తక్కువ ధరలకు మందులను అందించే ఒక వెబ్‌సైట్‌ను ప్రారంభించాలని యోచిస్తోంది. TrumpRx పేరుతో ప్రారంభం కావచ్చని అంచనా వేస్తున్న ఈ వెబ్‌సైట్ ద్వారా, రోగులు నేరుగా కంపెనీల నుండి డిస్కౌంట్ ధరలకు మందులను కొనుగోలు చేయవచ్చు. ఇది ఒక సెర్చ్ టూల్ లాగా పనిచేస్తుంది, దీని ద్వారా రోగులు ఏ ప్లాట్‌ఫారమ్‌లో ఏ మందుపై ఎంత తగ్గింపు లభిస్తుందో తెలుసుకోవచ్చు. అమెరికాలో మందుల ధరలను తగ్గించి, ప్రజలకు అందుబాటులోకి తీసుకురావడమే దీని లక్ష్యం.