Instagram Reels : ఇన్‌స్టా రీల్స్ కేవలం టైమ్ పాస్ కాదు.. మీకు తెలియకుండానే మీ జేబుకు చిల్లు పెడుతుంది

Instagram Reels : మీ దగ్గర మొబైల్, టైం రెండూ ఉంటే చాలా మంది ఇన్‌స్టా రీల్స్‌కు బానిసలైపోతుంటారు. కొన్ని క్షణాల వీడియో ముక్కలు చూడటం చాలా ఆనందంగా అనిపిస్తుంది. ఆకర్షణీయమైన సౌండ్, కలర్స్, గ్రాఫిక్స్ మొదలైనవి ఉన్న రీల్స్‌ను ఒకదాని తర్వాత ఒకటి స్క్రోల్ చేసుకుంటూ పోతుంటే సమయం ఎలా గడిచిపోతుందో కూడా తెలియదు. ఒకవేళ మీరు ఇలా టైం మరిచిపోయి చూస్తుంటే..మీ వాలెట్ నుండి డబ్బు ఖర్చవుతున్న విషయం కూడా మీకు తెలియదు.

చాలా మంది అమెజాన్, ఫ్లిప్‌కార్ట్ వంటి ఈ-కామర్స్ ప్లాట్‌ఫామ్‌లను కేవలం కుతూహలం కోసం స్క్రోల్ చేస్తుంటారు. వారికి తెలియకుండానే అనేక రకాల ఉత్పత్తులు వారిని ఆకర్షిస్తాయి. ఇది కావాలి, అది కావాలి అనిపించి, కొన్ని అనవసరమైన ఉత్పత్తులను బుక్ చేసుకుని ఇంటికి తెచ్చుకుంటారు. ఇన్‌స్టా రీల్స్ ప్రభావం కూడా అలాంటిదే.

మీరు ఇన్‌స్టాగ్రామ్‌లో ఏదైనా ఫన్నీ వీడియోలు, యాక్సిడెంట్ వీడియోలు లేదా ఇతర వైరల్ వీడియోలను చూడటానికి వెళ్తారు. అలా చూస్తూ చూస్తూ, ఇన్‌ఫ్లుయెన్సర్స్ అని పిలువబడే వ్యక్తుల వీడియోలు మధ్యలోకి రావడం మొదలవుతాయి. వీరు మన చుట్టూ ఉన్న సాధారణ వ్యక్తుల్లాగే కనిపిస్తారు. వీరు తాము కొనుగోలు చేసిన ఉత్పత్తుల గురించి రివ్యూలు ఇస్తూ ఉంటారు.

"నేను ఈ కొత్త వస్తువును కొనుగోలు చేశాను. దీన్ని ఉపయోగిస్తున్నాను. మీరు కూడా ఒకసారి ప్రయత్నించండి" అని ఈ ఇన్‌ఫ్లుయెన్సర్‌లు నెమ్మదిగా మిమ్మల్ని ప్రభావితం చేయడం ప్రారంభిస్తారు. వారు తమ ఫేస్‌వాష్ లేదా మొటిమల క్రీమ్ రాసుకుని మెరిసిపోవడం చూసి, మీరు కూడా ఆ కొత్త ఉత్పత్తిని ఎందుకు ప్రయత్నించకూడదు అనిపించవచ్చు. అక్కడ ఇచ్చిన లింక్‌ను క్లిక్ చేసి, ఆ ఉత్పత్తిని వేగంగా కార్ట్ కి యాడ్ చేస్తుంటారు.

మీరు రోజూ ఇన్‌స్టా రీల్స్ చూస్తుంటే, రోజుకు ఎన్నిసార్లు కొత్త ఉత్పత్తులు మిమ్మల్ని ఆకర్షించాయో, ఎన్ని ఉత్పత్తులను మీరు కార్ట్‌లో చేర్చారో ఆలోచించండి. రోజుకు ఒకటి కాకపోయినా, వారానికి రెండు లేదా మూడు వస్తువులు మీరు షాపింగ్ చేస్తే, ఒక నెలలో రూ.8-12 వేలు ఖర్చు అయిపోయి ఉంటుంది. రీల్స్ చూసి కొన్న వస్తువులు పనిచేసినా, చేయకపోయినా, మీ మనస్సు మాత్రం మరిన్ని రీల్స్ కోసం తహతహలాడుతూనే ఉంటుంది. మళ్లీ కొత్త కొత్త ఉత్పత్తులు మిమ్మల్ని ఆకర్షించడానికి సిద్ధంగా ఉంటాయి.