Jio: జియో 10వ వార్షికోత్సర బంపర్ ఆఫర్.. రూ.1499కే 4G ఫోన్‌తో పాటు 6 నెలలు ఫ్రీ డేటా
6 నెలలు ఫ్రీ డేటా
Jio: భారతీయ టెలికాం రంగంలో విప్లవాత్మక మార్పులు తెచ్చిన రిలయన్స్ జియో తన 10వ వార్షికోత్సవాన్ని పురస్కరించుకుని వినియోగదారులకు అదిరిపోయే కానుకను ప్రకటించింది. దేశవ్యాప్తంగా ఇంకా 2G నెట్‌వర్క్‌ను ఉపయోగిస్తున్న కోట్లాది మంది కస్టమర్లు సులువుగా 4G సేవలకు మారేలా ప్రోత్సహించే ఉద్దేశంతో ఈ ప్రత్యేక ఆఫర్‌ను తీసుకువచ్చారు. జియోభారత్ 4G ఫీచర్ ఫోన్‌ను కేవలం రూ.1,499 ధరకే అందిస్తూ, దానితో పాటు ఆరు నెలల పాటు ఎలాంటి రీఛార్జ్ టెన్షన్ లేకుండా కాంప్లిమెంటరీ సర్వీసెస్ ఇస్తున్నారు. పండుగ సీజన్‌ను దృష్టిలో ఉంచుకుని పరిమిత కాలం పాటు మాత్రమే ఈ ఆఫర్ అందుబాటులో ఉంటుందని కంపెనీ స్పష్టం చేసింది.
రూ.1499 ప్యాకేజీలో లభించే ప్రయోజనాలు ఏమిటి?
ఈ వార్షికోత్సర ఆఫర్ కింద అర్హత కలిగిన జియోభారత్ 4G ఫోన్‌ను రూ.1,499 చెల్లించి కొనుగోలు చేయవచ్చు. ఈ ప్యాకేజీ ధరలోనే ఆరు నెలల పాటు వాడుకోవడానికి అవసరమైన కనెక్టివిటీ ప్రయోజనాలు ముందుగానే చేర్చబడి ఉంటాయి. వినియోగదారులకు ప్రతి నెలా 14 జీబీ హైస్పీడ్ డేటా లభిస్తుంది. దీనితో పాటు ఏ నెట్‌వర్క్‌కైనా అన్లిమిటెడ్ హెచ్‌డీ వాయిస్ కాలింగ్ సదుపాయం ఉచితంగా లభిస్తుంది. అయితే జియోభారత్ లైనప్‌లో ఏయే నిర్దిష్ట మోడళ్లు ఈ ఆఫర్ పరిధిలోకి వస్తాయనే పూర్తి వివరాలను కంపెనీ త్వరలో స్పష్టం చేయనుంది.
2G నుంచి 4Gకి మారే ఖర్చు భారం తగ్గింపు
సాధారణంగా ప్రతి నెలా చిన్న రీఛార్జ్‌ల కోసం రూ.199 చొప్పున ఖర్చు చేసే 2G వినియోగదారుడు ఆరు నెలల్లో సుమారు రూ.1,200 వరకు వెచ్చిస్తుంటాడు. ఈ సరికొత్త ఆఫర్‌లో ఫోన్ ధరతో పాటు ఆరు నెలల రీఛార్జ్ కలిసి ఉండటం వల్ల వినియోగదారులకు భారీగా ఆదా అవుతుంది. రీఛార్జ్ ఖర్చులను మినహాయించి చూస్తే ఈ 4G ఫోన్ కేవలం రూ.299కే దక్కినట్లవుతుందని కంపెనీ చెబుతోంది. తక్కువ బడ్జెట్‌లో అత్యాధునిక డిజిటల్ సేవలను అనుభవించాలనుకునేవారికి ఇది ఎంతో ఉపయోగకరంగా ఉంటుంది.
జియోభారత్ ఫోన్ ప్రత్యేక ఫీచర్లు, డిజిటల్ సేవలు
ఈ ఫోన్‌లో కేవలం కాలింగ్, డేటా సౌకర్యమే కాకుండా జియో డిజిటల్ ఎంటర్‌టైన్‌మెంట్ యాప్స్ యాక్సెస్ కూడా లభిస్తుంది. వినోదం కోసం జియోటీవీ ద్వారా 500కు పైగా లైవ్ టీవీ ఛానెళ్లను వీక్షించవచ్చు. అలాగే జియోహాట్‌స్టార్ ద్వారా లైవ్ క్రికెట్ మ్యాచ్‌లు, సినిమాలు, విభిన్న షోలను ఆస్వాదించవచ్చు. డిజిటల్ చెల్లింపుల కోసం జియోపే యూపీఐ ఫీచర్ కూడా ఇందులో పొందుపరిచారు. భద్రత కోసం జియో సేఫ్టీ షీల్డ్ అందించడం ద్వారా సురక్షిత కాలింగ్, లొకేషన్ ట్రాకింగ్ వంటి రక్షణ ఏర్పాట్లు కల్పించారు.
ఫోన్ టెక్నికల్ స్పెసిఫికేషన్స్ విశేషాలు
ఈ జియోభారత్ ఫోన్ సుమారు 2.4 అంగుళాల డిస్‌‌ప్లే స్క్రీన్, 2,000 ఎంఏహెచ్ బలమైన బ్యాటరీ సామర్థ్యంతో వస్తుంది. అలాగే వేగవంతమైన కనెక్టివిటీ కోసం 4G సపోర్ట్ లభిస్తుంది. మార్కెట్లో అందుబాటులో ఉన్న జియోభారత్ B1, B2 మోడళ్ల ఫీచర్లతో ఇవి సరిపోలుతున్నాయి. కుటుంబంలో పెద్దల కోసం లేదా రెండవ ఫోన్‌గా వాడటానికి ఎంతో సౌకర్యంగా ఉండే ఈ పరిమిత కాల ఆఫర్‌ను వినియోగదారులు సద్వినియోగం చేసుకోవాలని సూచిస్తున్నారు.