Meesho : త్వరలో ఆ ఈ కామర్స్ కంపెనీలో 12లక్షలకు పైగా ఉద్యోగాలు

Meesho : భారతదేశంలో పండుగ సీజన్ మొదలైంది. ఈ సమయంలో వినియోగదారుల కొనుగోళ్లు భారీగా పెరుగుతాయి. ఈ డిమాండ్‌ను దృష్టిలో పెట్టుకుని, ప్రముఖ ఈ-కామర్స్ కంపెనీ మీషో ఒక కీలకమైన నిర్ణయం తీసుకుంది. తమ సెల్లర్, లాజిస్టిక్స్ నెట్‌వర్క్‌లో 12 లక్షలకు పైగా సీజనల్ ఉద్యోగాలను కల్పించనున్నట్లు మీషో ప్రకటించింది. ఇది గత సంవత్సరం కన్నా 40% అధికం.

మీషో తీసుకున్న ఈ నిర్ణయం వెనుక ఒక ప్రత్యేకమైన కారణం ఉంది. ఈ 12 లక్షల ఉద్యోగాలలో 70% కంటే ఎక్కువ అవకాశాలు దేశంలోని చిన్న పట్టణాలైన టైర్-3, టైర్-4 ప్రాంతాల వారికి లభించనున్నాయి. మీషో అధికారులు తెలిపిన వివరాల ప్రకారం, ఈ పండుగ సీజన్ కోసం సుమారు 5.5 లక్షల తాత్కాలిక ఉద్యోగులను ఇప్పటికే మీషో సెల్లర్లు నియమించుకున్నారు. ఈ ఉద్యోగులకు వస్తువులను ప్యాకేజింగ్ చేయడం, ఉత్పత్తులను తయారు చేయడం, విభజించడం వంటి పనులపై శిక్షణ కూడా ఇస్తున్నారు.

బిజినెస్ స్టాండర్డ్స్ నివేదిక ప్రకారం, మీషో అధికారి సౌరభ్ పాండే ఈసారి టైర్-3, టైర్-4 పట్టణాల నుంచి ఉద్యోగావకాశాలు భారీగా పెరుగుతాయని తెలిపారు. తమ సంస్థ ఈ-కామర్స్‌ను ప్రతి ఒక్కరికీ అందుబాటులోకి తీసుకురావాలని లక్ష్యంగా పెట్టుకుందని, అందుకే చిన్న పట్టణాల వ్యాపారులు, తయారీదారులు, లాజిస్టిక్స్ భాగస్వాములకు ప్రోత్సాహం ఇస్తున్నామని చెప్పారు. ఇందుకోసం మీషో పలు థర్డ్-పార్టీ లాజిస్టిక్స్ కంపెనీలతో భాగస్వామ్యం కుదుర్చుకుంది.

మీషో మాత్రమే కాకుండా, ఇతర ఈ-కామర్స్ దిగ్గజాలు కూడా పండుగ సీజన్ కోసం సిద్ధమవుతున్నాయి.

ఫ్లిప్‌కార్ట్ : ఈ పండుగ సీజన్ కోసం తమ వేర్‌హౌసింగ్, లాజిస్టిక్స్, డెలివరీ విభాగాల్లో 2.2 లక్షలకు పైగా తాత్కాలిక ఉద్యోగాలు కల్పించింది. ఇందులో దివ్యాంగులకు, ప్రత్యేక గ్రూపుల వారికి కూడా అవకాశాలు ఇచ్చింది.

అమెజాన్ ఇండియా: ఈ సంవత్సరం 1,50,000కు పైగా తాత్కాలిక ఉద్యోగాలు ప్రకటించింది. దీనితో పాటు, దేశంలో తమ మౌలిక సదుపాయాలను మెరుగుపరచడానికి రూ.2,000 కోట్లకు పైగా పెట్టుబడి పెట్టింది. కొత్తగా ఢిల్లీ-ఎన్‌సీఆర్, ఇండోర్, భువనేశ్వర్, కొచ్చి, రాజ్‌పురా వంటి నగరాల్లో ఐదు కొత్త ఫుల్‌ఫిల్మెంట్ సెంటర్లను కూడా ప్రారంభించింది.

ఈ-కామర్స్ కంపెనీల ఈ ప్రయత్నాలు పట్టణ ప్రాంతాలలోనే కాకుండా, చిన్న పట్టణాలలో కూడా వేలాది మందికి ఉపాధిని కల్పిస్తున్నాయి. ఈ పండుగ సీజన్‌లో వినియోగదారులకు సేవలు అందించడమే కాకుండా, లక్షలాది కుటుంబాలకు ఆర్థిక సహాయం అందించడానికి ఈ ఉద్యోగాలు ఉపయోగపడతాయి.