Microsoft : మైక్రోసాఫ్ట్ సీరియస్ వార్నింగ్.. 21లోగా అమెరికాకు రండి.. లేదంటే..

Microsoft : అమెరికా అధ్యక్షుడు డొనాల్డ్ ట్రంప్ కొత్తగా జారీ చేసిన వీసా నిబంధనలు అమెరికాలో పనిచేస్తున్న వేలాది మంది భారతీయ ఉద్యోగులకు, పెద్ద టెక్ కంపెనీలకు ఆందోళన కలిగించాయి. ఈ కొత్త ఆదేశం ప్రకారం హెచ్-1బీ వీసా దరఖాస్తుదారులకు $100,000 (సుమారు రూ. 88 లక్షలు) అదనపు ఫీజు వర్తిస్తుంది. ఈ నిబంధన సెప్టెంబర్ 21 నుంచి అమలులోకి రానుంది. ఈ నిర్ణయంపై ప్రముఖ టెక్ కంపెనీలైన మైక్రోసాఫ్ట్, జేపీ మోర్గాన్ స్పందించాయి.

మైక్రోసాఫ్ట్ నుండి ఉద్యోగులకు ఆదేశాలు

ట్రంప్ కొత్త వీసా నిబంధనల నేపథ్యంలో మైక్రోసాఫ్ట్ తన హెచ్-1బీ, హెచ్-4 వీసా కలిగిన ఉద్యోగులకు ఒక అత్యవసర ఈమెయిల్ పంపింది. ఆ ఈమెయిల్‌లో వారు సెప్టెంబర్ 21 లోగా అమెరికాకు తిరిగి రావాలని సూచించింది. ఆ తేదీ తర్వాత అమెరికాలో ప్రవేశించడానికి అదనపు ఫీజు చెల్లించాల్సి ఉంటుందని హెచ్చరించింది. అంతేకాకుండా, భవిష్యత్తులో కూడా వీసాదారులందరూ అంతర్జాతీయ ప్రయాణాలు మానుకోవాలని కోరింది.

ఈ చర్య ద్వారా, మైక్రోసాఫ్ట్ తన ఉద్యోగులను ఆర్థిక భారం నుంచి కాపాడాలని చూస్తోంది. ఒకవేళ ఉద్యోగులు సెప్టెంబర్ 21లోగా అమెరికాకు తిరిగి రాకపోతే, వారికి 100,000డాలర్ల ఎక్స్ ట్రా ఫీజు వర్తిస్తుంది.

ట్రంప్ కొత్త వీసా నిబంధనలు

అమెరికా అధ్యక్షుడు డొనాల్డ్ ట్రంప్ సెప్టెంబర్ 21న జారీ చేసిన ఒక కొత్త ఆదేశం ప్రకారం, హెచ్-1బీ వీసాదారులకు 100,000డాలర్లు ఎక్స్ ట్రా ఫీజు తప్పనిసరి. ఈ ఫీజు చెల్లించని వారికి అమెరికాలో ప్రవేశం ఉండదు.

ట్రంప్ తన ఈ నిర్ణయాన్ని సమర్థిస్తూ, హెచ్-1బీ వీసా కార్యక్రమం దుర్వినియోగం అవుతోందని, దీనివల్ల అమెరికన్ కార్మికులు తక్కువ జీతాలు తీసుకునే విదేశీయుల చేత భర్తీ చేయబడుతున్నారని ఆరోపించారు. ఈ కార్యక్రమం ఒక జాతీయ భద్రతకు ముప్పు అని కూడా పేర్కొన్నారు. ఈ కొత్త ఫీజు, కేవలం ఉన్నత నైపుణ్యాలు ఉన్నవారిని మాత్రమే అమెరికాలోకి తీసుకువచ్చే ఉద్దేశంతో ప్రవేశపెట్టబడిందని ట్రంప్ వివరించారు.

హెచ్-1బీ, హెచ్-4 వీసాలు అంటే ఏమిటి?

హెచ్-1బీ వీసా: ఇది ఒక నాన్-ఇమ్మిగ్రెంట్ వీసా. దీని ద్వారా సైన్స్, టెక్నాలజీ, ఇంజినీరింగ్, గణితం (STEM) వంటి ఉన్నత నైపుణ్యాలు కలిగిన విదేశీ నిపుణులు అమెరికాలో పని చేయడానికి అనుమతి పొందుతారు. ఈ వీసా సాధారణంగా 3 సంవత్సరాల వరకు చెల్లుబాటు అవుతుంది. ఒక యజమాని ద్వారా స్పాన్సర్ చేయబడుతుంది.

హెచ్-4 వీసా: ఈ వీసా హెచ్-1బీ వీసా హోల్డర్ కుటుంబ సభ్యులకు (భార్య/భర్త , మైనర్ పిల్లలు) అమెరికాలో నివసించడానికి అనుమతి ఇస్తుంది. గతంలో హెచ్-4 వీసాదారులకు పని చేసే అవకాశం ఉండేది కాదు. అయితే ఇప్పుడు కొన్ని పరిస్థితులలో, వారి జీవిత భాగస్వామి గ్రీన్ కార్డ్ ప్రాసెస్ చేస్తుంటే, వీరికి కూడా పని చేయడానికి అనుమతి లభించవచ్చు.