Pakistan Crisis: తీవ్ర సంక్షోభంలో పాకిస్తాన్.. ప్రతి ముగ్గురిలో ఒకరు నిరుద్యోగులే

Pakistan Crisis: పాకిస్తాన్‌లో నిరుద్యోగ సంక్షోభం దేశ చరిత్రలోనే అత్యంత గరిష్ట స్థాయికి చేరుకుంది. ఇటీవల విడుదలైన పాకిస్తాన్ మొట్టమొదటి డిజిటల్ జనాభా లెక్కల నివేదిక దేశంలోని దయనీయ పరిస్థితిని కళ్లకు కట్టింది. 24 కోట్లకు పైగా జనాభా ఉన్న పాకిస్తాన్‌లో దాదాపు కోటి 87 లక్షల మంది యువత నిరుద్యోగులుగా ఉన్నారు. అంటే, ప్రతి ముగ్గురు యువకుల్లో ఒకరు ఉద్యోగం కోసం చూస్తున్నా లేదా ఆశ వదులుకున్నాడని అర్థం. మొత్తం నిరుద్యోగిత రేటు 7.8 శాతాన్ని దాటింది. దేశ ఆర్థిక వ్యవస్థ ఎంత బలహీనంగా ఉందో ఈ గణాంకాలు స్పష్టంగా చూపుతున్నాయి.

పాకిస్తాన్‌లో నిరుద్యోగం తీవ్ర స్థాయికి చేరుకుంది. దేశ జనాభాలో అత్యంత ముఖ్యమైన యువతరం తీవ్ర నిరాశలో ఉంది. పాకిస్తాన్ అబ్జర్వర్ నివేదిక ప్రకారం.. 15 నుంచి 35 సంవత్సరాల మధ్య వయస్సున్న దాదాపు కోటి 87 లక్షల మంది యువత నిరుద్యోగులుగా ఉన్నారు. ఇది మొత్తం నిరుద్యోగిత రేటు 7.8% దాటడానికి దారితీసింది. 15 నుంచి 35 సంవత్సరాల మధ్య ఉన్న యువతలో దాదాపు మూడింట ఒక వంతు మంది NEET (Not in Education, Employment or Training) వర్గానికి చెందినవారుగా ఉన్నారు. అంటే, వీరు విద్య, శిక్షణ లేదా ఉపాధిలో దేనిలోనూ లేరు. ఈ వర్గం క్రమంగా సమాజం, వ్యవస్థ నుంచి దూరమవుతోందని నివేదికలు ఆందోళన వ్యక్తం చేస్తున్నాయి.

దేశంలో 17 కోట్ల మందికి పైగా పనిచేయగల వయస్సు ఉన్నవారు ఉన్నప్పటికీ, వారిలో దాదాపు 11% మందికి ఎలాంటి ఉపాధి లేదు. పాకిస్తాన్‌లో మహిళా శ్రామిక శక్తి భాగస్వామ్యం చాలా తక్కువగా ఉంది. ఈ నిరుద్యోగ సంక్షోభంలో మహిళల పరిస్థితి మరింత ఆందోళనకరంగా ఉంది. ఉద్యోగం చేయాలని ఆసక్తి ఉన్న చాలా మంది మహిళలకు కూడా సురక్షితమైన వాతావరణం లేకపోవడం ఒక పెద్ద సమస్యగా మారింది. ఉపాధి పొందిన మహిళలు కూడా ఎక్కువగా అసంఘటిత రంగంలో లేదా ఇంటి పనులలో నిమగ్నమై ఉన్నారు. మహిళల తక్కువ ఉపాధి రేటు దేశ ఆర్థిక వ్యవస్థకు పెను సవాలుగా మారింది.

పాకిస్తాన్‌లో నిరుద్యోగం ఇంతలా పెరగడానికి ప్రధాన కారణాలలో ఒకటి, దేశంలోని పాతబడిన విద్యా వ్యవస్థ. పాఠశాలలు, కళాశాలల్లో ఉద్యోగ కల్పనకు అవసరమైన నైపుణ్యాలను అందించడం లేదు. వృత్తిపరమైన శిక్షణ, ఆధునిక సాంకేతిక విద్య అందుబాటులో లేకపోవడం వల్ల యువత ఉద్యోగాలకు అనర్హులుగా మారుతున్నారు. విద్యావంతులైన యువత సైతం పరిమిత అవకాశాలు, అధిక పోటీ ఉన్న ప్రభుత్వ ఉద్యోగాల వైపు మాత్రమే మొగ్గు చూపడం వల్ల నిర్మాణపరమైన నిరుద్యోగం నిరంతరం పెరుగుతోంది.

ప్రకృతి విపత్తులు, ఆర్థిక సంక్షోభం పాకిస్తాన్ ఆర్థిక వ్యవస్థ నడ్డి విరిచాయి. 2022 నుంచి 2025 మధ్య సంభవించిన వరదలు పాకిస్తాన్ ఆర్థిక వ్యవస్థకు తీవ్ర నష్టాన్ని కలిగించాయి. దీని వల్ల లక్షలాది మంది ప్రజలు పేదరికంలోకి నెట్టివేయబడ్డారు. అధిక ద్రవ్యోల్బణం, విదేశీ మారక ద్రవ్య సంక్షోభం, బలహీనమైన పారిశ్రామిక విధానాలు చిన్న వ్యాపారాలను నాశనం చేశాయి. ప్రస్తుతం దేశంలో ఉపాధి రేటు కేవలం 52 శాతానికి పడిపోయింది. అంటే, సగానికి పైగా జనాభా నిరుద్యోగులుగా ఉన్నారు లేదా వారి సామర్థ్యం కంటే తక్కువ స్థాయిలో పనిచేస్తున్నారు.