Post Office Scheme: పోస్టాఫీసు ధమాకా స్కీమ్..నెలనెలా రూ. 5500.. 5 ఏళ్ల తర్వాత మొత్తం డబ్బు వెనక్కి!

Post Office Scheme: మధ్యతరగతి కుటుంబాలు తమ కష్టార్జితాన్ని కాస్త కాస్త పెంచుకోవాలని కోరుకుంటారు. అలాంటి వారికి పోస్టాఫీస్ పథకాలు ఎప్పుడూ మంచి ఆప్షన్ గా నిలుస్తాయి. పోస్ట్ ఆఫీస్ అందించే అద్భుతమైన పథకాల్లో ఒకటి పోస్ట్ ఆఫీస్ మంత్లీ ఇన్‌కం స్కీమ్ (POMIS). ఈ పథకంలో పెట్టుబడి పెడితే, నెలనెలా గ్యారెంటీ ఆదాయం వస్తుంది, ఐదేళ్ల తర్వాత మీ పెట్టుబడి మొత్తం కూడా తిరిగి వచ్చేస్తుంది.

పీఓఎంఐఎస్ అనేది పోస్ట్ ఆఫీస్ ద్వారా నడిచే ఒక పథకం. ఇందులో పెట్టుబడి పెడితే, మీరు పెట్టిన డబ్బుపై ప్రతి నెలా గ్యారెంటీగా వడ్డీ వస్తుంది. ఈ పథకం ముఖ్య లక్షణం ఏమిటంటే, ఇందులో వార్షిక వడ్డీ రేటు 7.4% ఉంటుంది. ఈ వడ్డీని నెలవారీగా మీ అకౌంట్‌లో జమ చేస్తారు. ప్రతి నెలా ఒక నిర్దిష్ట ఆదాయం కావాలనుకునే వారికి, అలాగే తమ డబ్బును సురక్షితంగా ఉంచుకోవాలనుకునే వారికి ఈ పథకం చాలా అనుకూలంగా ఉంటుంది. ఈ పథకంలో కనీసం రూ.1,000 నుంచి పెట్టుబడి పెట్టవచ్చు. సింగిల్ అకౌంట్ అయితే గరిష్టంగా రూ.9 లక్షల వరకు, జాయింట్ అకౌంట్ అయితే రూ.15 లక్షల వరకు పెట్టుబడి పెట్టవచ్చు.

ఈ పథకంలో గరిష్టంగా సింగిల్ అకౌంట్ కింద రూ.9 లక్షలు పెట్టుబడి పెడితే ప్రతి నెలా దాదాపు రూ.5,500 గ్యారెంటీగా ఆదాయం వస్తుంది. ఈ డబ్బు నేరుగా మీ అకౌంట్‌లోకి వస్తుంది, ఇందులో ఎలాంటి రిస్క్ ఉండదు. ఒకవేళ మీరు జాయింట్ అకౌంట్ తెరిచి రూ.15 లక్షలు పెట్టుబడి పెడితే, ప్రతి నెలా దాదాపు రూ.9,250 స్థిరమైన ఆదాయం వస్తుంది. ఈ వడ్డీని మీరు నెల, మూడు నెలలు, ఆరు నెలలు లేదా సంవత్సరానికి ఒకసారి కూడా తీసుకోవచ్చు.

పీఓఎంఐఎస్ పథకం కాలపరిమితి 5 సంవత్సరాలు. అకౌంట్ ఓపెన్ చేసిన నెల రోజుల తర్వాత నుంచే నెలవారీ వడ్డీ రావడం మొదలవుతుంది. ఐదేళ్లు పూర్తయిన తర్వాత పెట్టుబడిగా పెట్టిన మొత్తం డబ్బు ఎలాంటి కోతలు లేకుండా మీకు తిరిగి లభిస్తుంది. అంటే, ఐదేళ్ల పాటు ప్రతి నెలా ఆదాయం పొందడంతో పాటు, చివర్లో మీ అసలు మొత్తం కూడా సురక్షితంగా వెనక్కి వస్తుంది. పెన్షన్ పొందే వారికి, లేదా వేరే ఆదాయ మార్గాలు లేని వారికి ఇది ఒక మంచి ఆర్థిక భరోసాను ఇస్తుంది.