Post Office : ఇక్కడ బ్యాంకు కంటే ఎక్కువ వడ్డీ.. కేవలం రూ.500తో వెంటనే అకౌంట్ ఓపెన్ చేయండి

Post Office : ప్రస్తుతం ప్రతి ఒక్కరికీ పొదుపు ఖాతా ఉండటం తప్పనిసరి. బ్యాంకింగ్ సేవలు, ప్రభుత్వ పథకాల ప్రయోజనాలను పొందడానికి ఇది చాలా ముఖ్యం. అయితే, పోస్ట్ ఆఫీస్ పొదుపు పథకాలు కొన్నిసార్లు బ్యాంకుల కంటే మంచి ఆప్షన్. పోస్ట్ ఆఫీస్‌లో కేవలం రూ.500తో ఖాతా తెరవొచ్చు. అయితే, చాలా బ్యాంకులలో దీని కంటే ఎక్కువ కనీస మొత్తం అవసరం. పోస్ట్ ఆఫీస్ పొదుపు ఖాతా మీకు ఎలా లాభదాయకమో వివరంగా తెలుసుకుందాం.

ప్రస్తుతం పోస్టాఫీసు సేవింగ్స్ అకౌంట్‌పై ఏటా 4% వడ్డీ లభిస్తోంది. ఇది సాధారణ ప్రభుత్వ, ప్రైవేట్ బ్యాంకుల కంటే చాలా ఎక్కువ. ఉదాహరణకు, ఎస్​బీఐ, పీఎన్​బీ వంటి ప్రభుత్వ బ్యాంకులు 2.70% వడ్డీని ఇస్తే, హెచ్‌డీఎఫ్‌సీ, ఐసీఐసీఐ వంటి ప్రైవేట్ బ్యాంకులు 3% నుండి 3.50% మధ్య వడ్డీని ఇస్తాయి. పోస్ట్ ఆఫీస్‌లో కేవలం రూ.500తో ఖాతా తెరవొచ్చు, కానీ ప్రభుత్వ బ్యాంకుల్లో రూ.1000 నుండి రూ.3000 వరకు, ప్రైవేట్ బ్యాంకుల్లో రూ.10,000 వరకు కనీస బ్యాలెన్స్ ఉంచాల్సి ఉంటుంది. తక్కువ కనీస మొత్తం, మంచి వడ్డీ రేటు కారణంగా పోస్టాఫీస్ అకౌంట్ యువత, చిన్న పెట్టుబడిదారులకు అనుకూలమైనది.

పోస్టాఫీస్ సేవింగ్స్ అకౌంట్ తెరిస్తే మీకు చెక్ బుక్, ఏటీఎం కార్డు, ఈ-బ్యాంకింగ్, మొబైల్ బ్యాంకింగ్ వంటి అన్ని సేవలు లభిస్తాయి. దీంతోపాటు ఆధార్ కార్డును అకౌంట్‌కు లింక్ చేసి ప్రభుత్వ పథకాల ప్రయోజనాలను పొందవచ్చు. అందువల్ల పోస్టాఫీస్ ఖాతా కేవలం పొదుపు సాధనం మాత్రమే కాదు, డిజిటల్ బ్యాంకింగ్ సేవలను కూడా అందిస్తుంది.

ఆదాయపు పన్ను చట్టంలోని సెక్షన్ 80టీటీఏ కింద, పోస్ట్ ఆఫీస్ సేవింగ్స్ అకౌంట్‌పై లభించే వడ్డీకి రూ.10,000 వరకు పన్ను మినహాయింపు ఉంటుంది. అంటే మీరు ఈ వడ్డీ ఆదాయంపై పన్ను చెల్లించాల్సిన అవసరం లేదు. ఇది మీ పొదుపును మరింత లాభదాయకంగా చేస్తుంది. అంతేకాకుండా, పోస్టాఫీస్ భారత ప్రభుత్వం ద్వారా నడుస్తుంది కాబట్టి ఇది సురక్షితమైంది. బ్యాంకింగ్ మోసాలు లేదా డిఫాల్ట్ అయ్యే భయం ఇక్కడ చాలా తక్కువగా ఉంటుంది. పోస్ట్ ఆఫీస్ సేవింగ్స్ అకౌంట్‌ను ఏ వయోజనుడైనా తెరవవచ్చు. దీనితో పాటు ఇద్దరు వ్యక్తులు జాయింట్ అకౌంట్ కూడా తెరవవచ్చు. 18 ఏళ్లలోపు పిల్లల కోసం వారి తల్లిదండ్రులు లేదా సంరక్షకులు ఖాతాను తెరవడం సాధ్యమే.