Gold Price : ట్రంప్ దెబ్బకు తలకిందులైన మార్కెట్..బంగారం లక్షన్నర..వెండి 3 లక్షలు

Gold Price : బంగారం, వెండి ధరలు ఇప్పుడు సామాన్యులకు అందనంత ఎత్తుకు చేరుకున్నాయి. గతంలో ఎన్నడూ లేని విధంగా వెండి ధరలు దేశ రాజధాని ఢిల్లీలో ఏకంగా 3 లక్షల మార్కును దాటేసి కొత్త రికార్డు సృష్టించాయి. అటు బంగారం కూడా లక్షన్నర దిశగా పరుగులు తీస్తోంది. అంతర్జాతీయ మార్కెట్లో నెలకొన్న ఉద్రిక్తతలు, అమెరికా అధ్యక్షుడు డొనాల్డ్ ట్రంప్ తీసుకుంటున్న ఆర్థిక నిర్ణయాల నేపథ్యంలో మదుపర్లు సురక్షితమైన పెట్టుబడిగా భావించే పసిడి, వెండి వైపు మళ్లుతున్నారు. దీంతో ధరలు ఆకాశమే హద్దుగా పెరుగుతున్నాయి.

దేశ రాజధాని ఢిల్లీలో వెండి ధరలు సోమవారం ఊహించని విధంగా పెరిగాయి. కిలో వెండి ధర ఒకే రోజు రూ.10,000 పెరిగి రూ. 3,02,600 వద్ద రికార్డు స్థాయికి చేరుకుంది. కేవలం జనవరి నెలలోనే వెండి ధర ఏకంగా రూ.63,000 కంటే ఎక్కువ పెరగడం గమనార్హం. గత ఏడాది డిసెంబర్ 31న రూ.2,39,000గా ఉన్న వెండి ధర, కేవలం 20 రోజుల్లోనే 27 శాతం వృద్ధిని నమోదు చేసింది. అంతర్జాతీయ మార్కెట్లో కూడా వెండి ధర ఔన్సు‌కు 93 డాలర్ల మార్కును దాటడంతో స్థానిక మార్కెట్లలో ఈ ప్రభావం స్పష్టంగా కనిపిస్తోంది. సాధారణంగా పరిశ్రమల్లో వెండి వినియోగం పెరగడం, మదుపర్లు వెండిపై ఆసక్తి చూపడం ఈ పెరుగుదలకు కారణమవుతోంది.

వెండితో పోటీ పడుతూ బంగారం కూడా సరికొత్త రికార్డులను సృష్టిస్తోంది. ఢిల్లీలో 10 గ్రాముల బంగారం ధర రూ. 1,900 పెరిగి రూ.1,48,100 (అన్ని పన్నులతో కలిపి) వద్ద ముగిసింది. ఇది ఆల్ టైమ్ హై రికార్డ్. గత శుక్రవారం రూ.1,46,200 వద్ద ఉన్న ధర సోమవారం నాటికి భారీగా పెరిగింది. ఈ ఒక్క జనవరి నెలలోనే బంగారం ధర సుమారు 6.55 శాతం పెరిగింది. విశ్లేషకుల అంచనా ప్రకారం, రానున్న కొద్ది రోజుల్లోనే బంగారం ధర రూ.1.5 లక్షల మార్కును సులభంగా దాటే అవకాశం ఉంది. పెళ్లిళ్ల సీజన్ కావడంతో ఈ ధరల పెరుగుదల సామాన్యుల జేబులకు చిల్లు పెడుతోంది.

బంగారం, వెండి ధరలు ఇంతలా పెరగడానికి ప్రధాన కారణం అమెరికా అధ్యక్షుడు డొనాల్డ్ ట్రంప్ తీసుకుంటున్న టారిఫ్ నిర్ణయాలే. వివిధ దేశాల దిగుమతులపై ట్రంప్ పన్నులు విధిస్తుండటంతో ప్రపంచ ఆర్థిక వ్యవస్థలో అస్థిరత ఏర్పడుతుందనే భయం ఇన్వెస్టర్లలో మొదలైంది. షేర్ మార్కెట్లలో అనిశ్చితి నెలకొన్నప్పుడు ఇన్వెస్టర్లు ఎప్పుడూ సేఫ్ హెవెన్(సురక్షితమైన పెట్టుబడి)గా భావించే బంగారం, వెండి పైనే పెట్టుబడులు పెడతారు. అందుకే గిరాకీ పెరిగి ధరలు కూడా అదుపు లేకుండా పెరుగుతున్నాయి. భవిష్యత్తులో కూడా ఇవి మరింత పెరిగే సూచనలే కనిపిస్తున్నాయని మార్కెట్ నిపుణులు చెబుతున్నారు.

మల్టీ కమోడిటీ ఎక్స్ఛేంజ్‎లో కూడా బంగారం, వెండి ధరలు పరుగులు పెడుతున్నాయి. సోమవారం ట్రేడింగ్ సెషన్‌లో వెండి ధర ఏకంగా రూ.16,438 పెరిగి కిలో రూ.3,04,200 వద్ద ట్రేడ్ అయింది. సాయంత్రం వేళకు కొంత తగ్గినప్పటికీ రూ. 3,03,471 వద్ద స్థిరంగా కొనసాగింది. అటు బంగారం కూడా ఎంసీఎక్స్‌లో రూ.2,983 పెరిగి 10 గ్రాములు రూ.1,45,500 వద్ద సరికొత్త రికార్డును నమోదు చేసింది. సామాన్యులు ఇప్పుడు ఒక తులం బంగారం కొనాలంటే లక్షన్నర సిద్ధం చేసుకోవాల్సిన పరిస్థితి ఏర్పడింది. వెండి పట్టీలు లేదా గొలుసులు కొనాలన్నా వేలల్లో ఖర్చవుతోంది.