GST : సిగరెట్‌కు 'సిన్ టాక్స్'.. మందుబాబులకు టాక్స్ టెన్షన్ లేదా? అసలు కథ ఇదీ!

GST : కేంద్ర ప్రభుత్వం జీఎస్టీ 2.0 విధానాన్ని అమలు చేస్తోంది. ఈ కొత్త విధానంలో 12%, 28% జీఎస్టీ రేట్లను రద్దు చేశారు. గతంలో 28% జీఎస్టీతో పాటు, విలాసవంతమైన లేదా ఆరోగ్యానికి హాని కలిగించే వస్తువులపై అదనంగా కాంపెన్సేషన్ సెస్ విధించేవారు. ఇప్పుడు ఆ సెస్​ను తొలగించి, వాటిపై 40% సిన్ టాక్స్ విధించారు. సిగరెట్లు వంటి పొగాకు ఉత్పత్తులు ఈ సిన్ గూడ్స్ కిందకి వస్తాయి. కాబట్టి వాటిపై 40% పన్ను పడుతుంది. కానీ, ఈ జాబితాలో మద్యం ఎందుకు లేదో మీరు గమనించారా? దీనికి ఒక బలమైన కారణం ఉంది.

సిన్ టాక్స్ వర్తించే వస్తువులు

ఆరోగ్యానికి హాని కలిగించే వస్తువులు, అవసరం లేని విలాసవంతమైన వస్తువులను సిన్ గూడ్స్ లేదా పాపపు వస్తువులుగా వర్గీకరించారు. వీటిపై అత్యధిక జీఎస్టీ విధించేవారు. కొత్త విధానం ప్రకారం, వీటిపై ప్రత్యేకంగా 40% సిన్ టాక్స్ ఉంటుంది. ఆ సిన్ గూడ్స్ జాబితా ఇదే

* 350 సీసీ కంటే ఎక్కువ ఇంజిన్ సామర్థ్యం ఉన్న బైకులు

* 1,200 సీసీ ఇంజిన్ లేదా 4 మీటర్ల పొడవు కంటే ఎక్కువ ఉన్న కార్లు

* కోలా, స్ప్రైట్, ఫాంటా వంటి కార్బోనేటెడ్ వాటర్, పండ్ల రసాలు

* సిగరెట్లు, సిగార్లు, పాన్ మసాల వంటి పొగాకు ఉత్పత్తులు

* ఐపీఎల్ క్రికెట్, క్యాసినో, రేస్ క్లబ్, బెట్టింగ్, లాటరీ వంటి వినోదం, జూదం

మద్యంపై ఎందుకు సిన్ టాక్స్ లేదు?

మద్యం ఉత్పత్తులపై సిన్ టాక్స్ విధించలేదు. అసలు, ఈ ఆల్కహాల్ డ్రింక్స్ జీఎస్టీ పరిధిలోనే లేవు. జీఎస్టీ అమలులోకి వచ్చినప్పటి నుంచి కూడా ఆల్కహాల్‌పై జీఎస్టీ విధించలేదు. దీనికి ప్రధాన కారణం, మద్యం రాష్ట్ర ప్రభుత్వాలకు ప్రధాన ఆదాయ వనరు కావడం. మద్యంపై జీఎస్టీకి బదులుగా ఎక్సైజ్ సుంకం విధిస్తారు. ఇది రాష్ట్ర ప్రభుత్వాలకు ఉన్న అధికారం. రాష్ట్ర ప్రభుత్వాలు మద్యం ఉత్పత్తులపై ఎక్సైజ్ సుంకమే కాకుండా, వ్యాట్ వంటి ఇతర పన్నులను కూడా విధించవచ్చు. అందుకే చాలా రాష్ట్ర ప్రభుత్వాలకు మద్యం ద్వారా వచ్చే పన్నులే ప్రధాన ఆదాయ వనరుగా ఉంటాయి. ఈ కారణం వల్లనే కేంద్ర ప్రభుత్వం మద్యాన్ని జీఎస్టీ పరిధిలోకి తీసుకురావడానికి ప్రయత్నించలేదు. ఇప్పటివరకు ఏ రాష్ట్ర ప్రభుత్వం కూడా ఈ విషయంలో ఎటువంటి ప్రతిపాదన చేయలేదు.