TCS : ఉద్యోగుల తొలగింపు వివాదాల మధ్య టీసీఎస్ సంచలన ప్రకటన.. ఆ దేశంలో 5,000 కొత్త ఉద్యోగాలు

TCS : ప్రపంచవ్యాప్తంగా ఐటీ రంగంలో ఉద్యోగుల తొలగింపు వార్తలు వినిపిస్తున్న నేపథ్యంలో భారతదేశపు అతిపెద్ద ఐటీ సేవల సంస్థ టాటా కన్సల్టెన్సీ సర్వీసెస్ (టీసీఎస్) ఒక భారీ ప్రకటన చేసింది. రాబోయే మూడు సంవత్సరాలలో యునైటెడ్ కింగ్‌డమ్ (యూకే) లో ఏకంగా 5,000 కొత్త ఉద్యోగాలు కల్పించనున్నట్లు టీసీఎస్ ప్రకటించింది. ఈ నిర్ణయం బ్రిటన్ ఆర్థిక వ్యవస్థకు మరింత బలాన్ని ఇవ్వనుంది. లండన్‌లో ఆర్టిఫిషియల్ ఇంటెలిజెన్స్ (AI) ఎక్స్‌పీరియన్స్ జోన్, డిజైన్ స్టూడియోను ప్రారంభించిన టీసీఎస్, యూకే ఆర్థిక వ్యవస్థకు అందిస్తున్న తోడ్పాటు, దాని భవిష్యత్తు ప్రణాళికల వివరాలను ఈ కథనంలో తెలుసుకుందాం.

ఐటీ దిగ్గజం టీసీఎస్ వచ్చే మూడు సంవత్సరాల కాలంలో యూకేలో 5,000 మందికి ఉద్యోగాలు ఇవ్వనున్నట్లు ప్రకటించింది. ఈ ప్రకటన యూకే ఆర్థిక వ్యవస్థను బలోపేతం చేయడంలో సహాయపడుతుంది. టీసీఎస్ ఇప్పటికే గత 50 ఏళ్లుగా యూకేలో డిజిటల్ ట్రాన్స్‌ఫర్మేషన్‌లో పాలుపంచుకుంటోంది. ప్రస్తుతం ప్రత్యక్షంగా, పరోక్షంగా సుమారు 42,000 ఉద్యోగాలను అందిస్తోంది.

కొత్త ఉద్యోగాల కల్పనతో పాటు, టీసీఎస్ లండన్‌లో ఒక అత్యాధునిక ఆర్టిఫిషియల్ ఇంటెలిజెన్స్ ఎక్స్‌పీరియన్స్ జోన్, డిజైన్ స్టూడియోను కూడా ప్రారంభించింది. ఈ కొత్త సెంటర్, ఇన్నోవేషన్‌ను, కస్టమర్‌లతో కలిసి పనిచేయడాన్ని ప్రోత్సహిస్తుంది. ఈ సెంటర్ యూకేలోని యూనివర్సిటీలు, స్టార్టప్‌లు, పెద్ద పరిశ్రమల లీడర్‌లతో కలిసి పని చేసి, ఏఐ రంగాన్ని ముందుకు తీసుకెళ్లడానికి దోహదపడుతుంది. న్యూయార్క్‌లో ఇటీవల ప్రారంభించిన డిజైన్ స్టూడియో మాదిరిగానే లండన్ సెంటర్ ఉంటుంది.

బ్రిటిష్ ప్రధాని కీర్ స్టార్మర్ బిజినెస్ ప్రతినిధి బృందం ముంబైలోని టీసీఎస్ క్యాంపస్‌ను సందర్శించిన సందర్భంగా, యూకే ఇన్వెస్ట్‌మెంట్ మంత్రి జేసన్ స్టాక్‌వుడ్ ఆక్స్ఫర్డ్ ఎకనామిక్స్ నివేదికను విడుదల చేశారు. ఈ నివేదికలో టీసీఎస్ యూకే ఆర్థిక వ్యవస్థకు చేసిన భారీ సహకారం వెల్లడైంది. 2024లో టీసీఎస్ యూకే ఆర్థిక వ్యవస్థకు 3.3 బిలియన్ పౌండ్ల (సుమారు రూ.34 వేల కోట్లు)కు పైగా సహకారం అందించింది. 780 మిలియన్ పౌండ్లకు పైగా పన్నులు చెల్లించింది, ఇది సుమారు 20,400 మంది ఉపాధ్యాయుల జీతాలకు సమానం. యూకేలోని 19 సైట్‌లలో 42,700 ఉద్యోగాలకు మద్దతు ఇచ్చింది. ఇందులో ఇంజనీరింగ్, డేటా అనలిటిక్స్ వంటి 15,300 టెక్నికల్ ఉద్యోగాలు ఉన్నాయి, ఇవి యూకే లోని నైపుణ్యాల కొరతను తగ్గించడంలో సహాయపడుతున్నాయి.

యూకే ఇన్వెస్ట్‌మెంట్ మంత్రి జేసన్ స్టాక్‌వుడ్ టీసీఎస్‌ను ప్రశంసిస్తూ.. టాటా గ్రూప్ దాదాపు 150 సంవత్సరాలుగా నాయకత్వంలో ఉందని తెలిపారు. యూకే-భారత్ మధ్య వాణిజ్య ఒప్పందం లక్ష్యాలను చేరుకోవడంలో టీసీఎస్ వంటి కంపెనీలు ముఖ్యమని, ఇవి ఉద్యోగాలు సృష్టించి, ఆర్థిక వ్యవస్థకు బలాన్ని ఇస్తాయని ఆయన అన్నారు. ఈ కొత్త పెట్టుబడి, డిజిటల్ సేవల రంగంలో యూకేలో టీసీఎస్ స్థానాన్ని మరింత పటిష్టం చేస్తుందని, ఇది అనేక పరిశ్రమలకు సహాయపడుతుందని విశ్లేషకులు అభిప్రాయపడ్డారు.