Visa : అమెరికా H-1B వీసా సంచలనం.. లాటరీ రద్దు.. నైపుణ్యం, జీతమే ఇక కీలకం

Visa : అమెరికా ప్రభుత్వం హెచ్1బీ వీసా వ్యవస్థలో అతిపెద్ద మార్పులు తీసుకురావడానికి సిద్ధమవుతోంది. ప్రస్తుతం ఉన్న లక్కీ డ్రా విధానాన్ని రద్దు చేసి, ఇకపై నైపుణ్యం, అత్యధిక జీతం ఆధారంగా వీసాలను మంజూరు చేయాలని యోచిస్తోంది. ఈ కొత్త విధానం ముఖ్యంగా భారతీయ ఐటీ ఉద్యోగులు, కంపెనీలపై గణనీయమైన ప్రభావాన్ని చూపనుంది. ఇటీవల హెచ్1బీ వీసా ఫీజును $1,00,000కు పెంచిన అమెరికా ప్రభుత్వం, ఇప్పుడు ఈ వీసా విధానంలో మరో పెద్ద మార్పుకు సిద్ధమైంది. ప్రస్తుతం వీసాలను మంజూరు చేయడానికి ఉన్న లాటరీ వ్యవస్థ స్థానంలో, స్కిల్స్, అధిక జీతం ఆధారంగా వీసా ఇచ్చే కొత్త విధానాన్ని తీసుకురావాలని అమెరికా హోం శాఖ యోచిస్తోంది. దీని ద్వారా అత్యంత నైపుణ్యం కలిగిన, అధిక జీతం ఉన్న విదేశీ ఉద్యోగులకు అమెరికాలో అవకాశాలు పెరుగుతాయి.

అధిక జీతానికి అధిక ప్రాధాన్యత

అమెరికా ప్రభుత్వం తీసుకురాబోయే కొత్త విధానంలో ఉద్యోగులను వారి జీతం ఆధారంగా నాలుగు వేతన శ్రేణులుగా విభజిస్తారు. అత్యధిక జీతం పొందే ఉద్యోగులకు వీసా ఎంపిక జాబితాలో నాలుగు ఎంట్రీలు లభిస్తాయి. అదే అత్యంత తక్కువ జీతం పొందే వారికి ఒకే ఎంట్రీ మాత్రమే లభిస్తుంది. దీని ఫలితంగా, అత్యధిక జీతం ఉన్న వారికి హెచ్1బీ వీసా లభించే అవకాశం చాలా రెట్లు పెరుగుతుంది.

ఉదాహరణకు, ఒక స్టార్టప్‌లో సంవత్సరానికి 50,000డాలర్లు జీతం పొందే వ్యక్తి కంటే, గూగుల్ వంటి పెద్ద కంపెనీలో 1,50,000డాలర్ల జీతం ఆఫర్ పొందిన వ్యక్తికి వీసా వచ్చే అవకాశం చాలా ఎక్కువ ఉంటుంది. ఈ విధానం వల్ల అధిక జీతాలు ఇవ్వగల కంపెనీలు విదేశాల నుండి అత్యుత్తమ ప్రతిభను తీసుకురావడం సులభమవుతుంది. అయితే, చిన్న కంపెనీలు మాత్రం ఇబ్బందులు పడవచ్చు.

అమెరికాకు ప్రయోజనాలు

ఈ కొత్త హెచ్1బీ నియమాల వల్ల అమెరికాకు అనేక ప్రయోజనాలు లభించనున్నాయి:

అనుభవజ్ఞులు, నిపుణులకు అవకాశం: విదేశాల నుండి కేవలం అనుభవజ్ఞులు, అధిక జీతం ఉన్న నిపుణులు మాత్రమే అమెరికాకు వస్తారు.

తక్కువ జీతం ఉన్న వారికి అడ్డుకట్ట: తక్కువ జీతానికి పనిచేసే ఉద్యోగులు అమెరికాకు రావడం తగ్గుతుంది.

వేతన స్థిరత్వం: అమెరికాలో వేతనాల స్థాయి పడిపోకుండా కాపాడుకోవడానికి ఈ విధానం సహాయపడుతుంది.

అమెరికన్లకు ఉపాధి: అమెరికన్లకు స్థానికంగా ఉపాధి అవకాశాలు పెరగడానికి కూడా ఈ కొత్త విధానం తోడ్పడుతుంది.

భారతీయ కంపెనీలపై ప్రభావం

హెచ్1బీ వీసా నియమాలలో ఈ మార్పులు మెటా, అమెజాన్, ఓపెన్‌ఏఐ, ఎన్‌విడియా వంటి అగ్రశ్రేణి టెక్నాలజీ కంపెనీలకు పెద్దగా ప్రభావం చూపకపోవచ్చు. ఎందుకంటే ఈ కంపెనీలు అత్యధిక జీతాలు ఇవ్వగల సామర్థ్యాన్ని కలిగి ఉన్నాయి. అయితే, ఇన్ఫోసిస్, విప్రో వంటి భారతీయ ఐటీ కంపెనీలకు మాత్రం ఇది పరిమిత స్థాయిలో ప్రభావం చూపవచ్చని నిపుణులు అంచనా వేస్తున్నారు. ఈ కంపెనీలు తమ పనిని ప్రపంచవ్యాప్తంగా ఉన్న కెపాసిటీ సెంటర్‌ల ద్వారా అవుట్‌సోర్స్ చేయడానికి మొగ్గు చూపవచ్చు.

ఈ కొత్త విధానం అమలులోకి వస్తే, కేవలం లాటరీ మీద ఆధారపడకుండా, అధిక నైపుణ్యం, జీతం ఉన్న భారతీయ ఉద్యోగులకు అమెరికాలో శాశ్వతంగా స్థిరపడేందుకు మెరుగైన అవకాశాలు లభిస్తాయి.