Marriage Between People of the Same Gotra: ఒకే గోత్రం వ్యక్తుల మధ్య వివాహం మంచిదేనా.. శాస్త్రాలు ఏం చెబుతున్నాయి..?

Marriage Between People of the Same Gotra: హిందూ సంప్రదాయంలో వివాహం అనేది కేవలం ఇద్దరు వ్యక్తుల కలయిక మాత్రమే కాదు, అది రెండు కుటుంబాలు, వంశాల అనుసంధానం. వివాహ నిశ్చయ సమయంలో జాతక చక్రాలు, నక్షత్ర బలాలు చూడటంతో పాటు గోత్రం చూడటం అత్యంత కీలకం. అయితే ఒకే గోత్రానికి చెందిన వారు వివాహం చేసుకోవచ్చా? దీని వల్ల కలిగే పరిణామాలు ఏమిటి? అనే అంశాలపై పండితులు ఆసక్తికర విషయాలను వెల్లడించారు.

గోత్రం అంటే ఏమిటి? దాని శాస్త్రీయత ఏమిటి?

గోత్రం అనేది ఒక వ్యక్తి యొక్క జీవనాడి వంటిది. సనాతన ధర్మంలో గోత్రం అనేది ఒకే రక్తాన్ని సూచిస్తుంది. దీనిని ఆధునిక విజ్ఞాన శాస్త్రంలోని క్రోమోజోమ్‌లతో పోల్చవచ్చు. మానవ శరీరంలోని 23 జతల క్రోమోజోమ్‌ల అమరిక, వంశపారంపర్యంగా వచ్చే జన్యువుల ప్రభావం గోత్రంపై ఆధారపడి ఉంటుంది. అందుకే ఒకే గోత్రం కలిగిన వారిని సోదర-సోదరీమణులుగా భావిస్తారు.

సగోత్ర వివాహం వల్ల కలిగే నష్టాలు

ఒకే గోత్రం ఉన్న వ్యక్తులు వివాహం చేసుకోవడం వల్ల భవిష్యత్తులో పలు సమస్యలు వచ్చే అవకాశం ఉందని పండితులు హెచ్చరిస్తున్నారు:

సంతాన సమస్యలు: పిల్లల శారీరక మరియు మానసిక అభివృద్ధిలో లోపాలు తలెత్తవచ్చు.

ఆరోగ్యపరమైన ఇబ్బందులు: పుట్టబోయే బిడ్డలకు జన్యుపరమైన వ్యాధులు లేదా వైకల్యాలు వచ్చే ప్రమాదం ఉందని శాస్త్రాలు చెబుతున్నాయి.

ప్రవర్తనా లోపాలు: ఒకే గోత్రం ఉన్న వారిలో తక్షణ కోపం, ఈగో వంటి లక్షణాలు ఎక్కువగా ఉంటాయని, ఇది వైవాహిక జీవితంలో సామరస్యాన్ని దెబ్బతీస్తుందని విశ్లేషించారు.

నాడి దోషం - అత్యంత కీలకం

వివాహ పొంతన చూసే అష్టకూట పద్ధతిలో నాడి కూటకు అత్యధిక ప్రాధాన్యత ఉంటుంది.

1. ఆది నాడి

2. మధ్య నాడి

3. అంత్య నాడి

వధూవరులిద్దరూ ఒకే నాడికి (ఉదాహరణకు ఇద్దరూ ఆది నాడి) చెందిన వారైతే దానిని నాడి దోషం అంటారు. దీనివల్ల సంతానోత్పత్తిలో ఆటంకాలు కలగడమే కాకుండా కుటుంబ భవిష్యత్తుపై ప్రతికూల ప్రభావం చూపే అవకాశం ఉందని పండితులు తెలిపారు.

నిపుణుల సూచన

భారతీయ సంప్రదాయం ప్రకారం స్త్రీ వివాహం తర్వాత తన తండ్రి గోత్రాన్ని వదిలి భర్త గోత్రంలోకి ప్రవేశిస్తుంది. ఇది వంశపారంపర్య కొనసాగింపుకు సంకేతం. అందుకే, వివాహ బంధంలోకి అడుగుపెట్టే ముందు కేవలం నమ్మకాలనే కాకుండా పరోక్షంగా సంతాన ఆరోగ్యం, కుటుంబ సుఖశాంతులను దృష్టిలో ఉంచుకుని నిపుణులైన జ్యోతిష్కుల సలహాలు తీసుకోవడం ఉత్తమమని సూచిస్తున్నారు.