Lord Shiva: కుబేరుడికే సంపదలను ఇచ్చిన పరమశివుడు.. - భక్తితో పూజిస్తే అష్టైశ్వర్యాలు!

Lord Shiva: మనం శివుడిని అనగానే విభూతి రేఖలు, మెడలో పాము, ఒంటిపై పులి చర్మం ధరించిన వైరాగ్య మూర్తిగా భావిస్తాం. స్మశాన వాటికను నివాసంగా చేసుకున్న ఆ మహాదేవుడు సంసార వ్యామోహాలకు అతీతుడు. కానీ, అదే సమయంలో సకల చరాచర జగత్తుకు, సకల సంపదలకు మూలమైన వాడు కూడా ఆ పరమేశ్వరుడే. అందుకే ఆయన్ని మనం 'ఐశ్వర్యేశ్వరుడు' అని పిలుచుకుంటాం.

నిజానికి సంపదలకు అధిపతి అనగానే మనకు కుబేరుడు గుర్తుకువస్తాడు. కానీ, ఆ కుబేరుడిని ఉత్తర దిక్పాలకుడిగా నియమించి, సకల ధనధాన్యాలకు కాపలాదారుగా శక్తిని ప్రసాదించినది ఆ భోళాశంకరుడే. పరమశివుడి అనుగ్రహం పొందిన తర్వాతే కుబేరుడికి ఆ మహోన్నతమైన స్థానం లభించింది. అంటే, లోకంలోని ఐశ్వర్యమంతా ఆ ఆదిదేవుడి ఆజ్ఞ ప్రకారమే నడుస్తుందని మన పురాణాలు చెబుతున్నాయి.

శివుడు కేవలం వైరాగ్యాన్ని ఇచ్చేవాడు మాత్రమే కాదు.. తనను నమ్ముకున్న భక్తుల దారిద్ర్యాన్ని హరించే మంగళకారుడు. భక్తితో చేసే ఒక బిల్వ దళం, ఒక గ్లాసు నీటి అభిషేకానికి పొంగిపోయే ఆ శంకరుడు, దారిద్ర్య బాధల నుంచి విముక్తిని ప్రసాదిస్తాడు. 'దారిద్ర్య దహన స్తోత్రం' పఠించినా, మనసు నిండా శివ నామాన్ని స్మరించినా మన ఇంట్లోని అరిష్టాలు తొలగి, అష్టైశ్వర్యాలు సిద్ధిస్తాయని భక్తుల ప్రగాఢ విశ్వాసం.

మనసులో ఎటువంటి కల్మషం లేకుండా, సంపూర్ణ శరణాగతితో ఆ పరమశివుడిని ఆరాధిస్తే.. ఆయన అనుగ్రహంతో దారిద్ర్య బాధలు పటాపంచలైపోతాయి. వైరాగ్యాన్ని నేర్పే గురువు ఆయనే, భోగభాగ్యాలను ఇచ్చే దాతా ఆయనే. అందుకే శివుడిని పూజిస్తే ఇహంలో సుఖసంతోషాలు, పరంలో మోక్షం లభిస్తాయి.