Sri Ramalingeshwara Swamy Temple: శ్రీరాముడు ప్రతిష్టించిన శివలింగం... కీసరగుట్ట శ్రీ రామలింగేశ్వర స్వామి ఆలయం

Sri Ramalingeshwara Swamy Temple: కీసరగుట్టలోని శ్రీ రామలింగేశ్వర స్వామి ఆలయం తెలంగాణలోని అత్యంత పురాతనమైన, చారిత్రకమైన క్షేత్రాలలో ఒకటి. కీసరగుట్ట తెలంగాణలోని మేడ్చల్ మల్కాజిగిరి జిల్లాలో ఉంది. ఇది హైదరాబాద్‌కు సుమారు 35 కిలోమీటర్ల దూరంలో ఉంది. రావణుడిని సంహరించిన తర్వాత శ్రీరాముడు బ్రహ్మహత్యా పాతకం నుంచి విముక్తి పొందేందుకు ఈ ప్రాంతానికి వచ్చాడని పురాణ గాథ చెబుతుంది. ఇక్కడ ఒక శివలింగాన్ని ప్రతిష్టించాలని సంకల్పించి, హనుమంతుడిని కాశీ నుంచి శివలింగాలు తీసుకురావాలని ఆదేశించారు. ముహూర్త సమయం సమీపిస్తున్నా హనుమంతుడు తిరిగి రాకపోవడంతో, శ్రీరాముడు తాను స్వయంగా ఇసుకతో లింగాన్ని ప్రతిష్టించారు. కొంత సమయానికి హనుమంతుడు కాశీ నుంచి 101 శివలింగాలతో తిరిగి వచ్చి, శ్రీరాముడు అప్పటికే లింగాన్ని ప్రతిష్టించడం చూసి నిరాశకు గురయ్యాడు. ఆగ్రహంతో ఆ లింగాలను చుట్టూ విసిరివేశాడని, అందుకే ఆలయ ప్రాంగణంలో అనేక శివలింగాలు కనిపిస్తాయని కథనం. హనుమంతుడిని (కేసరి పుత్రుడు) శాంతింపజేయడానికి శ్రీరాముడు, ఈ కొండను "కేసరిగిరి" అని పిలిచారు. కాలక్రమేణా, ఇది కీసరగుట్టగా మారిందని చెబుతారు. అలాగే, తాను ప్రతిష్టించిన లింగాన్ని "శ్రీ రామలింగేశ్వర స్వామి" అని పిలుస్తారని వరం ఇచ్చారు. ఈ ఆలయంలోని ప్రధాన దైవం శ్రీ రామలింగేశ్వర స్వామి (శివుడు). ప్రధాన ఆలయం పశ్చిమాభిముఖంగా ఉంటుంది. ఇక్కడ శివలింగం స్వయంభువు అని నమ్ముతారు. ప్రధాన ఆలయంతో పాటు, భవానీ, శివదుర్గలకు కూడా ఉపాలయాలు ఉన్నాయి. ఈ ఆలయ పరిసరాలలో జరిపిన పురావస్తు తవ్వకాలలో, విష్ణుకుండిన రాజుల కాలం నాటి ఇటుక నిర్మాణాలు, బౌద్ధ స్థూపాల అవశేషాలు బయటపడ్డాయి. క్రీ.శ. 430 నాటి తెలుగు లిపికి సంబంధించిన మొదటి శాసనాలలో ఒకటైన "తొలుచువాండ్రు" అనే పదం ఇక్కడ లభించింది. మహాశివరాత్రి, కార్తీక మాసాలలో ఇక్కడ బ్రహ్మోత్సవాలు ఘనంగా జరుగుతాయి. ఈ సమయంలో లక్షలాది మంది భక్తులు స్వామివారిని దర్శించుకుంటారు.