Sri Padmavathi Ammavari Temple: ఆగ‌స్టు నెలలో శ్రీపద్మావతీ అమ్మవారి ఆలయంలో విశేష ఉత్సవాలు

Sri Padmavathi Ammavari Temple: తిరుచానూరు శ్రీపద్మావతీ అమ్మవారి ఆలయంతో పాటు దాని పరిధిలోని పలు అనుబంధ ఆలయాలలో ఆగస్టు నెలలో అనేక విశేష ఉత్సవాలు నిర్వహించనున్నారు. భక్తులు ఈ వేడుకలను కనులారా వీక్షించేందుకు టీటీడీ అన్ని ఏర్పాట్లు చేస్తోంది. తిరుచానూరు శ్రీపద్మావతీ అమ్మవారి ఆలయంలో ఆగస్టు 7, 14, 28 తేదీలలో శుక్రవారాన్ని పురస్కరించుకుని సాయంత్రం 6 గంటలకు అమ్మవారు తిరుచ్చిపై ఆలయ నాలుగు మాడ వీధులలో విహరిస్తూ భక్తులకు దర్శనమివ్వనున్నారు. అలాగే ఆగస్టు 25న ఉత్తరాషాడ నక్షత్రం సందర్భంగా అమ్మవారు సాయంత్రం 6.45 గంటలకు గజ వాహనంపై భక్తులను కటాక్షించనున్నారు. అంతేకాకుండా ఆగస్టు 21న వరలక్ష్మీ వ్రతం సందర్భంగా సాయంత్రం 6 గంటలకు శ్రీపద్మావతి అమ్మవారి వైభవంగా స్వర్ణరథోత్సవం జరుగుతుంది.

ఇక అనుబంధ ఆలయాల విషయానికి వస్తే, శ్రీ బలరామ కృష్ణ స్వామి వారి ఆలయంలో ఆగస్టు 8న రోహిణి నక్షత్రం సందర్భంగా సాయంత్రం 6 గంటలకు శ్రీకృష్ణ స్వామి వారికి తిరుచ్చి ఉత్సవం నిర్వహించనున్నారు. శ్రీ సుందరరాజ స్వామి ఆలయంలో ఆగస్టు 3 మరియు 30 తేదీలలో ఉత్తర భాద్ర నక్షత్రం సందర్భంగా సాయంత్రం 6 గంటలకు స్వామివారు తిరుచ్చిపై ఆలయ నాలుగు మాడ వీధులలో విహరించి భక్తులను అనుగ్రహించనున్నారు. శ్రీ సూర్యనారాయణ స్వామి ఆలయంలో ఆగస్టు 17న హస్త నక్షత్రం సందర్భంగా సాయంత్రం 5 గంటలకు స్వామివారు తిరుచ్చిపై భక్తులను కటాక్షించనున్నారు. అలాగే తిరుచానూరు శ్రీనివాస ఆలయంలో ఆగస్టు 1, 8, 15, 22, 29 తేదీలలో వేంకటేశ్వరస్వామివారి మూలవర్లకు ప్రత్యేక అభిషేకాలు నిర్వహించనున్నారు.

ప్రసిద్ధ పుణ్యక్షేత్రమైన అప్పలాయగుంట శ్రీ ప్రసన్న వేంకటేశ్వరస్వామివారి ఆలయంలో కూడా ఆగస్టు నెలలో పలు విశేష పూజలు జరగనున్నాయి. ఆగస్టు 4న ఉదయం 8 గంటలకు అష్టదళ పాదపద్మారాధన సేవ జరుగనుంది. ఆగస్టు 7, 14, 21, 28 తేదీలలో శుక్రవారాన్ని పురస్కరించుకుని ఉదయం 7 గంటలకు వస్త్రలంకార సేవ మరియు అభిషేకం నిర్వహిస్తారు. అలాగే ఆగస్టు 12న ఉదయం 8 గంటలకు అష్టోత్తరశత కలశాభిషేకం, ఆగస్టు 26న శ్రీదేవి, భూదేవి సమేత శ్రీ ప్రసన్న వేంకటేశ్వరస్వామివారి కల్యాణోత్సవం వైభవంగా కనువిందు చేయనున్నాయి. వీటితో పాటు ఆగస్టు 2, 9, 16, 23, 30 తేదీలలో శ్రీ ప్రసన్న ఆంజనేయ స్వామి వారికి ఉదయం 8.15 గంటలకు క్రమం తప్పకుండా అభిషేకం నిర్వహించనున్నట్లు అధికారులు తెలిపారు.