Tirumala Tirupati Devasthanams: తిరుమల హుండీలో రద్దయిన నోట్లు.. టీటీడీకి రూ.400 కోట్ల తలనొప్పి!

Tirumala Tirupati Devasthanams: తిరుమల శ్రీవారికి భక్తులు భక్తితో సమర్పించే కానుకలు ఇప్పుడు తిరుమల తిరుపతి దేవస్థానం (టీటీడీ)కి పెద్ద సమస్యగా మారాయి. కేంద్ర ప్రభుత్వం ఎప్పుడో రద్దు చేసిన పాత రూ.500, రూ.1000 నోట్లను భక్తులు ఇప్పటికీ హుండీలో వేస్తూనే ఉండటంతో, టీటీడీ వద్ద ఈ నోట్ల నిల్వ ఏకంగా రూ.400 కోట్లకు చేరినట్లు తెలుస్తోంది. భారీ మొత్తంలో నిధులు ఉన్నప్పటికీ, అవి చెల్లని నోట్లు కావడంతో టీటీడీకి ఏం చేయాలో పాలుపోవడం లేదు.

నిజానికి పెద్ద నోట్ల రద్దు జరిగి ఏళ్లు గడుస్తున్నా, మొక్కుల రూపంలో భక్తులు ఈ పాత నోట్లను హుండీలో వేయడం ఆపడం లేదు. భక్తులు సమర్పించిన కానుకలు కాబట్టి వాటిని కాదనలేక, పరకామణి సమయంలో సిబ్బంది వీటిని వేరు చేసి భద్రపరుస్తున్నారు. ఇలా పేరుకుపోయిన ఈ నోట్లు ఇప్పుడు గుట్టలుగా దర్శనమిస్తున్నాయి. ఈ భారీ మొత్తాన్ని మార్చుకునేందుకు అవకాశం ఇవ్వాలని టీటీడీ ఎప్పటి నుంచో కేంద్ర ప్రభుత్వంపై ఒత్తిడి తెస్తోంది.

ఈ విషయంలో టీటీడీ ఉన్నతాధికారులు పలుమార్లు కేంద్ర ఆర్థిక శాఖను, రిజర్వ్ బ్యాంక్ ఆఫ్ ఇండియా (ఆర్బీఐ) అధికారులను కలిసి విజ్ఞప్తి చేశారు. అయితే, టీటీడీకి ఒక్కదానికే అనుమతి ఇస్తే ఇతర దేవాలయాలు, సంస్థల నుంచి కూడా ఇలాంటి విన్నపాలు వస్తాయని కేంద్రం వెనకాడుతోంది. దీనివల్ల భక్తులు సమర్పించిన రూ.400 కోట్లు ఇప్పుడు నిరుపయోగంగా పడి ఉన్నాయి. ఈ సమస్యకు పరిష్కారం దొరికితే ఆ నిధులను ఆలయ అభివృద్ధికి, ధార్మిక కార్యక్రమాలకు వాడుకునే వీలుంటుందని టీటీడీ ఆశిస్తోంది.