Grinding Your Teeth in Sleep: నిద్రలో పళ్లు కొరుకుంటున్నారా? ఉదయాన్నే ఈ లక్షణాలు కనిపిస్తే డేంజర్ బెల్స్ మోగినట్లే..

Grinding Your Teeth in Sleep: రాత్రి నిద్రలో తెలియకుండానే కరకరమంటూ పళ్లు కొరికే అలవాటు మీకూ ఉందా? పక్కన పడుకున్నవాళ్లు చెబితే తప్ప చాలామందికి తమకు ఈ సమస్య ఉన్నట్లే తెలియదు. వైద్య పరిభాషలో దీన్ని బ్రక్సిజం అంటారు. అప్పుడప్పుడు జరిగితే ఫర్వాలేదు కానీ, ఇది రోజూ జరిగే అలవాటుగా మారితే మాత్రం దంతాలు ఊడిపోయే ప్రమాదం ఉంది. ఉదయం నిద్రలేవగానే కనిపించే కొన్ని లక్షణాలు మీ దంత ఆరోగ్యం ప్రమాదంలో పడిందని హెచ్చరిస్తాయి.

ఉదయం లేవగానే ఈ లక్షణాలు కనిపిస్తున్నాయా?

రాత్రి వేళ పళ్లు గట్టిగా నూరేవారిలో ఉదయం నిద్రలేవగానే ఈ క్రింది సమస్యలు బయటపడతాయి:

దవడ బిగుసుకుపోవడం: దవడ కండరాల్లో తీవ్రమైన నొప్పి, దవడ పట్టేసినట్లు ఉండటం.

మార్నింగ్ హెడేక్: నిద్రలేవగానే తల బరువుగా అనిపించడం, ఒకవైపు తీవ్రమైన తలనొప్పి రావడం.

దంతాల జివ్వుమనడం: చల్లటి లేదా వేడి పదార్థాలు తిన్నప్పుడు దంతాలు పులిసిపోవడం, సెన్సిటివిటీ పెరగడం.

నోరు తెరవడంలో ఇబ్బంది: ఆవలిస్తున్నప్పుడు లేదా మాట్లాడుతున్నప్పుడు దవడ కీలు వద్ద టక్ టక్ అని శబ్దం రావడం, నొప్పి కలగడం.

ఈ సమస్యకు అసలు కారణాలేంటి?

నిద్రలో పళ్లు కొరకడానికి వైద్యులు ప్రధానంగా ఈ కారణాలను చూపుతున్నారు:

మానసిక ఒత్తిడి - ఆందోళన: వర్క్ ప్రెజర్, స్ట్రెస్, ఆందోళన వల్ల సబ్‌కాన్షియస్ మైండ్ దవడ కండరాలను బిగబట్టేలా చేస్తుంది.

స్లీప్ అప్నియా - గురక: శ్వాస తీసుకోవడంలో ఇబ్బంది తలెత్తే నిద్రలేమి రుగ్మతలు పళ్లు కొరకడానికి ప్రధాన ట్రిగ్గర్స్.

లైఫ్‌స్టైల్ తప్పులు:

పడుకునే ముందు మితిమీరి టీ, కాఫీలు తాగడం, ధూమపానం మరియు కొన్ని రకాల మందుల సైడ్ ఎఫెక్ట్స్.

దంతాలపై పడే తీవ్ర ప్రభావం

నిరంతరం ఒత్తిడికి గురికావడం వల్ల దంతాల పై రక్షణ పొర అయిన ఎనామిల్ అరిగిపోతుంది. క్రమంగా పళ్లు అరిగి చిన్నవిగా మారిపోవడం, పగుళ్లు రావడం, చివరకు దంతాలు విరిగిపోవడం లేదా ఊడిపోవడం జరుగుతుంది.

ఎలా బయటపడాలి? నిపుణుల పరిష్కారాలు

మౌత్‌గార్డ్ : డెంటిస్ట్‌ను సంప్రదించి మీ దంతాల కొలతలకు సరిపడే 'నైట్ మౌత్‌గార్డ్' తయారు చేయించుకుని రాత్రిపూట ధరిస్తే దంతాలు అరిగిపోకుండా కాపాడుకోవచ్చు. మార్కెట్లో దొరికే సాధారణ గార్డులను సొంతంగా వాడకూడదు.

స్ట్రెస్ రిలీఫ్: పడుకునే ముందు ధ్యానం, శ్వాస వ్యాయామాలు లేదా గోరువెచ్చని నీటితో స్నానం చేసి మనస్సును ప్రశాంతంగా ఉంచుకోవాలి.

స్లీప్ రొటీన్:

రోజూ ఒకే సమయానికి పడుకోవడం అలవాటు చేసుకోవాలి. సాయంత్రం వేళల్లో కెఫీన్ ఎక్కువగా ఉండే పానీయాలకు దూరంగా ఉండాలి.

నిద్రలో పళ్లు కొరకడాన్ని సాధారణ విషయంగా కొట్టిపారేయకండి. దవడ నొప్పి, తలనొప్పి వంటి లక్షణాలు రోజూ వేధిస్తుంటే వెంటనే దంతవైద్యుడిని కలిసి చికిత్స తీసుకోవడం ఉత్తమం.