Waking Up Early in the Morning: ఉదయాన్నే నిద్ర లేవాలని ఎందుకు చెబుతారు?

Waking Up Early in the Morning: పొద్దున్నే లేచిన పక్షికి ఆహారం దొరుకుతుంది అన్న నానుడి కేవలం సామెత మాత్రమే కాదు, ఆధునిక ఆరోగ్య, జీవనశైలి నిపుణుల మాట కూడా. ఉదయాన్నే నిద్ర లేవడం కేవలం సమయాన్ని ఆదా చేయడమే కాదు, శారీరక, మానసిక ఆరోగ్యాన్ని మెరుగుపరుచుకోవడానికి ఒక శక్తిమంతమైన మార్గమని అధ్యయనాలు స్పష్టం చేస్తున్నాయి. అనేక పరిశోధనల ప్రకారం, త్వరగా నిద్ర లేచే వ్యక్తులలో మానసిక సమస్యలు (డిప్రెషన్, ఆందోళన) తక్కువగా ఉంటాయి. ఉదయాన్నే సూర్యరశ్మిని చూడటం వల్ల మన శరీరంలో సహజమైన 'మూడ్ బూస్టర్' విడుదల అవుతుంది. ఇది ఒత్తిడిని, ఆందోళనను తగ్గిస్తుంది. మనం నిద్ర లేచిన వెంటనే మెదడు పూర్తిగా మేల్కోదు. దీనిని స్లీప్ ఇనర్షియా అంటారు. త్వరగా లేవడం వల్ల మెదడుకు పూర్తిగా చురుకుగా మారడానికి తగిన సమయం దొరుకుతుంది. దీంతో పనులపై ఏకాగ్రత, స్పష్టత పెరుగుతాయి.ఉదయం పూట వ్యాయామం చేయడం వల్ల రోజంతా శక్తివంతంగా ఉండవచ్చు. త్వరగా లేవడం ద్వారా హడావిడి లేకుండా వ్యాయామం కోసం సమయాన్ని కేటాయించవచ్చు. ఆలస్యంగా లేస్తే బ్రేక్‌ఫాస్ట్ మానేయడం లేదా తొందరగా దొరికే అనారోగ్యకరమైన ఆహారం తినే అవకాశం ఉంటుంది. ఉదయాన్నే లేవడం ఆరోగ్యకరమైన, పోషకాలు నిండిన అల్పాహారం తీసుకోవడానికి వీలు కల్పిస్తుంది. ప్రతి రోజూ ఉదయాన్నే లేచే అలవాటు మన జీవితంలో క్రమశిక్షణ, ఆరోగ్యం, ప్రశాంతతను తీసుకువస్తుందని నిపుణులు సూచిస్తున్నారు. అందుకే, ఎర్లీ టు బెడ్, ఎర్లీ టు రైజ్ అన్న నియమం నేటి ఆధునిక జీవనశైలిలో కూడా అత్యంత కీలకంగా మారిందని ఆరోగ్య నిపుణులు పేర్కొంటున్నారు.