Iran’s Supreme Leader Khamenei Issues Strong Warning: ట్రంప్ సుంకాల హెచ్చరికల మధ్య.. అమెరికాకు ఇరాన్ సుప్రీం లీడర్ ఖమేనీ కీలక హెచ్చరికలు

Iran’s Supreme Leader Khamenei Issues Strong Warning: అమెరికా అధ్యక్షుడు డొనాల్డ్ ట్రంప్ ఇరాన్‌తో వాణిజ్యం చేసే దేశాలపై 25 శాతం అదనపు సుంకాలు (టారిఫ్‌లు) విధిస్తామని ఇటీవల హెచ్చరించారు. ఈ నేపథ్యంలో ఇరాన్ సుప్రీం లీడర్ అయతొల్లా అలీ ఖమేనీ అమెరికాకు బలమైన హెచ్చరికలు జారీ చేశారు.

ఎక్స్ (ట్విట్టర్) వేదికగా ఖమేనీ విడుదల చేసిన పోస్టులో ఇలా పేర్కొన్నారు:

“మా ఇరాన్ దేశం శత్రువుల ముందు తలొగ్గదని పలుమార్లు స్పష్టం చేశాం. ఇప్పటికైనా అమెరికా రాజకీయ నాయకులు తమ మోసపూరిత చర్యలను ఆపాలి. మా దేశానికి ద్రోహం చేస్తున్న కిరాయి వ్యక్తులపై ఆధారపడటం మానేయాలి. ఇరాన్ బలమైన, శక్తిమంతమైన దేశం. శత్రువు గురించి మాకు పూర్తి అవగాహన ఉంది. వారిని ఎదుర్కోవడానికి మేం ఎల్లప్పుడూ సిద్ధంగా ఉంటాం.”

ఇటీవల ట్రంప్ ప్రభుత్వం ఇరాన్‌పై వైమానిక దాడులు చేపట్టడం కూడా ఒక ఎంపికగా పరిగణిస్తున్నట్లు సూచించింది. అదే సమయంలో ఇరాన్‌తో వాణిజ్యం చేసే దేశాలు – ముఖ్యంగా చైనా, తుర్కియే, యూఏఈ, ఇరాక్, భారత్ వంటి దేశాలపై తక్షణమే 25 శాతం సుంకాలు అమలు చేస్తామని ట్రంప్ ప్రకటించారు.

ఇరాన్‌లో ఆర్థిక సంక్షోభం, ద్రవ్యోల్బణం కారణంగా ఆందోళనలు కొనసాగుతున్నాయి. ఈ నేపథ్యంలో రాజధాని టెహ్రాన్‌లోని ఎంఘెలాబ్ స్క్వేర్ వద్ద వేలాది మంది ప్రభుత్వానుకూల ప్రదర్శనకారులు గుమిగూడారు. దేశాధ్యక్షుడు పెజెష్కియాన్, విదేశాంగ మంత్రి అబ్బాస్ అరాఘ్చి తదితర ప్రముఖులు ఈ కార్యక్రమంలో పాల్గొన్నారు.

ఈ పరిణామాల మధ్య ఇరాన్-అమెరికా మధ్య ఉద్రిక్తత మరింత పెరిగే అవకాశం కనిపిస్తోంది. భారత్‌తో సహా ఇతర దేశాలపై ఈ టారిఫ్‌ల ప్రభావం ఎలా ఉంటుందనే చర్చ కూడా ఊపందుకుంటోంది.