Ajit Pawar Comments on Family Disputes: ఎన్‌సీపీలో రెండు వర్గాల ఐక్యం: కుటుంబ విభేదాలపై అజిత్ పవార్ వ్యాఖ్యలు

Ajit Pawar Comments on Family Disputes: మహారాష్ట్రలో నేషనలిస్ట్‌ కాంగ్రెస్‌ పార్టీ (ఎన్‌సీపీ) చీలిక వర్గాల మధ్య సయోధ్య జరిగింది. రాష్ట్రంలోని స్థానిక సంస్థల ఎన్నికల్లో ఇరు వర్గాలు కలిసి పోటీ చేయనున్నాయి. పార్టీ కార్యకర్తల కోరిక మేరకు ఈ నిర్ణయం తీసుకున్నట్టు మహారాష్ట్ర ఉప ముఖ్యమంత్రి అజిత్‌ పవార్‌ తెలిపారు. పవార్‌ కుటుంబంలోని ఉద్విగ్నతలు పూర్తిగా తొలగిపోయాయని ఆయన ఒక ఇంగ్లిష్‌ న్యూస్‌ ఛానల్‌కు ఇచ్చిన ఇంటర్వ్యూలో పేర్కొన్నారు.

రెండేళ్ల క్రితం శరద్‌ పవార్‌ స్థాపించిన ఎన్‌సీపీలో చీలిక ఏర్పడిన సంగతి తెలిసిందే. అజిత్‌ పవార్‌ నేతృత్వంలోని వర్గం ఎన్‌డీఏ కూటమితో చేతులు కలిపి, ఆయన ఉప ముఖ్యమంత్రిగా బాధ్యతలు చేపట్టారు. పార్టీ అసలు పేరు, గడియారం గుర్తును కూడా అజిత్‌ వర్గం సొంతం చేసుకుంది. దీంతో శరద్‌ పవార్‌ వర్గం ఎన్‌సీపీ (శరద్‌చంద్ర పవార్‌)గా మారి, కొత్త గుర్తుగా బాకా పొందింది. లోక్‌సభ, అసెంబ్లీ ఎన్నికల్లో ఇరు వర్గాలు విడివిడిగా ఎన్‌డీఏ, ఇండియా కూటముల నుంచి పోటీ చేశాయి.

తాజాగా మహారాష్ట్రలోని పింప్రి చించ్వాడ్‌ మున్సిపల్‌ కార్పొరేషన్‌ ఎన్నికల్లో ఇరు వర్గాలు ఉమ్మడిగా బరిలోకి దిగనున్నాయి. ఈ విషయాన్ని శరద్‌ పవార్‌ వర్గానికి చెందిన ఎంపీ సుప్రియా సూలే కూడా ధృవీకరించారు. కార్యకర్తల డిమాండ్‌ మేరకు కలిసి పోటీ చేయాలని నిర్ణయమైందని, అయితే ఈ భాగస్వామ్యం భవిష్యత్తులో కొనసాగుతుందా అనే దానిపై ఇంకా చర్చలు జరగలేదని ఆమె స్పష్టం చేశారు. రాష్ట్రంలో భాజపా నేతృత్వంలోని ప్రభుత్వంలో తాను మంత్రిగా చేరనున్నట్టు వస్తున్న పుకార్లను ఆమె ఖండించారు. ‘అలాంటి ఊహాజనిత ప్రచారాలను చేసేవారిని ఆనందించనివ్వండి’ అంటూ సూలే వ్యాఖ్యానించారు.

ఈ ఐక్యతతో ఎన్‌సీపీ కార్యకర్తల్లో ఉత్సాహం నిండింది. కుటుంబ రాజకీయాల్లో కొత్త అధ్యాయం ప్రారంభమైనట్టు కనిపిస్తోంది.