AB de Villiers: ధోనీ 8వ స్థానంలో బ్యాటింగ్ చేస్తే జట్టుకు లాభం లేదు: ఏబీ డివిలియర్స్

AB de Villiers: ఎంఎస్ ధోనీ రిటైర్మెంట్, ఐపీఎల్ 2026లో అతని పాత్రపై దక్షిణాఫ్రికా మాజీ స్టార్ ఏబీ డివిలియర్స్ చేసిన వ్యాఖ్యలు ప్రస్తుతం క్రీడా వర్గాల్లో హాట్ టాపిక్‌గా మారాయి. డివిలియర్స్ ఒక కార్యక్రమంలో మాట్లాడుతూ, ధోనీ కేవలం ఒక ఆటగాడిగా జట్టులో ఉండటంపై తన అభిప్రాయాన్ని కుండబద్దలు కొట్టినట్లు చెప్పారు.

ధోనీ జట్టుకు కెప్టెన్‌గా లేనప్పుడు, 8 లేదా 9వ స్థానంలో బ్యాటింగ్‌కు రావడం వల్ల జట్టుకు పెద్దగా ప్రయోజనం ఉండదని డివిలియర్స్ అభిప్రాయపడ్డారు. ఒకవేళ ధోనీ కేవలం లోయర్ ఆర్డర్‌లో వచ్చి కొన్ని బంతులు మాత్రమే ఆడితే, అది అతను తప్పుడు కారణాల కోసం జట్టులో చోటు ఆక్రమించినట్లు అవుతుందని, అది ధోనీ లాంటి దిగ్గజానికి తగదని సంచలన వ్యాఖ్యలు చేశారు.ధోనీ ఆడాలనుకుంటే కనీసం 5 లేదా 6వ స్థానంలో బ్యాటింగ్‌కు రావాలని, అప్పుడే అతను బాధ్యతాయుతంగా ఎక్కువ బంతులు ఆడి జట్టుపై ప్రభావం చూపగలడని సూచించారు.

చెన్నై సూపర్ కింగ్స్ (CSK) జట్టులోకి సంజూ శాంసన్ రావడంతో, వికెట్ కీపింగ్ బాధ్యతలు కూడా మారే అవకాశం ఉంది. ఇది ధోనీ స్థానంపై మరింత చర్చకు దారితీసింది. అయితే, CSK సీఈఓ కాశీ విశ్వనాథన్ మాత్రం ధోనీ ఐపీఎల్ 2026 సీజన్ మొత్తం అందుబాటులో ఉంటారని, అతను ఆడటం ఖాయమని స్పష్టం చేశారు. 44 ఏళ్ల వయస్సులో కూడా ధోనీ ఫిట్‌నెస్‌ను కాపాడుకుంటూ వస్తుండటం విశేషం, కానీ గత సీజన్ (2025)లో అతని స్ట్రైక్ రేట్, పరుగులు తగ్గడం విమర్శలకు తావిచ్చింది.