Indian Premier League Mega Deal: ఐపీఎల్‌లో మెగా డీల్: 15 వేల కోట్లకు అమ్ముడైన రాజస్థాన్ రాయల్స్

Indian Premier League Mega Deal: ఐపీఎల్ చరిత్రలోనే కళ్లు చెదిరే సరికొత్త రికార్డ్! రాజస్థాన్ రాయల్స్ జట్టు ఇప్పుడు అంతర్జాతీయ బిజినెస్ ప్రపంచంలో హాట్ టాపిక్‌గా మారింది. కేవలం మైదానంలోనే కాదు, బిజినెస్ డీల్స్‌లోనూ ఈ జట్టు 'రాయల్' అని నిరూపించుకుంది. అమెరికాకు చెందిన ఒక ప్రముఖ ఇన్వెస్ట్‌మెంట్ కన్జార్టియం, రాజస్థాన్ రాయల్స్ జట్టును ఏకంగా 15 వేల కోట్ల రూపాయలకు పైగా వెచ్చించి కొనుగోలు చేసింది. ఇది కేవలం ఒక టీమ్ అమ్మకం మాత్రమే కాదు.. ఇండియన్ ప్రీమియర్ లీగ్ గ్లోబల్ బ్రాండ్ పవర్‌కు నిదర్శనం.

అమెరికాలో NBA , NFL వంటి ప్రపంచ స్థాయి లీగ్‌లను శాసించే పెద్ద పెద్ద పెట్టుబడి సంస్థలు ఇప్పుడు ఐపీఎల్ వైపు మొగ్గు చూపుతున్నాయి. రాజస్థాన్ రాయల్స్ జట్టుకున్న 'మనీబాల్' స్ట్రాటజీ, గ్లోబల్ క్రికెట్ అకాడమీలు , బలమైన ఫ్యాన్ బేస్ చూసి ఈ అమెరికా కన్జార్టియం ఇంత భారీ మొత్తాన్ని వెచ్చించింది. 15 వేల కోట్లు అంటే.. ఐపీఎల్ ప్రారంభంలో ఈ జట్టు అమ్ముడైన ధర కంటే ఇది దాదాపు 50 రెట్లు ఎక్కువ!

2008లో షేన్ వార్న్ సారథ్యంలో రాజస్థాన్ రాయల్స్ కేవలం 270 కోట్లకే అమ్ముడైంది. అప్పట్లో తక్కువ బడ్జెట్ జట్టుగా ముద్రపడ్డ రాయల్స్, మొదటి సీజన్ ట్రోఫీ గెలిచి చరిత్ర సృష్టించింది. సంజూ శామ్సన్ నాయకత్వంలో, యశస్వి జైస్వాల్ వంటి యువ కిరణాలతో నేడు ఈ జట్టు గ్లోబల్ ఐకాన్‌గా ఎదిగింది. అందుకే, విదేశీ ఇన్వెస్టర్లు ఈ జట్టు భవిష్యత్తుపై నమ్మకంతో ఇన్ని వేల కోట్లు కుమ్మరిస్తున్నారు.

అమెరికన్ మేనేజ్‌మెంట్ స్టైల్, అత్యాధునిక టెక్నాలజీ మరియు భారీ పెట్టుబడులు తోడైతే.. రాజస్థాన్ రాయల్స్ ఇకపై ఐపీఎల్‌లో తిరుగులేని శక్తిగా మారడం ఖాయం. యజమానులు మారినా, వేల కోట్ల డీల్స్ జరిగినా.. అభిమానులు కోరుకునేది మాత్రం ఒక్కటే.. అది రెండోసారి ఐపీఎల్ ట్రోఫీని ముద్దాడటం! ఈ కొత్త ప్రయాణం రాజస్థాన్ రాయల్స్ రాతను మారుస్తుందా? వేచి చూడాలి.