Uncertainty Over India–Pakistan Match: భారత్-పాక్ మ్యాచ్‌పై సందిగ్ధత: రద్దు వార్తలను కొట్టిపారేసిన శ్రీలంక పోలీసులు!

Uncertainty Over India–Pakistan Match: ఫిబ్రవరి 15న కొలంబో వేదికగా జరగాల్సిన భారత్-పాకిస్థాన్ టీ20 వరల్డ్ కప్ మ్యాచ్‌పై సందిగ్ధత కొనసాగుతున్నప్పటికీ, శ్రీలంక పోలీసులు మాత్రం తమ భద్రతా ఏర్పాట్లలో నిమగ్నమై ఉన్నారు. ఈ హై-ప్రొఫైల్ మ్యాచ్ రద్దు గురించి తమకు ఎలాంటి అధికారిక సమాచారం అందలేదని, అందుకే ముందుగా నిర్ణయించిన ప్లాన్ ప్రకారమే ముందుకు వెళ్తున్నామని పోలీసులు స్పష్టం చేశారు.

శ్రీలంకలోని ఆర్.ప్రేమదాస స్టేడియంలో జరగనున్న మూడు ముఖ్యమైన మ్యాచ్‌ల కోసం (ఫిబ్రవరి 8న శ్రీలంక vs ఐర్లాండ్, ఫిబ్రవరి 15న భారత్ vs పాకిస్థాన్, ఫిబ్రవరి 19న శ్రీలంక vs జింబాబ్వే) పటిష్టమైన భద్రతతో పాటు ట్రాఫిక్ ఆంక్షలను కూడా విధిస్తున్నట్లు పోలీస్ అధికారులు తెలిపారు. దాదాపు 1500 మంది పోలీసులు, 600 మంది ట్రాఫిక్ సిబ్బందిని ఈ ఏర్పాట్ల కోసం కేటాయించారు. ఐసీసీ (ICC) లేదా పాకిస్థాన్ క్రికెట్ బోర్డు (PCB) నుండి మ్యాచ్ రద్దుపై ఇప్పటివరకు క్లారిటీ రాలేదని వారు చెబుతున్నారు.

మరోవైపు, బంగ్లాదేశ్‌కు మద్దతుగా భారత్‌తో మ్యాచ్‌ను బహిష్కరిస్తున్నట్లు పాకిస్థాన్ ప్రధాని షెహబాజ్ షరీఫ్ ఇప్పటికే ప్రకటించారు. ఐసీసీ బంగ్లాదేశ్‌ను టోర్నీ నుండి తొలగించినందుకు నిరసనగా ఈ నిర్ణయం తీసుకున్నట్లు ఆయన పేర్కొన్నారు. అయితే, పాక్ క్రికెట్ బోర్డు మాత్రం ఐసీసీతో తెరవెనుక చర్చలు జరుపుతూ కొన్ని షరతులు పెట్టినట్లు తెలుస్తోంది. ఈ ప్రతిష్టంభన ఎప్పుడు తొలగుతుందో అన్నది ఇప్పుడు ఆసక్తికరంగా మారింది.

టీమిండియా కెప్టెన్ సూర్యకుమార్ యాదవ్ ఈ విషయంలో తమ వైఖరి ఏంటో స్పష్టంగా చెప్పారు. తాము పాకిస్థాన్‌తో ఆడటానికి సిద్ధంగా ఉన్నామని, తమ జట్టు ప్లాన్ ప్రకారమే కొలంబో వెళ్తుందని ఆయన ధీమా వ్యక్తం చేశారు. "మేము మ్యాచ్ ఆడటానికి నిరాకరించలేదు, అవతలి వైపు నుండే ఆ నిర్ణయం వచ్చింది. ఐసీసీ షెడ్యూల్ ఇచ్చింది, మేము దాని ప్రకారం కొలంబో వెళ్తున్నాం. ముంబైలో యూఎస్‌ఏతో, ఢిల్లీలో నమీబియాతో మ్యాచ్‌లు ముగిశాక నేరుగా శ్రీలంక వెళ్తాం" అని సూర్య క్లారిటీ ఇచ్చారు.