High Command Praises Telangana Congress: తెలంగాణ కాంగ్రెస్‌కు అధిష్ఠానం ప్రశంసలు: ఇదే ఉత్సాహంతో పని చేయండి

High Command Praises Telangana Congress: తెలంగాణలో కాంగ్రెస్‌ ప్రభుత్వం ఏర్పడిన తర్వాత జరిగిన రెండు అసెంబ్లీ ఉప ఎన్నికలు, పంచాయతీ మరియు మున్సిపల్‌ ఎన్నికల్లో పార్టీ సాధించిన ఘన విజయాలపై ఏఐసీసీ అధ్యక్షుడు మల్లికార్జున ఖర్గే, లోక్‌సభ ప్రతిపక్ష నేత రాహుల్‌ గాంధీ, పార్టీ సంస్థాగత వ్యవహారాల ప్రధాన కార్యదర్శి కేసీ వేణుగోపాల్‌ హర్షం వ్యక్తం చేశారు. ముఖ్యమంత్రి రేవంత్‌ రెడ్డి, మంత్రులు, పీసీసీ అధ్యక్షుడు మహేశ్‌కుమార్‌ గౌడ్‌తో సహా కష్టపడిన అందరినీ గురువారం అభినందించారు. గత రెండేళ్లలో జరిగిన కార్యక్రమాలు, భవిష్యత్‌ కార్యాచరణలపై సమీక్ష నిర్వహించి, రాష్ట్ర నాయకత్వానికి మార్గదర్శకాలు ఇచ్చేందుకు దిల్లీకి పిలిపించిన అగ్రనేతలు సుమారు రెండు గంటల పాటు విస్తృతంగా చర్చించారు.

ఇప్పటిదాకా అన్నీ సానుకూలంగా సాగుతున్నాయని, ముందు ముందు కూడా కఠిన పరిశ్రమతో మరిన్ని విజయాలు సాధించాలని వారు సూచించారు. మొదట మంత్రులతో సమావేశమైన అధిష్ఠానం నేతలు, తర్వాత ముఖ్యమంత్రి, పీసీసీ అధ్యక్షుడు, ఉపముఖ్యమంత్రి భట్టి విక్రమార్క, సీనియర్‌ మంత్రి ఉత్తమ్‌కుమార్‌ రెడ్డిలతో ప్రత్యేకంగా మాట్లాడారు. ఈ సమావేశంలో ఇటీవలి సింగరేణి టెండర్ల వివాదంపై కూడా విచారణ చేశారని తెలిసింది. స్థానిక సంస్థల ఎన్నికల తర్వాత ప్రభుత్వం అమలు చేస్తున్న వివిధ పథకాలు, సమ్మక్క-సారలమ్మ జాతర నిర్వహణ వంటి అంశాలపై మంత్రులు సీతక్క, ఉత్తమ్‌కుమార్‌ రెడ్డి, పొంగులేటి శ్రీనివాస్‌ రెడ్డి, తుమ్మల నాగేశ్వరరావు, వివేక్‌ తదితరులు వివరాలు అందించారు. గిగ్‌ వర్కర్లకు సంబంధించిన చట్టాన్ని త్వరగా తీసుకురావాలని రాహుల్‌ గాంధీ సలహా ఇచ్చారు. మంత్రులు మాట్లాడుతుండగా ముఖ్యమంత్రి రేవంత్‌ రెడ్డి జోక్యం చేసుకుని, ఈ పథకాలను పటిష్ఠంగా అమలు చేయడానికి తీసుకుంటున్న చర్యలను వివరించారు.

సమ్మక్క-సారలమ్మ జాతర చరిత్ర, ప్రభుత్వం చేపట్టిన కొత్త నిర్మాణాలు, జాతర విజయవంతమైన నిర్వహణపై రాహుల్‌ గాంధీ ఆసక్తి చూపారు. ఈ జాతరకు జాతీయ స్థాయి గుర్తింపు తెచ్చేలా ఒక సినిమా నిర్మిస్తే మంచిదని సూచించారు. జాతర విజయవంతమైన నిర్వహణపై ఖర్గే అభినందనలు తెలుపుతూ, మమ్మల్ని కూడా ఆహ్వానించి ఉంటే వచ్చేవాళ్లమని నవ్వుతూ అన్నారు.

గత అసెంబ్లీ ఎన్నికల్లో 10 వేలకు మించి ఓట్ల తేడాతో ఓడిపోయిన నియోజకవర్గాల్లో ఇన్‌ఛార్జులను మార్చాలని అధిష్ఠానం సూచించింది.

మరిన్ని విజయాలు సాధిస్తాం: మహేశ్‌కుమార్‌ గౌడ్‌

సమావేశం అనంతరం పీసీసీ అధ్యక్షుడు మహేశ్‌కుమార్‌ గౌడ్‌ మీడియాతో మాట్లాడుతూ, చర్చల సారాంశాన్ని వెల్లడించారు. "జూబ్లీహిల్స్‌ ఉప ఎన్నిక నుంచి గ్రామపంచాయతీలు, మున్సిపల్‌ ఎన్నికల వరకు సాధించిన విజయాలను అగ్రనేతలు సమీక్షించారు. ఈ ఫలితాలపై వారు సంతోషం వ్యక్తం చేశారు. రాష్ట్రంలో 80 శాతం ప్రజలు కాంగ్రెస్‌ ప్రభుత్వం అందిస్తున్న సంక్షేమ, అభివృద్ధి పథకాలను ఆస్వాదిస్తున్నారు. మున్సిపల్‌ ఎన్నికల ఫలితాలు దానికి సాక్ష్యమని ఖర్గే అన్నారు" అని ఆయన తెలిపారు. మార్చి రెండో వారానికి నామినేటెడ్‌ పదవులు, మిగిలిన పీసీసీ కార్యవర్గం, జిల్లా, బ్లాక్‌ కమిటీలను భర్తీ చేస్తామని చెప్పారు.

రాజగోపాల్‌ రెడ్డితో అధిష్ఠానం చర్చలు

ఎమ్మెల్యే కోమటిరెడ్డి రాజగోపాల్‌ రెడ్డి ఇటీవల పార్టీ, ముఖ్యమంత్రిపై చేసిన వివాదాస్పద వ్యాఖ్యలపై విలేకర్లు ప్రశ్నించగా, "ఆ అంశంపై కూడా చర్చ జరిగింది. త్వరలో అధిష్ఠానం ఆయన్ను పిలిచి మాట్లాడుతుంది" అని మహేశ్‌కుమార్‌ గౌడ్‌ స్పందించారు. రాజ్యసభ ఎన్నికల అంశంపై కూడా చర్చ జరిగిందని, రెండు మూడు రోజుల్లో ముఖ్యమంత్రి, తనను మరోసారి పిలిచి మాట్లాడతామని అధిష్ఠానం నేతలు చెప్పినట్లు ఆయన తెలిపారు.