Phone Tapping Case: కేటీఆర్‌కు సిట్‌ నోటీసు: ఫోన్ అక్రమ ట్యాపింగ్ కేసులో విచారణకు పిలుపు

Phone Tapping Case: ఫోన్ అక్రమ ట్యాపింగ్ కేసు దర్యాప్తులో మరో ముఖ్యమైన అడుగు వేసింది ప్రత్యేక దర్యాప్తు బృందం (సిట్). భారత రాష్ట్ర సమితి (భారాస్) కార్యనిర్వాహక అధ్యక్షుడు, మాజీ మంత్రి కేటీఆర్‌కు సిట్ 160 సీఆర్‌పీసీ కింద నోటీసు జారీ చేసింది. శుక్రవారం (జనవరి 23) ఉదయం 11 గంటలకు జూబ్లీహిల్స్‌లోని సిట్ కార్యాలయానికి విచారణ నిమిత్తం హాజరు కావాలని ఏసీపీ పి. వెంకటగిరి సూచించారు.

ఈ నెల 20న ఇదే కేసులో మాజీ మంత్రి హరీశ్‌రావును సిట్ విచారించిన సంగతి తెలిసిందే. ఇప్పుడు కేటీఆర్‌కు నోటీసు జారీ చేయడంతో దర్యాప్తు మరింత ఊపందుకుంది. నోటీసులో 'కేసు దర్యాప్తుకు సంబంధించిన కీలక అంశాలు మీకు తెలిసి ఉన్న నేపథ్యంలో వాటిని వెల్లడించేందుకు విచారణకు హాజరు కావాలి' అని పేర్కొన్నారు.

భారాస ప్రభుత్వ హయాంలో స్పెషల్ ఇంటెలిజెన్స్ బ్రాంచ్ (ఎస్‌ఐబీ) ద్వారా ఫోన్లు అక్రమంగా ట్యాప్ చేశారనే ఆరోపణలపై 2024 మార్చిలో పంజాగుట్ట పోలీస్ స్టేషన్‌లో కేసు నమోదైంది. హైదరాబాద్ పోలీస్ కమిషనర్ సజ్జనార్ నేతృత్వంలోని సిట్ ఈ కేసును దర్యాప్తు చేస్తోంది. కేసు నమోదై దాదాపు రెండేళ్లు అవుతున్నా ఇంకా పూర్తి కాలేదు.

ప్రధాన నిందితుడు ప్రభాకర్‌రావు ఎక్కువ కాలం అమెరికాలో ఉండిపోవడంతో దర్యాప్తు ఆలస్యమైంది. ఇటీవల రెడ్ కార్నర్ నోటీసు తర్వాత ఆయన భారత్‌కు తిరిగి వచ్చి విచారణకు హాజరయ్యారు. ఆయన సమాచారం ఆధారంగా సిట్ దర్యాప్తును వేగవంతం చేసింది. దీంతో హరీశ్‌రావు తర్వాత కేటీఆర్‌ను విచారణకు పిలిచింది.

కేటీఆర్‌ను భారాస ఆర్థిక లావాదేవీలపై ప్రశ్నించే అవకాశం ఉందని సమాచారం. పార్టీ వర్కింగ్ ప్రెసిడెంట్‌గా ఆయన పాత్రలో ఆర్థిక వనరుల సమకూర్పు, ఎలక్టోరల్ బాండ్లు, ప్రైవేటు పంచాయితీలు వంటి అంశాలపై దృష్టి సారించినట్లు తెలుస్తోంది. ఎస్‌ఐబీ ఓఎస్‌డీగా పనిచేసిన ప్రభాకర్‌రావు బృందం ద్వారా వ్యాపారులను బెదిరించి భారాసకు రూ.12 కోట్ల ఎలక్టోరల్ బాండ్లు, మరికొందరికి రూ.3 కోట్లు ఇప్పించారని వ్యాపారి శ్రీధర్‌రావు ఫిర్యాదు చేశారు. ఇలాంటి ఫిర్యాదులు మరికొందరు వ్యాపారులు కూడా చేశారు.

విచారణ సమయంలో భారాస నేతలు, కార్యకర్తలు పెద్ద ఎత్తున సిట్ కార్యాలయానికి తరలివచ్చే అవకాశం ఉండటంతో పోలీసులు తగిన ఏర్పాట్లు చేస్తున్నారు. ఈ కేసు రాష్ట్ర రాజకీయాల్లో కీలక చర్చనీయాంశంగా మారింది.