Telangana Municipal Elections: తెలంగాణ మున్సిపల్ ఎన్నికలు: ప్రతి ఓటరూ పోలింగ్ కేంద్రానికి రావాలి.. నేతలతో సీఎం రేవంత్ రెడ్డి సమీక్ష

Telangana Municipal Elections: తెలంగాణలో జరగనున్న మున్సిపల్ ఎన్నికల్లో పార్టీ నేతలు పూర్తి సమన్వయంతో పనిచేయాలని ముఖ్యమంత్రి ఎ. రేవంత్ రెడ్డి సూచించారు. ఎన్నికల ప్రచారం, పోలింగ్ వ్యూహాలు, ఇతర కీలక అంశాలపై కాంగ్రెస్ పార్టీ ముఖ్య నేతలు, మంత్రులతో ఆయన జూమ్ సమావేశం నిర్వహించారు.

ఈ సమీక్ష సమావేశంలో పార్టీ రాష్ట్ర వ్యవహారాల ఇన్‌ఛార్జ్ మీనాక్షి నటరాజన్, పీసీసీ అధ్యక్షుడు మహేశ్‌కుమార్ గౌడ్, ఉప ముఖ్యమంత్రి భట్టి విక్రమార్క, వివిధ డీసీసీ అధ్యక్షులు తదితరులు పాల్గొన్నారు.

పార్లమెంట్ నియోజకవర్గాల వారీగా పార్టీ స్థితిగతులను సీఎం రేవంత్ రెడ్డి సమీక్షించారు. బలహీనంగా ఉన్న మున్సిపాలిటీల్లో పోలింగ్ వ్యూహాలపై విస్తృతంగా చర్చ జరిగింది. స్థానిక నేతల నేతృత్వంలోనే పోల్ మేనేజ్‌మెంట్ సమర్థవంతంగా జరిగేలా చూడాలని మంత్రులకు, నేతలకు ఆదేశాలు జారీ చేశారు.

ప్రతి ఓటరూ పోలింగ్ కేంద్రానికి తప్పకుండా వచ్చేలా చర్యలు తీసుకోవాలని సీఎం ఆదేశించారు. ఓటర్లతో నిరంతర సంప్రదింపులు జరిపి, వారి సమస్యలు తెలుసుకోవాలని, ఇవాళే కాకుండా రేపటి రోజుల్లోనూ నేతలు ఓటర్లకు అందుబాటులో ఉండాలని ఆయన దిశానిర్దేశం చేశారు.

ఈ సమావేశంలో పార్టీ శ్రేణులు ఏకగ్రీవంగా పనిచేసి, మున్సిపల్ ఎన్నికల్లో భారీ విజయం సాధించాలనే లక్ష్యంతో ముందుకు సాగాలని సీఎం రేవంత్ రెడ్డి పిలుపునిచ్చారు.