Maruti Suzuki : త్వరలోనే వాటికి స్వస్తి..చిన్న కార్లతో తెగ ఇబ్బంది పడుతున్న మారుతి

Maruti Suzuki : భారతదేశపు అతిపెద్ద వాహన తయారీ సంస్థ మారుతి సుజుకి ఇండియా లిమిటెడ్ ఉత్పత్తి జూన్ నెలలో ఐదేళ్ల కనిష్ట స్థాయికి పడిపోయింది. దీనికి ప్రధాన కారణం చిన్న కార్లు, కాంపాక్ట్ సెడాన్‌ల డిమాండ్ నిలకడగా తగ్గడం. సాధారణంగా మారుతి ప్రతి రెండేళ్లకోసారి జూన్‌లో తమ ప్లాంట్‌లలో మెయింటెనెన్స్ పనుల కోసం ఉత్పత్తిని నిలిపివేస్తుంది. అయితే, ఈ సంవత్సరం ఉత్పత్తి 2020 తర్వాత ఈ నెలలో అత్యల్పం. కంపెనీ నెలవారీ ఉత్పత్తి నివేదిక ప్రకారం.. జూన్ 2021లో 163,037 యూనిట్లు ఉండగా, అది ఇప్పుడు 23 శాతం తగ్గి 125,392 యూనిట్లకు పడిపోయింది. ఈ పతనం ఒకప్పుడు మారుతికి ప్రధాన బలం అయిన చిన్న కార్ల విభాగంలో డిమాండ్ తగ్గిపోవడాన్ని సూచిస్తుంది. ప్రస్తుతం ప్రజలు ఎస్‌యూవీలు, ప్రీమియం మోడళ్ల వైపు మొగ్గు చూపుతున్నారు. సొసైటీ ఆఫ్ ఇండియన్ ఆటోమొబైల్ మాన్యుఫ్యాక్చరర్స్ ప్రకారం, ఇప్పుడు మొత్తం అమ్మకాల్లో ఎస్‌యూవీల వాటా 66 శాతంగా ఉంది.

దీంతో పాటు, మారుతి మోడల్స్‌లో ఎలక్ట్రిక్ వాహనాలు లేకపోవడం కూడా ఒక లోపంగా మారింది. దీని వల్ల ఎలక్ట్రిక్ వాహనాల విభాగంలో మారుతి వెనుకబడి ఉంది. టాటా మోటార్స్, మహీంద్రా అండ్ మహీంద్రా ఈ విభాగంలో నిలకడగా వృద్ధిని సాధిస్తున్నాయి. డీలర్లు చెబుతున్న దాని ప్రకారం, షోరూమ్‌లలో ఆల్టో, ఎస్-ప్రెస్సో, డిజైర్, సెలెరియో వంటి మోడళ్లకు స్టాక్ నిలబడిపోయింది. దీంతో అదనపు స్టాక్ పేరుకుపోకుండా ఉండటానికి కంపెనీ ఉత్పత్తిని నియంత్రించాల్సి వస్తుంది.

కోటక్ ఇన్‌స్టిట్యూషనల్ ఈక్విటీస్ జూలై 1న విడుదల చేసిన నివేదిక ప్రకారం.. జూన్ త్రైమాసికంలో మారుతి దేశీయ అమ్మకాల్లో ఏడాది వారీగా 4.5 శాతం పతనం కనిపించింది. ఇందులో ముఖ్యంగా చిన్న మోడళ్ల అమ్మకాల్లో 36 శాతం భారీ పతనం నమోదైంది. మంగళవారం SIAM విడుదల చేసిన గణాంకాల ప్రకారం.. భారతదేశంలో ప్యాసింజర్ వెహికల్ అమ్మకాలు ఏప్రిల్-జూన్ కాలంలో గత సంవత్సరంతో పోలిస్తే 1.4 శాతం తగ్గి 10 లక్షల యూనిట్లకు చేరాయి. దీంతో గత నాలుగేళ్ల వృద్ధి ధోరణికి బ్రేక్ పడింది.