TVS Motor : టీవీఎస్ మెగా రికార్డ్..90 రోజుల్లో 15 లక్షల బండ్లు..ఈవీ సేల్స్‌లోనూ సునామీ

TVS Motor : భారతీయ ఆటోమొబైల్ దిగ్గజం టీవీఎస్ మోటార్ కంపెనీ సరికొత్త చరిత్ర సృష్టించింది. 2025-26 ఆర్థిక సంవత్సరం మూడో త్రైమాసికంలో కనీవినీ ఎరుగని రీతిలో అమ్మకాలను నమోదు చేసి, ఇండస్ట్రీ వర్గాలను ఆశ్చర్యపరిచింది. గడచిన కేవలం మూడు నెలల కాలంలోనే ఏకంగా 15.44 లక్షల వాహనాలను విక్రయించి, తన పాత రికార్డులన్నింటినీ తుడిచిపెట్టేసింది. గత ఏడాదితో పోలిస్తే ఇది 27 శాతం అద్భుతమైన వృద్ధి కావడం విశేషం. ద్విచక్ర వాహనాలు, త్రిచక్ర వాహనాలు, ఎగుమతుల విభాగంలో టీవీఎస్ తిరుగులేని ఆధిపత్యాన్ని చాటుకుంది.

టీవీఎస్ కంపెనీ సాధించిన ఈ భారీ విజయంలో టూ-వీలర్ సెగ్మెంట్ కీలక పాత్ర పోషించింది. మూడో త్రైమాసికంలో టీవీఎస్ టూ-వీలర్ల విక్రయాలు 25% పెరిగి 14.84 లక్షల యూనిట్లకు చేరుకున్నాయి. గత ఏడాది ఇదే సమయంలో ఈ సంఖ్య 11.83 లక్షలుగా ఉండేది. అటు మోటార్ సైకిళ్లు, ఇటు స్కూటర్లు.. రెండింటికీ మార్కెట్లో విపరీతమైన డిమాండ్ కనిపించింది. ముఖ్యంగా యువతను ఆకర్షించే అపాచీ, రోనిన్ వంటి మోడళ్లతో పాటు జూపిటర్ స్కూటర్లు హాట్ కేకుల్లా అమ్ముడయ్యాయి.

కేవలం టూ-వీలర్లే కాదు, త్రిచక్ర వాహనాల విభాగంలో కూడా టీవీఎస్ అదరగొట్టింది. గతేడాది 0.29 లక్షలుగా ఉన్న త్రిచక్ర వాహనాల విక్రయాలు, ఈ ఏడాది ఏకంగా 106 శాతం పెరిగి 0.60 లక్షల యూనిట్లకు చేరాయి. నగరాల్లో లాస్ట్-మైల్ కనెక్టివిటీకి పెరుగుతున్న ఆదరణ కారణంగా కమర్షియల్ విభాగంలో టీవీఎస్ ఆటోలకు భారీ డిమాండ్ ఏర్పడింది. విదేశీ మార్కెట్లలో కూడా టీవీఎస్ జెండా ఎగురవేసింది. అంతర్జాతీయ ఎగుమతులు 40% పెరిగి 4.10 లక్షల యూనిట్లకు చేరుకోవడం కంపెనీ గ్లోబల్ బ్రాండ్ వాల్యూను చాటిచెబుతోంది.

గత డిసెంబర్ నెల టీవీఎస్ చరిత్రలో ఒక మైలురాయిగా నిలిచిపోనుంది. ఒక్క నెలలోనే 4,81,389 వాహనాలను విక్రయించి, గతేడాది డిసెంబర్ కంటే 50% వృద్ధిని సాధించింది. దేశీయ మార్కెట్లో టూ-వీలర్ సేల్స్ 54% పెరిగాయి. ఇందులో బైకులు 2,16,867 యూనిట్లు, స్కూటర్లు 1,98,017 యూనిట్లు అమ్ముడయ్యాయి. అంటే ప్రతి రోజూ వేల సంఖ్యలో టీవీఎస్ బండ్లు షోరూమ్ల నుండి బయటకు వచ్చాయన్నమాట.

పర్యావరణ హితమైన ఎలక్ట్రిక్ వాహనాల సెగ్మెంట్లో టీవీఎస్ స్పీడ్ చూస్తే ప్రత్యర్థులకు వణుకు పుట్టాల్సిందే. డిసెంబర్ 2025 లో టీవీఎస్ ఈవీ విక్రయాలు ఏకంగా 77 శాతం పెరిగాయి. గత ఏడాది 20,171 యూనిట్లు అమ్ముడవ్వగా, ఈసారి ఆ సంఖ్య 35,605 యూనిట్లకు చేరింది. టీవీఎస్ ఐక్యూబ్ స్కూటర్ కస్టమర్ల మొదటి ఎంపికగా మారింది. పెరుగుతున్న పెట్రోల్ ధరల నేపథ్యంలో ఈవీ మార్కెట్లోకి టీవీఎస్ దూసుకుపోతుండటం విశేషం.

ప్రస్తుత అమ్మకాల జోరు చూస్తుంటే 2026 ఏడాదిలో టీవీఎస్ మరిన్ని కొత్త రికార్డులను సృష్టించడం ఖాయంగా కనిపిస్తోంది. కొత్త మోడళ్ల పరిచయం, లేటెస్ట్ టెక్నాలజీ, విస్తృతమైన సర్వీస్ నెట్‌వర్క్ ఈ విజయానికి ప్రధాన కారణాలని మార్కెట్ విశ్లేషకులు చెబుతున్నారు. టూ-వీలర్ సెగ్మెంట్ లో టీవీఎస్ వేస్తున్న అడుగులు చూస్తుంటే, రాబోయే రోజుల్లో ఇతర దిగ్గజ కంపెనీలకు గట్టి పోటీ తప్పేలా లేదు.