Telecom Relief : ఎయిర్‌టెల్, వొడాఫోన్ ఐడియాకు ఊహించని విజయం.. వన్-టైమ్ స్పెక్ట్రమ్ ఛార్జీలను రద్దు చేసిన బాంబే హైకోర్టు

Telecom Relief : భారత టెలికాం రంగంలోని అగ్రగామి సంస్థలైన భారతీ ఎయిర్‌టెల్, వొడాఫోన్ ఐడియాలకు బాంబే హైకోర్టు నుంచి ఊహించని పెద్ద చట్టపరమైన, ఆర్థికపరమైన ఊరట లభించింది. గత కొన్నేళ్లుగా ఈ కంపెనీల తలపై కత్తిలా వేలాడుతున్న కేంద్ర ప్రభుత్వ వన్-టైమ్ స్పెక్ట్రమ్ ఛార్జ్ డిమాండ్‌ను న్యాయస్థానం పూర్తిగా కొట్టివేసింది. దీనితో ఈ టెలికాం సంస్థలపై ఉన్న భారీ ఆర్థిక భారం ఒక్కసారిగా తొలగిపోయింది. ఈ కేసును విచారించిన బాంబే హైకోర్టు ధర్మాసనం కేంద్ర ప్రభుత్వంపై కీలక వ్యాఖ్యలు చేసింది. టెలికాం కంపెనీలకు లైసెన్స్ జారీ చేసిన ఎన్నో ఏళ్ల తర్వాత, పాత తేదీల నుంచి ఆర్థిక నిబంధనలను తమకు నచ్చినట్లు మార్చే హక్కు ప్రభుత్వానికి లేదని కోర్టు స్పష్టం చేసింది. ఈ తీర్పు వల్ల టెలికాం రంగంలో చాలా కాలంగా ఉన్న అస్పష్టత తొలగిపోవడమే కాకుండా, కంపెనీలు గతంలో ప్రభుత్వానికి సమర్పించిన బ్యాంక్ గ్యారంటీలు కూడా తిరిగి వాటికి దక్కనున్నాయి.

అసలు ఏమిటీ స్పెక్ట్రమ్ వివాదం?

దేశవ్యాప్తంగా సంచలనం సృష్టించిన సుప్రీంకోర్టు 2G స్పెక్ట్రమ్ తీర్పు తర్వాత ఈ వివాదం మొదలైంది. టెలికాం శాఖ జూలై 2008 నుంచి 6.2 MHz కంటే ఎక్కువ స్పెక్ట్రమ్‌ను కలిగి ఉన్న కంపెనీల నుంచి అదనపు వన్-టైమ్ ఛార్జీలను వసూలు చేయాలని ఏకపక్షంగా నిర్ణయించింది. స్పెక్ట్రమ్ వాడుక రుసుముతో పాటు ఈ అదనపు మొత్తాన్ని కూడా కట్టాల్సిందేనంటూ 2012లో కేంద్రం ఎయిర్‌టెల్, వొడాఫోన్‌లకు డిమాండ్ నోటీసులు పంపింది. దీనిని సవాలు చేస్తూ కంపెనీలు కోర్టును ఆశ్రయించాయి.

కోర్టులో కంపెనీల బలమైన వాదన

న్యాయస్థానంలో ఎయిర్‌టెల్, వొడాఫోన్ ఐడియా తరఫు న్యాయవాదులు గట్టిగా వాదించారు. 1885 నాటి ఇండియన్ టెలిగ్రాఫ్ యాక్ట్‌లో గానీ, తాము ప్రభుత్వంతో చేసుకున్న లైసెన్స్ ఒప్పందాలలో గానీ పాత తేదీల నుంచి అదనపు ఫీజులు వసూలు చేసే అధికారం ప్రభుత్వానికి ఎక్కడా లేదని నిరూపించారు. అంతేకాకుండా, తాము ఇప్పటికే 1999 నాటి టెలికాం పాలసీ ప్రకారం రెవెన్యూ-షేరింగ్ మోడల్‌ను పాటిస్తున్నామని, అదనపు స్పెక్ట్రమ్ వచ్చినప్పుడల్లా ప్రభుత్వానికి రాబడిని పెంచి ఇస్తున్నామని, కాబట్టి ఈ కొత్త వన్-టైమ్ ఛార్జ్ పూర్తిగా అన్యాయమని వాదించారు.

మ్యాచ్ మొదలయ్యాక రూల్స్ మార్చకూడదు

బాంబే హైకోర్టు జస్టిస్ మనీష్ పితాలే, జస్టిస్ శ్రీరామ్ వి.శిరసాత్‌లతో కూడిన ధర్మాసనం కంపెనీల వాదనతో పూర్తిగా ఏకీభవించింది. టెలికాం లైసెన్స్ అనేది ఒక పక్కా లీగల్ కాంట్రాక్ట్ అని, దానికి ప్రభుత్వం కూడా కట్టుబడి ఉండాలని పేర్కొంది. ఈ సందర్భంగా కోర్టు చాలా ఆసక్తికరమైన కామెంట్ చేస్తూ.. "మ్యాచ్ మొదలైన తర్వాత ఆట నియమాలను మార్చడం కుదరదు" అని తేల్చిచెప్పింది. కేవలం ప్రభుత్వ ఖజానా నింపడాన్ని ప్రజా ప్రయోజనం అనలేమని, ఈ విషయంలో మద్రాస్ హైకోర్టు గతంలో ఇచ్చిన ఏయిర్‌సెల్ తీర్పుతో తాము ఏకీభవించడం లేదని జడ్జీలు స్పష్టం చేశారు.

సామాన్య మొబైల్ వినియోగదారుడికి లాభమేంటి?

పైకి ఇది కేవలం ప్రభుత్వం, కంపెనీల మధ్య గొడవలా కనిపించినా.. దీని ప్రభావం సామాన్య మొబైల్ కస్టమర్లపై కూడా ఉంటుంది. 1999 నాటి నేషనల్ టెలికాం పాలసీ ముఖ్య ఉద్దేశమే సామాన్యుడికి చౌకగా మొబైల్ సేవలు అందించడం, గ్రామగ్రామానికీ నెట్‌వర్క్ తీసుకెళ్లడం. ఇప్పుడు ఎయిర్‌టెల్, వొడాఫోన్‌ల పైనుంచి ఈ వేల కోట్ల జరిమానా భారం దిగిపోవడంతో, ఈ మిగిలిన డబ్బును కంపెనీలు భవిష్యత్తు సాంకేతికత అభివృద్ధికి, నెట్‌వర్క్ కనెక్టివిటీ పెంచడానికి ఉపయోగించవచ్చు. ఈ తీర్పు వల్ల టెలికాం రంగంలో పెట్టుబడులు పెరిగి కస్టమర్లకు మెరుగైన నెట్‌వర్క్ సర్వీసులు అందుతాయని ఎయిర్‌టెల్ కూడా హర్షం వ్యక్తం చేసింది.