Oil Crisis : ప్రపంచానికి ముంచుకొస్తున్న చమురు గండం.. సౌదీ అరాంకో బాస్ సంచలన హెచ్చరిక

Oil Crisis : ప్రపంచ చమురు మార్కెట్ ఇప్పుడు మునుపెన్నడూ లేని విధంగా ఒక భారీ సంక్షోభం దిశగా పయనిస్తోంది. గల్ఫ్ దేశాలలో పెరుగుతున్న ఉద్రిక్తతలు సామాన్యుడి జేబుకు చిల్లు పెట్టేలా కనిపిస్తున్నాయి. ప్రపంచంలోనే అతిపెద్ద చమురు ఉత్పత్తి సంస్థ అయిన సౌదీ అరాంకో తాజాగా ఒక గట్టి వార్నింగ్ ఇచ్చింది. హోర్ముజ్ జలసంధి వద్ద నెలకొన్న ఆటంకాలు ఇలాగే కొనసాగితే, ముడి చమురు మార్కెట్ కోలుకోవడానికి 2027 వరకు సమయం పడుతుందని అరాంకో సీఈఓ అమీన్ నాసర్ స్పష్టం చేశారు. ఇది చరిత్రలోనే అతిపెద్ద ఇంధన సరఫరా సంక్షోభమని ఆయన అభివర్ణించారు.

హోర్ముజ్ సెగ.. ఎందుకింత భయం?

హోర్ముజ్ జలసంధి అనేది ప్రపంచ చమురు రవాణాకు అత్యంత కీలకమైన మార్గం. ప్రపంచవ్యాప్తంగా రవాణా అయ్యే ముడి చమురులో సింహభాగం ఈ మార్గం గుండానే వెళ్లాలి. ఇక్కడ ఏ చిన్న అంతరాయం కలిగినా, చమురు సరఫరా వ్యవస్థ మొత్తం అస్తవ్యస్తమవుతుంది. ప్రస్తుతం ఇరాన్ వివాదం కారణంగా ఇక్కడ రాకపోకలు స్తంభించిపోయాయి. దీనివల్ల అంతర్జాతీయ మార్కెట్‌లో క్రూడాయిల్ ధరలు ఆకాశాన్ని తాకుతున్నాయి. చమురు దిగుమతులపై ఆధారపడే భారత్ వంటి దేశాలపై ఈ ప్రభావం మరింత తీవ్రంగా ఉండబోతోంది.

దారి తెరిచినా కష్టమే

ఒకవేళ హోర్ముజ్ మార్గాన్ని ఈ రోజే పూర్తిగా తెరిచేసినా, సమస్య వెంటనే పరిష్కారం కాదని అరాంకో అధినేత పేర్కొన్నారు. సరఫరా గొలుసు ఇప్పటికే తీవ్రంగా దెబ్బతిన్నందున, మార్కెట్ మళ్లీ సాధారణ స్థితికి రావడానికి కనీసం కొన్ని నెలల సమయం పడుతుందని ఆయన విశ్లేషించారు. ఇప్పటి వరకు జరిగిన నష్టం చాలా ఎక్కువని, ప్రపంచ దేశాలు ఈ దీర్ఘకాలిక అనిశ్చితికి సిద్ధంగా ఉండాలని ఆయన సూచించారు.

ఉత్పత్తి పెంచేందుకు సౌదీ రెడీ

ఈ సంక్షోభం మధ్యలో సౌదీ అరాంకో ఒక ఊరటనిచ్చే వార్త కూడా చెప్పింది. మార్కెట్‌లో డిమాండ్ పెరిగితే కేవలం మూడు వారాల్లోనే రోజుకు 1.2 కోట్ల బ్యారెళ్ల గరిష్ట స్థాయి ఉత్పత్తిని చేరుకోగలమని కంపెనీ ధీమా వ్యక్తం చేసింది. మరోవైపు ప్రపంచం చమురు కొరతతో వణికిపోతుంటే, సౌదీ అరాంకో మాత్రం కాసుల వర్షంలో తడిసిముద్దవుతోంది. చమురు ధరలు పెరగడం వల్ల ఈ త్రైమాసికంలో కంపెనీ లాభాలు ఏకంగా 25 శాతం పెరిగాయి. ఇరాన్ వివాదం వల్ల ధరలకు మద్దతు లభించడం అరాంకోకు కలిసి వచ్చింది.