National Highways : రోడ్ల మీద కాసులు కురిపిస్తున్న కేంద్రం.. 35 వేల కోట్ల నిధి కోసం హైవేల వేలం

National Highways : దేశంలో రవాణా వ్యవస్థను ప్రపంచ స్థాయికి తీసుకెళ్లేందుకు కేంద్ర ప్రభుత్వం ఒక భారీ వ్యూహాన్ని అమలు చేస్తోంది. ఇప్పటికే నిర్మించిన జాతీయ రహదారుల ద్వారా భారీగా నిధులను సేకరించి, ఆ సొమ్ముతో కొత్త రోడ్ల నెట్‌వర్క్‌ను నిర్మించాలని నిర్ణయించింది. దీనికోసం వచ్చే ఆర్థిక సంవత్సరంలో (2026-27) దేశవ్యాప్తంగా ఉన్న 28 ప్రధాన హైవేలను ప్రైవేట్ కంపెనీలకు లీజుకు ఇవ్వడం ద్వారా రూ.35,000 కోట్లు సేకరించాలని నేషనల్ హైవేస్ అథారిటీ ఆఫ్ ఇండియా (NHAI) ఒక మెగా ప్లాన్ సిద్ధం చేసింది.

ఏమిటీ అసెట్ మోనెటైజేషన్? డబ్బు ఎలా వస్తుంది?

ప్రభుత్వం దగ్గర ఉన్న ఆస్తులను అమ్మకుండా, ఒక నిర్ణీత కాలానికి ప్రైవేట్ సంస్థలకు అప్పగించి నిధులు సేకరించడాన్ని అసెట్ మోనెటైజేషన్ అంటారు. ఇందులో భాగంగా సుమారు 1,800 కిలోమీటర్ల పొడవైన 28 హైవే స్పెచ్‌లను ప్రైవేట్ ఇన్వెస్టర్లకు లీజుకు ఇస్తారు. టోల్-ఆపరేట్-ట్రాన్స్‌ఫర్ (TOT) లేదా ఇన్‌ఫ్రాస్ట్రక్చర్ ఇన్వెస్ట్‌మెంట్ ట్రస్ట్ మోడల్ ద్వారా ఈ ప్రక్రియ జరుగుతుంది. అంటే ప్రైవేట్ కంపెనీలు ప్రభుత్వానికి ఒకేసారి భారీ మొత్తాన్ని చెల్లించి, ఆ రోడ్లపై టోల్ వసూలు చేసుకునే హక్కును పొందుతాయి. ఈ నిధులతో ప్రభుత్వం మరిన్ని కొత్త ఎక్స్‌ప్రెస్‌వేలను నిర్మిస్తుంది.

హర్యానా, యూపీ హైవేలకే ఫుల్ డిమాండ్

NHAI సిద్ధం చేసిన కొత్త జాబితాలో హర్యానా రాష్ట్రం నుంచి అత్యధిక హైవేలు ఉన్నాయి. ఆ తర్వాత ఉత్తరప్రదేశ్ రెండో స్థానంలో నిలిచింది. ఈ రాష్ట్రాల్లోని హైవేలపై ట్రాఫిక్ ఎక్కువగా ఉండటంతో ప్రైవేట్ ఇన్వెస్టర్లు ఇక్కడ పెట్టుబడులు పెట్టేందుకు క్యూ కడుతున్నారు. విదేశీ పెన్షన్ ఫండ్స్, సావరీన్ వెల్త్ ఫండ్స్ కూడా నేరుగా మన రోడ్డు ప్రాజెక్టులలో పెట్టుబడి పెట్టేలా నిబంధనలను సడలించడం ఈ రంగానికి మరింత ఊపునిస్తోంది. గత ఏడాది కేవలం నాలుగు రాష్ట్రాల్లోని 260 కిమీ రోడ్ల ద్వారానే ప్రభుత్వం రూ.9,000 కోట్లు వసూలు చేయడం గమనార్హం.

నేషనల్ మోనెటైజేషన్ పైప్‌లైన్ 2.0 లక్ష్యాలు

కేంద్ర ప్రభుత్వం నేషనల్ మోనెటైజేషన్ పైప్‌లైన్ కింద 2026 నుంచి 2030 వరకు అంటే ఐదేళ్ల కాలంలో కేవలం రహదారుల రంగం నుండే రూ.4.42 లక్షల కోట్లు సమీకరించాలని లక్ష్యంగా పెట్టుకుంది. వచ్చే ఆర్థిక సంవత్సరంలో అన్ని రంగాల నుండి కలిపి రూ.68,770 కోట్లు రాబట్టాలని ప్రభుత్వం చూస్తోంది. గతేడాది విజయవంతంగా రూ.29,000 కోట్లు సేకరించిన రవాణా మంత్రిత్వ శాఖ, ఇప్పుడు మరింత దూకుడుగా కొత్త ప్రాజెక్టులను మోనెటైజేషన్ పరిధిలోకి తెస్తోంది.

సామాన్యుడికి లాభమేంటి?

ఈ పథకం వల్ల సామాన్యుడికి రెండు రకాల ప్రయోజనాలు ఉన్నాయి. ఒకటి, ప్రభుత్వం వద్ద నిధుల కొరత ఉండదు కాబట్టి కొత్త రోడ్లు వేగంగా పూర్తవుతాయి. దీనివల్ల ప్రయాణ సమయం తగ్గి, రవాణా ఖర్చులు తగ్గుతాయి, తద్వారా నిత్యావసరాల ధరలు అదుపులోకి వస్తాయి. రెండు, InvITల ద్వారా సామాన్య ప్రజలు కూడా ప్రభుత్వ హైవేలపై పెట్టుబడి పెట్టవచ్చు. స్టాక్ మార్కెట్ ద్వారా ఈ ట్రస్టులలో డబ్బు పెడితే, హైవేల నుంచి వచ్చే టోల్ ఆదాయంలో కొంత భాగం మీకు డివిడెండ్ రూపంలో అందుతుంది. ఇది ఒక సురక్షితమైన, మంచి రిటర్న్స్ ఇచ్చే పెట్టుబడి మార్గంగా మారుతోంది.