Excise Duty : E22 నుంచి E30 ఇంధనాలకు బూస్ట్.. కేంద్రం నిర్ణయంతో ఎవరికి ఎక్కువ లాభం?

Excise Duty : భారతదేశంలో హరిత ఇంధనాన్ని ప్రోత్సహించే దిశగా కేంద్ర ప్రభుత్వం జూన్ 11న ఒక సంచలన నిర్ణయం తీసుకుంది. దేశంలో కాలుష్యాన్ని తగ్గించడంతో పాటు విదేశీ చమురుపై ఆధారపడటాన్ని తగ్గించేందుకు వీలుగా ఎథనాల్ మిశ్రిత పెట్రోల్‌పై సెంట్రల్ ఎక్సైజ్ డ్యూటీని పూర్తిగా రద్దు చేస్తున్నట్లు ప్రకటించింది. 22 శాతం నుంచి 30 శాతం వరకు ఎథనాల్ కలిపిన ఇంధనాలకు (E22, E25, E27, E30) ఈ పన్ను మినహాయింపు వర్తిస్తుందని ప్రభుత్వం స్పష్టం చేసింది. ప్రభుత్వ తీసుకున్న ఈ భారీ నిర్ణయం వల్ల దేశీయ బయోఫ్యూయల్ రంగానికి సరికొత్త ఊపు రానుంది.

చక్కెర మిల్లులు, ఎథనాల్ కంపెనీలకు భారీ లాభాలు

ప్రభుత్వం తీసుకున్న ఈ నిర్ణయం వల్ల ఎథనాల్ తయారు చేసే కంపెనీలకు, చక్కెర పరిశ్రమలకు అత్యంత పెద్ద ఊరట లభించనుంది. మార్కెట్లో అధిక ఎథనాల్ మిశ్రమం ఉన్న ఇంధనాలకు డిమాండ్ ఒక్కసారిగా పెరగడం వల్ల డిస్టిలరీ వ్యాపారాలు మరింత బలోపేతం అవుతాయి. గతంలో కంటే ఎక్కువ మొత్తంలో ఎథనాల్ కొనుగోళ్లు జరగడం వల్ల ఈ కంపెనీల ఆదాయం మరియు షేర్ల వాల్యూ పెరిగే అవకాశం స్పష్టంగా కనిపిస్తోందని ఆర్థిక నిపుణులు విశ్లేషిస్తున్నారు.

చెరకు, మొక్కజొన్న రైతులకు పెరగనున్న ఆదాయం

ఈ నిర్ణయం వల్ల పరోక్షంగా మన దేశంలోని అన్నదాతలకు సైతం భారీ ఆర్థిక ప్రయోజనం చేకూరనుంది. ఎథనాల్ తయారీకి ప్రధాన ముడిసరుకుగా ఉపయోగపడే చెరకు, మొక్కజొన్న వంటి ధాన్య ఆధారిత ఫీడ్‌స్టాక్‌కు మార్కెట్లో విపరీతమైన డిమాండ్ ఏర్పడుతుంది. ఆయిల్ కంపెనీలు ఈ పంటలను రైతుల నుంచి పెద్ద ఎత్తున సేకరించడం వల్ల గిట్టుబాటు ధర లభించి, తద్వారా గ్రామీణ ప్రాంతాల్లోని రైతుల సగటు ఆదాయం గణనీయంగా పెరిగేందుకు ఈ నిర్ణయం దోహదపడుతుంది.

ఆయిల్ మార్కెటింగ్ కంపెనీల దిగుమతుల భారం ఖల్లాస్

భారతదేశపు దిగ్గజ చమురు కంపెనీలైన ఇండియన్ ఆయిల్, హిందుస్థాన్ పెట్రోలియం (HPCL), భారత్ పెట్రోలియం (BPCL) వంటి సంస్థలకు ఈ నిర్ణయం ఒక బూస్టర్ డోస్‌లా పనిచేస్తుంది. ఇప్పటివరకు ఇంటర్నేషనల్ మార్కెట్ నుంచి ముడి చమురును భారీ ధరలకు దిగుమతి చేసుకుంటున్న ఈ కంపెనీలకు, ఇకపై దేశీయంగా లభించే ఎథనాల్‌ను 30 శాతం వరకు వాడుకునే వీలుంటుంది. దీనివల్ల విదేశీ మారక ద్రవ్యం ఆదా అవ్వడమే కాకుండా, అంతర్జాతీయ మార్కెట్లో క్రూడ్ ఆయిల్ ధరలు అకస్మాత్తుగా పెరిగినా మన దేశంలో ఇంధన సరఫరాపై ఆ ప్రభావం పడకుండా నియంత్రించవచ్చు.

వినియోగదారులకు లభించే లాభాలు ఇవే

ప్రస్తుతానికి పెట్రోల్, డీజిల్ లీటర్ రిటైల్ ధరల్లో ఎలాంటి తక్షణ తగ్గింపును ఆయిల్ కంపెనీలు ప్రకటించలేదు. అయితే, దీర్ఘకాలిక ప్రయోజనాల పరంగా చూస్తే ఎథనాల్ బ్లెండింగ్ వల్ల ఇంధన ఉత్పత్తి వ్యయం అదుపులోకి వస్తుంది. ఇటీవల జరిగిన ఎన్నికల అనంతరం చమురు కంపెనీలు తమ నష్టాలను భర్తీ చేసుకునేందుకు ఇప్పటికే నాలుగు సార్లు ఇంధన ధరలను పెంచాయి. ఇలాంటి తరుణంలో ప్రభుత్వం వేసిన ఈ ఎథనాల్ మాస్టర్ స్ట్రోక్ వల్ల భవిష్యత్తులో పెట్రోల్ ధరలు స్థిరంగా ఉండేందుకు, అలాగే దేశ ఇంధన భద్రత మరింత బలోపేతం కావడానికి మార్గం సుగమం అయింది.