ATF Price : విమాన ప్రయాణికులకు అలర్ట్.. ఏటీఎఫ్ ఇంధనంపై కేంద్రం కీలక నిర్ణయం.. టికెట్ల ధరలు తగ్గుతాయా?

ATF Price : మిడిల్ ఈస్ట్‌లో నిరంతరం సాగుతున్న ఉద్రిక్తతలు, అంతర్జాతీయ మార్కెట్‌లో రోజురోజుకూ మండిపోతున్న ముడిచమురు ధరల నేపథ్యంలో భారత ప్రభుత్వ ఎవియేషన్ రంగంపై కీలక నిర్ణయం తీసుకుంది. దేశీయ ఎయిర్‌లైన్స్ కంపెనీలను నష్టాల నుంచి కాపాడటానికి కేంద్ర ప్రభుత్వం రూ.10,000 కోట్ల ప్రత్యేక సహాయక ప్యాకేజీని ఆమోదించింది. ప్రభుత్వ రంగ చమురు మార్కెటింగ్ కంపెనీల ద్వారా ఈ నిధులను ఎయిర్‌లైన్స్‌కు బదిలీ చేయనున్నారు. విమాన ఇంధనమైన ఎవియేషన్ టర్బైన్ ఫ్యూయల్ ధరలలో వచ్చే విపరీతమైన హెచ్చుతగ్గుల నుంచి విమానయాన రంగానికి రక్షణ కల్పించడమే ఈ పథకం ముఖ్య ఉద్దేశం. అయితే ఈ నిర్ణయంతో సామాన్య ప్రయాణికులకు టికెట్ ధరలు తగ్గుతాయా లేదా అనే ప్రశ్న అందరిలోనూ మొదలైంది.

టికెట్లు చౌకగా మారవు.. కానీ ఆ లాభం ఉంటుంది

ప్రముఖ బిజినెస్ పత్రిక నివేదిక ప్రకారం.. ఈ ప్రత్యేక ప్రభుత్వ పథకం అసలు లక్ష్యం విమాన టికెట్ల ధరలను దారుణంగా తగ్గించడం కాదు. అంతర్జాతీయ మార్కెట్ ఒత్తిడి వల్ల అకస్మాత్తుగా పెరిగే విమాన ఛార్జీలను అడ్డుకోవడమే దీని మెయిన్ టార్గెట్. అంటే భవిష్యత్తులో గ్లోబల్ మార్కెట్‌లో ఏటీఎఫ్ ధరలు ఎంత పెరిగినా.. భారతీయ ఎయిర్‌లైన్స్ కంపెనీలపై ఆ భారం పడదు. తద్వారా ప్రయాణికులు భారీ ధరలకు టికెట్లు కొనాల్సిన పరిస్థితి రాదు. విమాన టికెట్ల ధరలు శాశ్వతంగా తగ్గాలంటే కంపెనీల మధ్య పోటీ పెరగాలని, విమానాలలో సీట్ల లభ్యత ఎక్కువ కావాలని, కస్టమర్ల డిమాండ్ సమతుల్యంగా ఉండాలని ఎకనామిక్ ఎక్స్‌పర్ట్స్ స్పష్టం చేస్తున్నారు.

అసలు ఈ ఏటీఎఫ్ ప్లాన్ ఎలా పనిచేస్తుంది

ఈ సరికొత్త ఇంధన స్థిరీకరణ పథకం కింద భారతీయ ఎయిర్‌లైన్స్ కంపెనీలకు ప్రభుత్వం ఒక నిర్దిష్టమైన బెంచ్‌మార్క్ ధరకే జెట్ ఫ్యూయల్‌ను సరఫరా చేస్తుంది. దీనివల్ల అంతర్జాతీయ మార్కెట్లో రేట్లు మారినా దేశీయ కంపెనీలకు ఎలాంటి నష్టం ఉండదు. ప్రస్తుతం డొమెస్టిక్ విమానాల కోసం ఏటీఎఫ్ బెంచ్‌మార్క్ ధరను లీటరుకు రూ.86.32గా ప్రభుత్వం ఫిక్స్ చేసింది. అలాగే ఇంటర్నేషనల్ విమానాల కోసం లీటర్ ధరను రూ.104.49 గా నిర్ణయించారు. నిజానికి ప్రస్తుతం గ్లోబల్ మార్కెట్‌లో దీని అసలు ధర లీటరుకు రూ.142 వరకు ఉంది. అయితే వివిధ రాష్ట్రాలు విధించే ట్యాక్స్‌లు, ఎయిర్‌పోర్ట్ చార్జీల వల్ల ఢిల్లీలో లీటర్ ఏటీఎఫ్ ధర రూ.115, ముంబైలో రూ.114.50, చెన్నైలో దాదాపు రూ.139 వరకు కస్టమర్లకు పడవచ్చు.

ఊపిరి పీల్చుకోనున్న ఎయిర్‌లైన్స్

సాధారణంగా ఒక విమాన కంపెనీ నిర్వహణ ఖర్చులలో ఏకంగా 40 శాతం కేవలం ఈ ఏటీఎఫ్ ఇంధనానికే ఖర్చు అవుతుంది. అంతర్జాతీయంగా సంక్షోభాలు వచ్చినప్పుడు ఈ ఖర్చు ఏకంగా 55 నుంచి 60 శాతానికి పెరిగిపోతుంది. గత కొన్ని నెలలుగా నడుస్తున్న పశ్చిమ ఆసియా గొడవలు, అలాగే పాకిస్తాన్ ఎయిర్ స్పేస్ మూసివేయడం వంటి కారణాల వల్ల భారతీయ విమానాలు ఎక్కువ దూరం ప్రయాణించాల్సి వచ్చి ఖర్చులు బాగా పెరిగిపోయాయి. లాభాలు లేని కొన్ని రూట్లలో ఎయిర్‌లైన్స్ తమ సర్వీసులను కూడా రద్దు చేసుకున్నాయి. ఇప్పుడు కేంద్రం ఇచ్చిన ఈ రూ.10 వేల కోట్ల ఊరట వల్ల కంపెనీలు తమ బడ్జెట్‌ను సరిగ్గా ప్లాన్ చేసుకోగలవు. పాత రూట్లలో విమానాలను మళ్లీ పునరుద్ధరించే అవకాశం లభిస్తుంది.

ప్రయాణికులకు, ఆయిల్ కంపెనీలకు చేకూరే లాభం

ఈ నిర్ణయం వల్ల పండుగ సీజన్లు, సెలవుల సమయంలో విమాన టికెట్ల ధరలు అకస్మాత్తుగా డబుల్, ట్రిపుల్ అయ్యే ఛాన్స్ ఉండదు. అయితే ఇంధనంపై వచ్చిన తగ్గింపు లాభాన్ని నేరుగా కస్టమర్లకు బదిలీ చేయాలని కేంద్ర ప్రభుత్వం ఎయిర్‌లైన్స్ కంపెనీలకు ఎలాంటి కండిషన్ పెట్టలేదు. కాబట్టి విమాన సంస్థలు తమ బిజినెస్ స్ట్రాటజీ ప్రకారమే రేట్లను డిసైడ్ చేస్తాయి. మరోవైపు, ఈ పథకం వల్ల ప్రభుత్వ ఆయిల్ కంపెనీలకు కూడా మేలు జరుగుతుంది. కేంద్రం వీరికి వడ్డీ లేని అడ్వాన్స్ నిధులను ఇస్తుంది. దీనివల్ల ఏటీఎఫ్ అమ్మకాలపై వచ్చే తాత్కాలిక నష్టాల భారం ఆయిల్ కంపెనీలపై పడదు. అంతర్జాతీయంగా క్రూడాయిల్ రేట్లు నార్మల్ అవ్వగానే ఈ నిధులను ప్రభుత్వం మళ్లీ వెనక్కి తీసుకుంటుంది. అంటే ఇది పర్మినెంట్ సబ్సిడీ కాదు.. కేవలం సంక్షోభం నుండి గట్టెక్కించే తాత్కాలిక ప్లాన్ మాత్రమే.