India-UK CETA Rules : భారత్-బ్రిటన్ చారిత్రాత్మక వాణిజ్య ఒప్పందం.. నేటి నుంచే CETA అధికారికంగా అమలు

India-UK CETA Rules : భారతదేశం, బ్రిటన్ దేశాల మధ్య ఆర్థిక సగర్వ ప్రస్థానంలో ఒక సరికొత్త అధ్యాయం మొదలైంది. ఇరు దేశాల మధ్య కుదిరిన చారిత్రాత్మక సమగ్ర ఆర్థిక భాగస్వామ్య ఒప్పందం (CETA) జూలై 15, 2026 నుంచి అధికారికంగా అమల్లోకి వస్తోంది. గత ఏడాది జూలై 25, 2025 న కుదిరిన ఈ ఒప్పందం ప్రకారం.. బ్రిటన్ మార్కెట్లోకి ప్రవేశించే 99 శాతం భారతీయ ఎగుమతులకు పూర్తి పన్ను మినహాయింపు లభించనుంది. అదే సమయంలో బ్రిటన్ నుంచి భారతదేశానికి దిగుమతి అయ్యే పలు రకాల ప్రీమియం ఉత్పత్తులపై కస్టమ్స్ డ్యూటీని భారత్ భారీగా తగ్గించనుంది. దీనివల్ల దేశీయ మార్కెట్లో పలు విదేశీ వస్తువుల ధరలు గణనీయంగా తగ్గనున్నాయి.

బ్రిటిష్ కార్లపై ట్యాక్స్ 110 నుంచి 10 శాతానికి డౌన్

ఈ వాణిజ్య ఒప్పందం ద్వారా ఆటోమొబైల్ రంగానికి సంబంధించి అత్యంత కీలకమైన నిర్ణయం తీసుకున్నారు. భారతదేశ చరిత్రలోనే మొదటిసారిగా ఒక ట్రేడ్ అగ్రిమెంట్ కింద పూర్తిగా విదేశాల్లో తయారై భారత్‌కు వచ్చే లగ్జరీ ప్యాసింజర్ కార్లు, ట్రక్కులపై దిగుమతి సుంకాన్ని భారీగా తగ్గించడానికి కేంద్రం అంగీకరించింది. బ్రిటన్ నుంచి వచ్చే కార్లపై ప్రస్తుతం ఉన్న 110 శాతం భారీ పన్నును విడతల వారీగా కేవలం 10 శాతానికి తగ్గించనున్నారు. పెట్రోల్, డీజిల్ వాహనాలకు ఈ తగ్గింపు వెంటనే వర్తిస్తుంది. అయితే, దేశీయ ఈవీ తయారీదారుల ప్రయోజనాలను కాపాడటానికి ఎలక్ట్రిక్, హైబ్రిడ్, హైడ్రోజన్ కార్లపై ఈ పన్ను మినహాయింపులు 6వ సంవత్సరం నుంచి ప్రారంభమవుతాయి. దీనికి బదులుగా బ్రిటన్ కూడా భారతీయ ఈవీ కార్లకు తమ మార్కెట్లో ప్రాధాన్యత ఇవ్వనుంది.

స్క్యాచ్, విస్కీలపై పన్నుల ఉపశమనం

ఈ ఒప్పందం అమలుతో భారతదేశంలో విదేశీ ప్రీమియం మద్యం ధరలు భారీగా తగ్గనున్నాయి. బ్రిటన్ నుంచి దిగుమతి అయ్యే ప్రసిద్ధ స్క్యాచ్ విస్కీ, బోర్బన్, వోడ్కా, జిన్, రమ్ మరియు టకీలా వంటి బ్రాండ్లపై ఐదు నుంచి పది సంవత్సరాల కాలపరిమితిలో పన్నులు క్రమంగా తగ్గుతాయి. మొదటి సంవత్సరంలో ఈ దిగుమతి సుంకం 150 శాతం నుంచి 110 శాతానికి తగ్గుతుంది. అలాగే 10వ సంవత్సరం నాటికి ఇది 75 శాతానికి చేరుకుంటుంది. ముఖ్యంగా ప్రపంచ ప్రసిద్ధ స్క్యాచ్ విస్కీపై పన్నును 10 ఏళ్లలో కేవలం 40 శాతానికి తగ్గించనున్నారు. అయితే, ఈ పన్ను రాయితీలు కేవలం నిర్దేశిత కనీస ధర కలిగి ఉన్న ప్రీమియం బ్రాండ్లకు మాత్రమే వర్తిస్తాయని ఒప్పందంలో స్పష్టం చేశారు.

భారతీయ వస్త్ర, చర్మ పరిశ్రమలకు గోల్డెన్ ఛాన్స్

ఈ చారిత్రాత్మక ఒప్పందం వల్ల భారతదేశంలోని కార్మిక ఆధారిత పరిశ్రమలకు విపరీతమైన లబ్ధి చేకూరనుంది. మన దేశానికి చెందిన దుస్తులు, పాదరక్షలు (లెదర్ గూడ్స్), టెక్స్‌టైల్స్, ప్రాసెస్డ్ ఫుడ్, హ్యాండీక్రాఫ్ట్స్ మరియు సముద్ర ఉత్పత్తులు (సీ ఫుడ్స్) వంటి వస్తువులపై బ్రిటన్ ప్రభుత్వం ఎలాంటి కస్టమ్స్ డ్యూటీ విధించదు. గతంలో ఈ ఉత్పత్తులపై 4 నుంచి 16 శాతం వరకు పన్నులు ఉండేవి. ఇప్పుడు ఈ పన్నులు పూర్తిగా రద్దు కావడం వల్ల బ్రిటన్ మార్కెట్లో భారతీయ వస్తువుల అమ్మకాలు విపరీతంగా పెరగడంతో పాటు మన దేశంలో ఉపాధి అవకాశాలు మెరుగవుతాయి.

ఐటీ కంపెనీలకు బిగ్ రిలీఫ్

భారతదేశ ఐటీ సేవల రంగానికి, ముఖ్యంగా టిసిఎస్, ఇన్ఫోసిస్ వంటి సాఫ్ట్‌వేర్ దిగ్గజాలకు ఈ ఒప్పందం ద్వారా పెద్ద ఉపశమనం లభించింది. డబుల్ కాంట్రిబ్యూషన్ కన్వెన్షన్ కింద బ్రిటన్‌కు తాత్కాలికంగా ప్రాజెక్టుల నిమిత్తం వెళ్లే భారతీయ ఐటీ ఉద్యోగులకు ఐదేళ్ల పాటు సామాజిక భద్రతా విరాళం చెల్లించాల్సిన అవసరం లేదు. దీనివల్ల భారతీయ కంపెనీలకు వందల కోట్ల రూపాయల వ్యయం ఆదా అవుతుంది. వీటితో పాటు బ్రిటన్ ప్రభుత్వానికి చెందిన దాదాపు 40,000 పెద్ద కాంట్రాక్టుల టెండర్లలో పాల్గొనేందుకు భారతీయ కంపెనీలకు అధికారికంగా అనుమతి లభించింది.

దేశీయ ప్రయోజనాలకు పెద్దపీట

భారతదేశం విదేశీ వస్తువులకు రాయితీలు ఇచ్చినప్పటికీ, దేశీయ రైతులు, స్థానిక వ్యాపారాల రక్షణ కోసం కొన్ని కఠిన నిర్ణయాలు తీసుకుంది. భారతదేశంలోని సున్నితమైన ఉత్పత్తులైన యాపిల్స్, వాల్‌నట్స్, గోల్డ్ బార్స్ , స్మార్ట్‌ఫోన్లను ఈ పన్ను మినహాయింపుల జాబితా నుంచి పూర్తిగా మినహాయించారు. అలాగే బ్రిటన్ కోరినప్పటికీ, ఔషధాల పేటెంట్ గడువు పొడిగింపు డిమాండ్‌ను భారతదేశం నిర్ద్వంద్వంగా తిరస్కరించింది. దీనివల్ల అత్యవసర సమయాల్లో భారతదేశం తక్కువ ధరకే నాణ్యమైన జనరిక్ ప్రాణరక్షక మందులను తయారు చేసే హక్కును సురక్షితంగా కాపాడుకోగలిగింది.