Tax Collection : ప్రభుత్వ ఖజానాకు కాసుల వర్షం.. ఏకంగా 16.4 శాతం పెరిగిన డైరెక్ట్ టాక్స్ కలెక్షన్

Tax Collection : ప్రస్తుత ఆర్థిక సంవత్సరం ప్రారంభమైన కొద్ది రోజుల్లోనే భారత ప్రభుత్వ ఖజానాకు పన్నుల రూపంలో భారీగా ఆదాయం సమకూరింది. కేంద్ర ప్రభుత్వం విడుదల చేసిన తాజా గణాంకాల ప్రకారం.. ప్రస్తుత ఆర్థిక సంవత్సరంలో దాదాపు మొదటి 100 రోజుల్లోనే (జూలై 13 నాటికి) దేశ నికర ప్రత్యక్ష పన్నుల వసూళ్లు 16.40 శాతం బలమైన వృద్ధితో ఏకంగా రూ. 6.51 లక్షల కోట్ల మార్కును దాటేశాయి. ఆర్థిక వ్యవస్థ బలంగా ఉండటం, పన్నుల చెల్లింపు ప్రక్రియ మరింత సులభతరం కావడంతో ప్రభుత్వానికి ఈ స్థాయిలో రికార్డు ఆదాయం లభించింది.

కార్పొరేట్ పన్నుల్లో 22 శాతం బంపర్ వృద్ధి

ఈ ఏడాది పన్నుల వసూళ్లలో అత్యధికంగా కార్పొరేట్ పన్నుల వాటానే ఎక్కువగా ఉండటం విశేషం. ప్రభుత్వం మంగళవారం అధికారికంగా వెల్లడించిన డేటా ప్రకారం.. నికర కార్పొరేట్ పన్ను వసూళ్లు ఏకంగా 22 శాతం పెరిగి రూ. 2.40 లక్షల కోట్లకు చేరుకున్నాయి. దేశంలోని చిన్న, పెద్ద కంపెనీలు, కార్పొరేట్ సంస్థలు భారీ లాభాలను ఆర్జించడమే దీనికి ప్రధాన కారణం. అంతర్జాతీయంగా ఆర్థిక మందగమనం ఉన్నప్పటికీ, భారతీయ కంపెనీల ఆదాయం ఏమాత్రం తగ్గలేదని ఈ గణాంకాలు స్పష్టం చేస్తున్నాయి.

సాధారణ పన్ను వసూళ్లలోనూ జోరు

మరోవైపు, నాన్-కార్పొరేట్ పన్ను వసూళ్లు కూడా మెరుగైన వృద్ధిని కనబరిచాయి. వ్యక్తులు చెల్లించే వ్యక్తిగత ఆదాయపు పన్ను, హిందూ అవిభక్త కుటుంబాలు (HUFs), భాగస్వామ్య సంస్థలు (Firms), అసోసియేషన్ ఆఫ్ పర్సన్స్ (AoPs), స్థానిక సంస్థలు చెల్లించే పన్నులన్నీ కలిపి ఈ కేటగిరీ కిందకు వస్తాయి. ఈ నికర నాన్-కార్పొరేట్ టాక్స్ కలెక్షన్ దాదాపు 12 శాతం వృద్ధితో రూ.3.84 లక్షల కోట్లకు పైగా నమోదైంది. సాధారణ పౌరులు, వ్యాపారులు సకాలంలో పన్నులు చెల్లిస్తున్నట్లు ఈ డేటా చెబుతోంది.

స్టాక్ మార్కెట్ జోష్‌తో పెరిగిన ఎస్‌టీటీ

ప్రస్తుతం షేర్ మార్కెట్లలో ఇన్వెస్టర్ల హల్చల్ విపరీతంగా పెరిగింది. ట్రేడింగ్ వాల్యూమ్స్ పెరగడం వల్ల స్టాక్ మార్కెట్ లావాదేవీలపై విధించే సెక్యూరిటీస్ ట్రాన్సాక్షన్ టాక్స్ (STT) రూపంలో ప్రభుత్వానికి భారీ ఆదాయం వచ్చింది. సమీక్షా కాలంలో ఎస్‌టీటీ వసూళ్లు ఏకంగా 48 శాతం బంపర్ వృద్ధిని నమోదు చేసి రూ. 26,429 కోట్లకు చేరుకున్నాయి. ఇక స్థూల ప్రాతిపదికన చూస్తే, మొత్తం డైరెక్ట్ టాక్స్ కలెక్షన్ 16.11 శాతం పెరిగి రూ. 7.73 లక్షల కోట్లుగా నమోదైంది. ఇందులో కార్పొరేట్ టాక్స్ వాటా రూ. 3.35 లక్షల కోట్లు కాగా, నాన్-కార్పొరేట్ టాక్స్ వాటా రూ. 4.12 లక్షల కోట్లుగా ఉంది.

రూ. 1.22 లక్షల కోట్ల ఐటీ రిఫండ్లు జారీ

పన్ను వసూళ్లతో పాటు పన్ను చెల్లింపుదారులకు రీఫండ్స్ అందించడంలో కూడా ఆదాయపు పన్ను శాఖ వేగంగా వ్యవహరించింది. ఈ ఆర్థిక సంవత్సరంలో ఇప్పటివరకు మొత్తం రూ. 1.22 లక్షల కోట్ల విలువైన ఐటీ రీఫండ్లను ప్రభుత్వం జారీ చేసింది. గత ఏడాది ఇదే కాలంలో ఇచ్చిన రీఫండ్లతో పోలిస్తే ఇది 14.57 శాతం ఎక్కువ కావడం విశేషం. దీనివల్ల పన్ను చెల్లింపుదారులకు సకాలంలో వారి డబ్బులు వెనక్కి అందుతున్నాయి.

ప్రస్తుత ఆర్థిక సంవత్సరానికి భారీ టార్గెట్

కేంద్ర ప్రభుత్వం ప్రస్తుత ఆర్థిక సంవత్సరంలో డైరెక్ట్ టాక్స్ ద్వారా మొత్తం రూ. 26.97 లక్షల కోట్లు సేకరించాలని భారీ లక్ష్యంగా పెట్టుకుంది. ఇది గత ఆర్థిక సంవత్సరం టార్గెట్ (రూ.23.40 లక్షల కోట్లు) కంటే 15 శాతం ఎక్కువ. ఈ తాజా ట్రెండ్ పై డెలాయిట్ ఇండియా భాగస్వామి రోహింటన్ సిధ్వా మాట్లాడుతూ.. పశ్చిమ ఆసియా యుద్ధ వాతావరణం లేదా ప్రపంచ ఆర్థిక మందగమనం వంటి అంశాలు భారతీయ కార్పొరేట్ కంపెనీల లాభాలపై ఎలాంటి ప్రతికూల ప్రభావం చూపలేదని స్పష్టమవుతోందన్నారు. అలాగే ఈవై ఇండియా టాక్స్ పార్టనర్ జయేష్ సంఘ్వీ మాట్లాడుతూ.. అడ్వాన్స్ టాక్స్ చెల్లింపులు బలంగా ఉన్నాయని, ఇది దేశ ఆర్థిక వ్యవస్థ పటిష్టతకు నిదర్శనమని పేర్కొన్నారు. ప్రైస్ వాటర్ హౌస్ అండ్ కంపెనీ పార్టనర్ హితేష్ సాహ్ని కూడా ఈ ఏడాది పన్ను వసూళ్లు అంచనాలకు తగ్గట్టుగా అత్యంత బలంగా సాగుతాయని విశ్లేషించారు.