Indian Economy : భారత ఆర్థిక వ్యవస్థకు రియల్ హీరోలు.. 2036 నాటికి దేశాన్ని నడిపించబోతున్న మిడిల్ క్లాస్

Indian Economy : రాబోయే రోజుల్లో భారత ఆర్థిక వ్యవస్థను పరుగులు పెట్టించడంలో మధ్యతరగతి ప్రజలే అత్యంత కీలక పాత్ర పోషించబోతున్నారని కేంద్ర ఆర్థిక మంత్రి నిర్మలా సీతారామన్ స్పష్టం చేశారు. ఫ్రాన్స్‌లో జరిగిన ఒక అంతర్జాతీయ ఆర్థిక సదస్సులో పాల్గొన్న ఆమె, భారతదేశ వృద్ధి రేటుపై ఆసక్తికరమైన గణాంకాలను పంచుకున్నారు. 2036వ సంవత్సరం నాటికి భారతదేశంలో జరిగే మొత్తం వినియోగదారుల ఖర్చులలో దాదాపు 93 శాతం వాటా కేవలం మధ్యతరగతి, మెరుగైన జీవన ప్రమాణాల కోసం ఎదురుచూసే వర్గాల నుంచే వస్తుందని ఆమె అంచనా వేశారు. ఇది దేశీయ వ్యాపార రంగానికి సరికొత్త ఊపును ఇస్తుందని పేర్కొన్నారు.

మహానగరాలకే పరిమితం కాని అభివృద్ధి

భారతదేశంలో ఆర్థికాభివృద్ధి అనేది ఇకపై కేవలం ముంబై, ఢిల్లీ, బెంగళూరు, చెన్నై వంటి మెట్రో నగరాలకే పరిమితం కాబోదని కేంద్ర మంత్రి స్పష్టం చేశారు. రాబోయే కాలంలో దేశవ్యాప్తంగా సుమారు 500 చిన్న పట్టణాలు (టైర్-2, టైర్-3 నగరాలు) సరికొత్త ఆర్థిక కేంద్రాలుగా రూపాంతరం చెందబోతున్నాయి. దేశంలోని మధ్యతరగతి జనాభా ఇప్పుడు చిన్న నగరాల్లో చాలా వేగంగా విస్తరిస్తోందని, దీనివల్ల వ్యాపార లావాదేవీలు, సంపద సృష్టి కేవలం పెద్ద నగరాల్లోనే ఆగిపోకుండా గ్రామాలకు, చిన్న పట్టణాలకు కూడా సమానంగా పంపిణీ అవుతుందని ఆమె వివరించారు.

చైనాను వెనక్కి నెట్టనున్న భారత్

ప్రస్తుత లెక్కల ప్రకారం భారతదేశ జనాభాలో దాదాపు 31 శాతం మంది మధ్యతరగతి పరిధిలోకి వస్తారు. 1995వ సంవత్సరం నుంచి గమనిస్తే.. ఈ వర్గం ఏటా సగటున 6.3 శాతం వృద్ధి రేటుతో పెరుగుతూ వస్తోంది. ఆర్థిక సహకారం, అభివృద్ధి సంస్థ (OECD) అంచనాల ప్రకారం.. 2030 నుంచి 2035 మధ్య కాలంలో మధ్యతరగతి జనాభా సంఖ్య పరంగా భారతదేశం పొరుగు దేశమైన చైనాను కూడా వెనక్కి నెట్టి ప్రపంచంలోనే మొదటి స్థానానికి చేరుకునే అవకాశాలు స్పష్టంగా కనిపిస్తున్నాయని నిర్మలా సీతారామన్ ఈ సందర్భంగా గుర్తుచేశారు.

పేదరికం నుంచి మిడిల్ క్లాస్‌లోకి 25 కోట్ల మంది

తక్కువ ఆదాయం ఉన్న పేద ప్రజలను మధ్యతరగతి స్థాయికి తీసుకురావడానికి కేంద్ర ప్రభుత్వం గత దశాబ్ద కాలంగా అనేక సంక్షేమ పథకాలను అమలు చేస్తోందని ఆర్థిక మంత్రి తెలిపారు. 2014లో ప్రారంభించిన జనధన్ యోజన ద్వారా దేశంలోని కోట్ల మంది పేదలకు బ్యాంకింగ్ సేవలు అందుబాటులోకి వచ్చాయి. ప్రపంచ బ్యాంకు, అంతర్జాతీయ ద్రవ్యనిధి సంస్థల నివేదికల ప్రకారం.. భారతదేశంలో దాదాపు 24.8 కోట్ల మంది ప్రజలు బహుముఖ పేదరికం నుంచి విజయవంతంగా బయటపడ్డారు. ఇందులో ఎక్కువ శాతం మంది మొదటిసారిగా బ్యాంకింగ్ వ్యవస్థతో అనుసంధానమై ఆర్థికంగా స్థిరపడినవారే కావడం విశేషం.

టాక్స్ మినహాయింపులు, జీఎస్‌టీ తగ్గింపు

చిన్న చిన్న వ్యాపారాలు ప్రారంభించుకునేందుకు వీలుగా ఎలాంటి గ్యారెంటీ లేకుండానే ముద్రా రుణాల వంటి సులభతర లోన్లను ప్రభుత్వం అందిస్తోందని, దీనికి తోడు గ్రామాలు, చిన్న పట్టణాలకు సైతం డిజిటల్ పేమెంట్స్ విస్తరించడం చిన్న వ్యాపారులకు వరంగా మారిందని సీతారామన్ పేర్కొన్నారు. ఇవే కాకుండా ఆదాయపు పన్ను మినహాయింపు పరిమితిని పెంచడం, నిత్యావసర వస్తువులపై జీఎస్‌టీ తగ్గించడం, ఉచిత ఆరోగ్య బీమా, తక్కువ ధరకే మందులు అందించడం వంటి చర్యల వల్ల మధ్యతరగతి ప్రజల చేతుల్లో అదనపు డబ్బు మిగులుతోంది. యువత కోసం స్టెమ్ విద్య, గేమింగ్, గ్రాఫిక్స్ లాంటి ఆధునిక రంగాల్లో శిక్షణ ఇచ్చి ఉపాధి అవకాశాలు పెంచుతున్నామని, ఈ సమగ్ర ప్రణాళికే రాబోయే రోజుల్లో దేశాన్ని ప్రపంచంలోనే అగ్రగామిగా నిలపనుందని ఆమె ధీమా వ్యక్తం చేశారు.