Liquor Boom : కిక్కులోనూ క్వాలిటీ వెతుకుతున్న భారతీయులు.. ప్రీమియం మద్యం అమ్మకాల్లో 12 శాతం వృద్ధి

 Liquor Boom : ప్రపంచవ్యాప్తంగా ఆర్థిక మందగమనం భయపెడుతున్నా, భారతీయుల కిక్కు మాత్రం తగ్గడం లేదు. విదేశాల్లో జనం ఖర్చు తగ్గించుకుంటూ చవకబారు బ్రాండ్ల వైపు చూస్తుంటే, మన దేశంలో మాత్రం ప్రీమియం, లగ్జరీ మద్యం అమ్మకాలు సరికొత్త రికార్డులను సృష్టిస్తున్నాయి. భారతీయులు ఇప్పుడు క్వాంటిటీ కంటే క్వాలిటీకే ఓటేస్తున్నారు. అందుకే ఖరీదైన సింగిల్ మాల్ట్ విస్కీలు, ప్రీమియం జిన్, వైన్లకు దేశంలో డిమాండ్ భారీగా పెరిగింది.

ప్రపంచానికి భిన్నంగా భారత్

లండన్‌కు చెందిన ఇండస్ట్రీ ట్రాకర్ ఐడబ్ల్యూఎస్ఆర్ గణాంకాల ప్రకారం, 2025లో ప్రపంచవ్యాప్తంగా మద్యం అమ్మకాలు 2 శాతం తగ్గాయి. కానీ భారత్‌లో మాత్రం సీన్ రివర్స్‌లో ఉంది. ఇక్కడ ప్రీమియం మద్యం అమ్మకాలు వాల్యూమ్ పరంగా 9 శాతం, విలువ పరంగా 12 శాతం పెరిగాయి. విదేశాల్లో వినియోగదారులు ఆర్థిక ఇబ్బందుల వల్ల తక్కువ ధర ఉండే బ్రాండ్ల వైపు మళ్లుతుంటే, భారతీయులు మాత్రం మరింత ఖరీదైన వైపు అడుగులు వేస్తున్నారు. ధరలు పెరిగినా, వినియోగదారులు వెనక్కి తగ్గకుండా విలాసవంతమైన బ్రాండ్లనే ఎంచుకుంటున్నారు.

మారుతున్న కంపెనీల వ్యూహాలు

ఈ మార్పును గమనించిన డియాజియో, పెర్నోడ్ రికార్డ్ వంటి దిగ్గజ బహుళజాతి కంపెనీలు తమ వ్యూహాలను మార్చుకుంటున్నాయి. కేవలం ఎక్కువ బాటిళ్లను అమ్మడం కంటే, ప్రీమియం బ్రాండ్ల ద్వారా ఎక్కువ లాభాలను ఆర్జించడంపై దృష్టి సారిస్తున్నాయి. పెర్నోడ్ రికార్డ్ సంస్థకు భారత్ ప్రపంచంలోనే రెండో అతిపెద్ద మార్కెట్‌గా అవతరించింది. గత మార్చి త్రైమాసికంలో ఈ కంపెనీ భారత్‌లో 11 శాతం వృద్ధిని నమోదు చేయడం విశేషం. మిడిల్ క్లాస్ ఆదాయం పెరగడం, మారుతున్న లైఫ్‌స్టైల్ ఈ విప్లవానికి ప్రధాన కారణాలుగా కనిపిస్తున్నాయి.

రికార్డు స్థాయిలో వినియోగం

ప్రస్తుతం వాల్యూమ్ పరంగా చూస్తే భారత్ ప్రపంచంలోనే అతిపెద్ద మద్యం మార్కెట్. ఏటా మన దేశంలో 410 మిలియన్ కేసుల మద్యం వినియోగం జరుగుతోంది. ఇందులో లగ్జరీ మరియు దిగుమతి చేసుకున్న మద్యం వాటా ప్రస్తుతం 5 శాతం కంటే తక్కువగానే ఉన్నప్పటికీ, సుమారు 150 మిలియన్ల మంది మధ్యతరగతి ప్రజలు ఇప్పుడు ప్రీమియం బ్రాండ్లను కొనుగోలు చేసే సామర్థ్యాన్ని కలిగి ఉన్నారు. దీనికి తోడు ఏటా సుమారు 2 కోట్ల మంది భారతీయులు చట్టబద్ధంగా మద్యం తాగే వయస్సులోకి వస్తున్నారు. ఇది ప్రపంచ మద్యం కంపెనీలకు అతిపెద్ద అవకాశంగా మారింది.

మధ్యతరగతి జోరు - మార్కెట్ హోరు

సంటోరీ గ్లోబల్ స్పిరిట్స్ ఇండియా ఎండీ నీరజ్ కుమార్ మాటల్లో చెప్పాలంటే, భారత్ ఇప్పుడు మద్యం కంపెనీలకు అద్భుతమైన మార్కెట్ ఉన్న ప్రదేశం. ఇక్కడి వినియోగదారులు విజ్ఞానవంతులుగా మారుతున్నారు. వారు కేవలం తాగడం కోసం కాకుండా, ప్రతిష్టాత్మకమైన విస్కీలు, ప్రీమియం వైట్ స్పిరిట్స్‌ను ఆస్వాదించడానికి ఇష్టపడుతున్నారు. అధిక పన్నులు ఉన్నప్పటికీ, దిగుమతి చేసుకున్న మద్యానికి డిమాండ్ తగ్గకపోవడం గమనార్హం. రాబోయే రోజుల్లో భారత్ తన ప్రాధాన్యతను మరింత పెంచుకుని, ప్రపంచ టాప్-3 మార్కెట్లలో ఒకటిగా స్థిరపడనుందని విశ్లేషకులు భావిస్తున్నారు.