Inflation : వరుసగా 5వ నెల పెరిగిన ద్రవ్యోల్బణం.. ఇరాన్ యుద్ధం ఎఫెక్ట్ మొదలైందా?

 Inflation : మధ్యప్రాచ్యంలో చిచ్చు రేగింది.. ఆ సెగ ఇప్పుడు మన వంటింటికి తాకింది. ఇరాన్-ఇజ్రాయెల్ మధ్య నెలకొన్న ఉద్రిక్తతలు ప్రపంచ దేశాలను వణికిస్తుంటే, భారత్‌లో ద్రవ్యోల్బణం రూపంలో అది సామాన్యుడి జేబుకు చిల్లు పెడుతోంది. గత ఐదు నెలలుగా దేశంలో నిత్యావసరాల ధరలు క్రమంగా పెరుగుతూనే ఉన్నాయి. తాజాగా వెలువడిన గణాంకాల ప్రకారం.. మార్చి నెలలో రిటైల్ ద్రవ్యోల్బణం 3.40 శాతానికి చేరుకుంది. ఫిబ్రవరిలో ఇది 3.21 శాతంగా ఉండగా, కేవలం ఒక్క నెలలోనే ఈ పెరుగుదల నమోదు కావడం ఆందోళన కలిగిస్తోంది.

ధరల పెరుగుదలకు కారణాలేంటి?

ఇరాన్, ఇజ్రాయెల్ మధ్య యుద్ధ వాతావరణం నెలకొనడం వల్ల ప్రపంచవ్యాప్తంగా ముడి చమురు సరఫరాకు తీవ్ర అంతరాయం ఏర్పడింది. హోర్ముజ్ జలసంధి వద్ద అమెరికా విధిస్తున్న ఆంక్షలు, ఇరాన్ హెచ్చరికల వల్ల అంతర్జాతీయ ఇంధన మార్కెట్ అస్థిరంగా మారింది. దీని ప్రభావం వల్ల మన దేశంలో గ్యాస్ సిలిండర్ల ధరలు పెరగడంతో పాటు, దిగుమతి చేసుకునే వస్తువుల ఖర్చులు కూడా భారమయ్యాయి. అక్టోబర్ 2025లో అతి తక్కువగా 0.25 శాతానికి పడిపోయిన ద్రవ్యోల్బణం, అప్పటి నుంచి క్రమంగా పెరుగుతూ ఇప్పుడు 3.40 శాతానికి చేరింది.

మారిన లెక్కలు - కొత్త బాస్కెట్

ప్రభుత్వం ఇప్పుడు ద్రవ్యోల్బణాన్ని లెక్కించే విధానంలో మార్పులు చేసింది. బేస్ ఇయర్ (ప్రాథమిక సంవత్సరం)ను 2012 నుంచి 2024కు మార్చారు. కొత్త విధానం ప్రకారం ఆహార పదార్థాల వాటా 45.9% నుంచి 36.75 శాతానికి తగ్గగా, ఇళ్ళు, రవాణా, డిజిటల్ సేవలకు (OTT సబ్స్క్రిప్షన్లు వంటివి) ప్రాధాన్యత పెరిగింది. పాత కాలపు వీసీఆర్ (VCR), ఆడియో క్యాసెట్ల వంటి వాటిని ఈ జాబితా నుండి తొలగించి, ఆధునిక అవసరాలకు తగినట్లుగా వినియోగ వస్తువుల జాబితాను సవరించారు.

ఆర్‌బీఐ అంచనాలు, ముందస్తు హెచ్చరిక

ద్రవ్యోల్బణం పెరిగినప్పటికీ, భారత రిజర్వ్ బ్యాంక్ నిర్దేశించిన 4 శాతం పరిమితి లోపే ఇది ఉండటం కాస్త ఊరట కలిగించే అంశం. అయితే, యుద్ధం గనుక మరింత ముదిరితే మరిన్ని ఆర్థిక ఇబ్బందులు తప్పవని ఆర్‌బీఐ గవర్నర్ సంజయ్ మల్హోత్రా హెచ్చరించారు. వచ్చే ఆర్థిక సంవత్సరం (FY27) నాటికి ద్రవ్యోల్బణం సగటున 4.6 శాతంగా ఉండవచ్చని అంచనా వేస్తున్నారు. రాబోయే రోజుల్లో ధరలు మరింత పెరిగే అవకాశం ఉన్నందున, మార్కెట్ పరిస్థితులను నిశితంగా గమనిస్తున్నట్లు ఆర్‌బీఐ తెలిపింది.