LPG Crisis : గ్యాస్ కష్టాలు ఇప్పట్లో తీరవు.. రాబోయే 3-4 ఏళ్లు సిలిండర్ల కొరత తప్పదా?

LPG Crisis : గ్యాస్ సిలిండర్ వినియోగదారులకు ఒక చేదు వార్త వినిపిస్తోంది. పశ్చిమ ఆసియాలో నెలకొన్న యుద్ధ పరిస్థితులు, ఉద్రిక్తతల కారణంగా రాబోయే మూడు నాలుగేళ్ల పాటు గ్యాస్ కొరత వేధించే అవకాశం ఉందని నిపుణులు హెచ్చరిస్తున్నారు. కేవలం సరఫరా మాత్రమే కాదు, దీని ప్రభావం ధరల మీద కూడా భారీగా పడనుంది. అంతర్జాతీయంగా ఎల్‌పీజీ (LPG) సప్లై చైన్ దెబ్బతినడమే దీనికి ప్రధాన కారణమని తెలుస్తోంది.

ముంచుకొస్తున్న గ్యాస్ గండం

పశ్చిమ ఆసియాలో అమెరికా, ఇజ్రాయెల్ సైనిక చర్యలకు ప్రతిగా ఇరాన్ ఆ ప్రాంతంలోని ఎనర్జీ ఇన్‌ఫ్రాస్ట్రక్చర్‌పై దాడులు చేస్తోంది. ముఖ్యంగా స్ట్రైట్ ఆఫ్ హోర్ముజ్ అనే కీలకమైన జలమార్గాన్ని బ్లాక్ చేయడంతో భారత్ కు వచ్చే ఎల్‌పీజీ సరఫరాపై తీవ్ర ప్రభావం పడింది. సరఫరాదారులు ఇస్తున్న సమాచారం ప్రకారం.. ఈ వ్యవస్థ మళ్ళీ సాధారణ స్థితికి రావడానికి కనీసం మూడు నుండి నాలుగు ఏళ్లు పట్టవచ్చని సీనియర్ ప్రభుత్వ అధికారులు అంచనా వేస్తున్నారు. చమురు బావులు ఎండిపోయాయా లేదా కేవలం ఉత్పత్తి నిలిచిపోయిందా అనే విషయంలో ఇంకా స్పష్టత లేకపోవడంతో ఆందోళన మరింత పెరుగుతోంది.

దిగుమతులపై భారత్ ఆధారితం

భారతదేశం తన మొత్తం గ్యాస్ అవసరాల్లో సుమారు 60 శాతం దిగుమతుల ద్వారానే తీర్చుకుంటోంది. అందులో 90 శాతం సరఫరా గల్ఫ్ దేశాల నుంచే వస్తుంది. యుద్ధం మొదలైన తర్వాత గల్ఫ్ దేశాల నుంచి దిగుమతులు 55 శాతానికి పడిపోయాయి. యూఏఈ, సౌదీ అరేబియా, ఖతార్ వంటి దేశాల నుంచి భారత్ ఏటా సుమారు 6 బిలియన్ డాలర్ల విలువైన గ్యాస్ కొనుగోలు చేస్తోంది. ఇప్పుడు ఈ సరఫరా మార్గాలు మారడం వల్ల రవాణా ఖర్చులు, ఇన్సూరెన్స్ ప్రీమియంలు పెరిగిపోయాయి, ఇది నేరుగా వినియోగదారుల జేబులకు చిల్లు పెడుతోంది.

పెరుగుతున్న ధరలు - తరుగుతున్న నిల్వలు

నివేదికల ప్రకారం, భారత్ లో ఏటా 33 మిలియన్ టన్నుల గ్యాస్ డిమాండ్ ఉంది. కానీ మన వద్ద కేవలం 15 రోజులకు సరిపడా నిల్వ సామర్థ్యం మాత్రమే ఉంది. మార్చి నెల మధ్య నుంచి ఇప్పటి వరకు గృహ వినియోగ సిలిండర్ల ధర రూ.60 పెరగ్గా, కమర్షియల్ సిలిండర్ల ధర ఏకంగా రూ.115 పెరిగింది. ఈ ప్రభావం హోటళ్లు, రెస్టారెంట్లు, చిన్న పరిశ్రమలపై తీవ్రంగా పడుతోంది. ప్రభుత్వం ప్రస్తుతం గృహ అవసరాలకు మాత్రమే ప్రాధాన్యత ఇస్తూ సరఫరాను మేనేజ్ చేస్తోంది.

ప్రత్యామ్నాయ మార్గాల వేట

ఈ విపత్కర పరిస్థితులను ఎదుర్కోవడానికి ప్రభుత్వం ఇతర దిగుమతి వనరులను వెతుకుతోంది. గతంలో కోవిడ్ సమయంలో అనుసరించిన పద్ధతులను మళ్ళీ అమలులోకి తెచ్చే ప్రయత్నం చేస్తోంది. ఓడల మార్గాలను మార్చడం, దేశీయంగా ఉత్పత్తిని పెంచేందుకు రిఫైనరీలకు ఆదేశాలు ఇవ్వడం వంటివి ఇందులో భాగం. అయితే, దిగుమతి చేసుకున్న గ్యాస్ తో పోలిస్తే దేశీయ ఉత్పత్తి తక్కువగా ఉండటం వల్ల కొరతను పూర్తిగా నివారించడం కష్టంగానే కనిపిస్తోంది. ప్రజలు గ్యాస్ వాడకాన్ని పొదుపుగా చేసుకోవడం మంచిదని నిపుణులు సూచిస్తున్నారు.