Hormuz Crisis : యుద్ధ సెగ.. భారత ఆర్థిక వ్యవస్థకు రూ.3 లక్షల కోట్ల ముప్పు.. కిచెన్ బడ్జెట్ తలకిందులేనా?

Hormuz Crisis : భారత వ్యవసాయ రంగాన్ని, దేశీయ ఆర్థిక వ్యవస్థను ప్రస్తుతం రెండు ప్రధాన సమస్యలు తీవ్రంగా భయపెడుతున్నాయి. ఒకటి ఆకాశం వైపు నుంచి వస్తున్న బలహీనమైన రుతుపవనాల ముప్పు అయితే, రెండోది వేల కిలోమీటర్ల దూరంలో ఉన్న సముద్ర జలాల్లో కొనసాగుతున్న యుద్ధ జ్వాలలు. పశ్చిమ ఆసియాలో నెలకొన్న ఉద్రిక్తతల కారణంగా అంతర్జాతీయంగా అత్యంత కీలకమైన హోర్ముజ్ జలసంధిలో నౌకల రాకపోకలకు తీవ్ర అంతరాయం ఏర్పడింది. దీనివల్ల భారతదేశానికి దిగుమతి అయ్యే ముడిచమురు, రసాయన ఎరువుల ధరలు ఆకాశాన్నంటుతున్నాయి. మరోవైపు ఈ ఏడాది రుతుపవనాలు చాలా బలహీనంగా ఉంటాయని వాతావరణ శాఖ హెచ్చరించడం దేశ ఆర్థిక రంగానికి మింగుడుపడటం లేదు.

దశాబ్ద కాలంలోనే అత్యంత బలహీన రుతుపవనాలు

భారత వాతావరణ శాఖ విడుదల చేసిన తాజా అంచనాల ప్రకారం.. 2026 సంవత్సరంలో నైరుతి రుతుపవనాల వర్షపాతం సాధారణం కంటే చాలా తక్కువగా ఉండే అవకాశం ఉంది. పసిఫిక్ మహాసముద్రంలో వేగంగా పుంజుకుంటున్న ఎల్‌నినో ప్రభావం వల్ల జూన్ నుంచి సెప్టెంబర్ మధ్య కాలంలో సాధారణ వర్షపాతంలో కేవలం 90 శాతమే నమోదయ్యే ప్రమాదం 92 శాతం వరకు ఉందని ఐఎండీ హెచ్చరించింది. దీనివల్ల దేశం గత దశాబ్ద కాలంలోనే ఎన్నడూ లేనంత బలహీనమైన రుతుపవనాలను ఎదుర్కొనే పరిస్థితి కనిపిస్తోంది. ఇది ఖరీఫ్ సీజన్‌లో సాగయ్యే వరి, మొక్కజొన్న, సోయాబీన్ వంటి ప్రధాన పంటల దిగుబడిపై తీవ్ర ప్రభావం చూపేలా ఉంది.

హోర్ముజ్ సంక్షోభం.. ఎరువుల ధరలు డబుల్

ప్రపంచంలో ఎరువులను అత్యధికంగా ఉపయోగించే దేశాల్లో భారత్ రెండో స్థానంలో ఉంది. మన దేశ అవసరాలకు కావలసిన ఎరువులు, వాటి తయారీకి వాడే ముడి సరుకు ఎక్కువగా గల్ఫ్ దేశాల నుంచే హోర్ముజ్ జలసంధి ద్వారా దిగుమతి అవుతాయి. ప్రస్తుత యుద్ధ వాతావరణం వల్ల ఈ మార్గంలో షిప్పింగ్ ట్రాఫిక్ ఏకంగా 95 శాతం పడిపోయింది. ఫలితంగా ప్రతి నెలా 30 నుంచి 40 లక్షల టన్నుల ఎరువుల సరఫరా నిలిచిపోయింది. డిమాండ్ పెరగడంతో అంతర్జాతీయంగా యూరియా, డీఏపీ (DAP) ధరలు రికార్డు స్థాయికి చేరాయి. గతంలో కంటే రెట్టింపు ధర చెల్లించి భారత్ ప్రస్తుతం ఎరువులను కొనాల్సి వస్తోంది.

ప్రధాని మోదీ పొదుపు పిలుపు.. సహజ వ్యవసాయమే శరణ్యం

ఎరువుల దిగుమతి భారం దేశ వాణిజ్య లోటును విపరీతంగా పెంచేస్తుండటంతో ప్రధానమంత్రి నరేంద్ర మోదీ దేశ ప్రజలకు, రైతులకు ఒక కీలక విజ్ఞప్తి చేశారు. కేవలం పెట్రోల్, డీజిల్ వాడకాన్ని తగ్గించడమే కాకుండా, పొలాల్లో రసాయన ఎరువుల వినియోగాన్ని సగానికి తగ్గించాలని ఆయన రైతులకు పిలుపునిచ్చారు. భూసారాన్ని కాపాడుకుంటూనే, ఆర్థిక భారాన్ని తగ్గించుకోవడానికి వీలైనంత త్వరగా సహజ వ్యవసాయం వైపు మళ్లాలని ప్రధాని నొక్కిచెప్పారు. ప్రస్తుతం బంగారం, క్రూడ్ ఆయిల్ తరహాలోనే విదేశీ ఎరువులు కూడా దేశ ఖజానాను ఖాళీ చేస్తున్నాయనే చేదు నిజాన్ని ఈ పరిస్థితి గుర్తుచేస్తోంది.

రూ.3 లక్షల కోట్లు దాటనున్న ఎరువుల సబ్సిడీ

మార్కెట్ నిపుణుల అంచనాల ప్రకారం.. అంతర్జాతీయంగా ఎరువుల ధరలు టన్నుకు 950 డాలర్లకు చేరడంతో కేంద్ర ప్రభుత్వంపై సబ్సిడీ భారం భారీగా పెరగనుంది. బడ్జెట్‌లో ఎరువుల సబ్సిడీ కోసం కేటాయించిన రూ.1.7 లక్షల కోట్ల అంచనా తలకిందులై, ఈ ఏడాది మొత్తం సబ్సిడీ బిల్లు ఏకంగా రూ.3 లక్షల కోట్ల మార్కును దాటే అవకాశం ఉందని క్రిసిల్ (CRISIL), ఇక్రా (ICRA) వంటి రేటింగ్ సంస్థలు చెబుతున్నాయి. దీనివల్ల ప్రభుత్వానికి అదనంగా రూ.లక్షల కోట్ల రూపాయల ఆర్థిక భారం పడటంతో దేశ ద్రవ్య లోటు జీడీపీలో 4.7 నుంచి 4.8 శాతానికి పెరిగే ప్రమాదం ఉంది.

రూపాయి మరింత పతనం.. కిచెన్ బడ్జెట్‌కు ద్రవ్యోల్బణం సెగ

అంతర్జాతీయ మార్కెట్లో ముడిచమురు ధర బ్యారెల్‌కు ప్రతి 10 డాలర్లు పెరిగినప్పుడల్లా భారత్ అదనంగా 18 బిలియన్ డాలర్లు ఖర్చు చేయాల్సి వస్తుంది. దీనివల్ల డాలర్‌తో పోలిస్తే రూపాయి విలువ మరింత బలహీనపడి రూ.100 మార్కుకు చేరువయ్యే ప్రమాదం ఉందని ఆర్థిక నిపుణులు హెచ్చరించారు. ఎరువుల కొరత, బలహీనమైన రుతుపవనాలు తోడైతే రాబోయే రోజుల్లో నిత్యావసరాలు, కూరగాయల ధరలు పెరిగి సామాన్యుడి కిచెన్ బడ్జెట్ పూర్తిగా అస్తవ్యస్తమవుతుంది. అయితే, ప్రస్తుత ఖరీఫ్ సీజన్‌కు సరిపడా ఎరువుల బఫర్ స్టాక్ దేశంలో అందుబాటులో ఉండటం ఒక్కటే ప్రస్తుతానికి ఊరటనిచ్చే అంశం.