Jio Hotstar : ఓటీటీ ప్రపంచంలో సెన్సేషన్.. నెట్ ఫ్లిక్స్ కు హాట్ స్టార్ గట్టి పోటీ.. 30కోట్ల యూజర్లతో రికార్డు

Jio Hotstar : ముకేశ్ అంబానీకి చెందిన జియోహాట్‌స్టార్ ఇప్పుడు ఓటీటీ ప్రపంచంలో పెద్ద సంచలనం సృష్టిస్తోంది. ఈ ప్లాట్‌ఫామ్ ఇప్పుడు నేరుగా నెట్‌ఫ్లిక్స్‌కు పోటీ ఇస్తోంది. జియోహాట్‌స్టార్ వినియోగదారుల సంఖ్య ఇప్పుడు 30 కోట్లకు చేరువైంది. ఇది నెట్‌ఫ్లిక్స్ 30.16 కోట్ల వినియోగదారుల సంఖ్య కంటే చాలా స్వల్పంగా మాత్రమే తక్కువ. ఈ సంవత్సరం ఐపీఎల్ ముకేశ్ అంబానీ అదృష్టాన్ని మార్చింది.

ఫిబ్రవరి 2024 వరకు జియోహాట్‌స్టార్‌కు కేవలం 5 కోట్ల మంది యూజర్లు మాత్రమే ఉండేవారు. కానీ, టాటా ఐపీఎల్ ప్రారంభం కాగానే, ఈ సంఖ్య ఏకంగా 28 కోట్లకు చేరుకుంది. మే నెలాఖరుకు ఈ సంఖ్య 30 కోట్ల మార్కును దాదాపు చేరుకుంది. ఐపీఎల్ జియోహాట్‌స్టార్‌కు నిజంగానే గేమ్ ఛేంజర్ లా పనిచేసింది. ఉచిత స్ట్రీమింగ్ మరియు అద్భుతమైన కవరేజ్ కారణంగా వినియోగదారులు చాలా వేగంగా జియోహాట్‌స్టార్‌లో చేరారు.

జియోహాట్‌స్టార్ సీఈఓ సంజోగ్ గుప్తా ప్రకారం.. ఈసారి ఐపీఎల్ కంపెనీకి అత్యధిక ఆదాయం తెచ్చిపెట్టిన సీజన్. యాడ్స్, సబ్‌స్క్రిప్షన్లు రెండింటి నుంచీ అద్భుతమైన ఆదాయం వచ్చింది. ఇది భారతదేశంలో అత్యధికంగా ఆదాయాన్ని సంపాదించిన స్పోర్ట్స్ ఈవెంట్‌గా మారిందని ఆయన చెప్పారు.

నెట్‌ఫ్లిక్స్ దగ్గర డిసెంబర్ 2024 వరకు 30.16 కోట్ల యూజర్లు ఉన్నారు. జియోహాట్‌స్టార్‌లో డిజిటల్, టీవీ రెండూ కలిపి మొత్తం వ్యూస్ 119 కోట్లు నమోదయ్యాయి. కేవలం డిజిటల్ ప్లాట్‌ఫామ్‌లో 65.2 కోట్ల మంది మ్యాచ్‌లు చూశారు. మొబైల్ ఫోన్‌లలో 41.7 కోట్ల మంది, కనెక్టెడ్ టీవీలలో 23.5 కోట్ల మంది ఐపీఎల్ చూశారు. ఆండ్రాయిడ్ ప్లాట్‌ఫామ్‌లో జియోహాట్‌స్టార్ యాప్‌ను 104 కోట్ల సార్లు డౌన్‌లోడ్ చేసుకున్నారు.

డిస్నీ స్టార్ 2022లో టీవీ బ్రాడ్‌కాస్టింగ్ హక్కులను రూ.23,575 కోట్లకు కొనుగోలు చేసింది. దీనికి తోడు, వయాకామ్18 డిజిటల్ హక్కులను రూ.20,500 కోట్లకు దక్కించుకుంది. ఇప్పుడు జియోహాట్‌స్టార్, నెట్‌ఫ్లిక్స్ వంటి ప్రపంచ ప్లాట్‌ఫామ్‌లకు గట్టి పోటీ ఇస్తోంది. ఉచిత కంటెంట్, క్రికెట్ పిచ్చి, మంచి కనెక్టివిటీ ఆధారంగా జియోహాట్‌స్టార్ నెట్‌ఫ్లిక్స్‌కు చెమటలు పట్టిస్తున్నట్లు కనిపిస్తోంది.